最後倒數！灣仔分域碼頭海軍商場復古味濃上世紀歷史色彩將拆卸重建

踏入11月，灣仔分域碼頭（Fenwick Pier）、海軍商場（Fleet Arcade）已經步入倒數階段，及後即將被清拆，碼頭歷史可追塑至19世紀，尤如美國海軍基地，而商場則為60年代落成，如果要拍拖兩個人再感受吓本地碩果僅存嘅復古地帶，此處真實嘅歷史痕跡比虛擬佈景更值得參觀，想去懷緬一下就記得12月前要去啦！

海軍商場（Fleet Arcade）於1960年代建成，最初用作給予水兵購物，商店多來自海軍大廈（The Fleet House），原本分高低兩座，高座就係海軍商場，現時由地下至2樓只剩低約有10多間商舖，部份商舖亦趁商場拆卸前都進行割價傾銷。

以現場所見，大堂設有Information Center，除咗1樓為澳洲餐廳（The Quarterdeck Club）轉手的法式餐廳（Quayside Harbour Front Restaurant & Bar），地下、2樓均為商店，當中有曾大受艦艇水兵歡迎嘅洋服店Fu Shing & Sons Ltd.，有逾30年歷史，就連港督彭定康亦曾前往該店試身。其他商舖當中，同時包括舊式理髮店（Charmes De France）、瓷器店、酒品店、首飾店、中式紀念品店等，不過亦有少量商舖未有營業。

地下門口有一間意大利食品超市（Mercato by Giando），同樓上餐廳為同一老闆，超市於港島跑馬地、半山、鴨脷洲皆有分店，無論環境、抑或貨品，甚至文化，整個空間有如外國超市，內有唔少外地食材，吸引外地人前往購物，當中澳洲紫色西蘭花，甚為特別。

昔日商舖當中，最為人熟悉嘅應該係90年代至2004年期間可以睇煙花嘅麥當勞餐廳（McDonald’s），為全港景觀最好嘅麥當勞餐廳，而且係唯一一間既有售賣Pizza、亦有啤酒飲嘅麥當勞分店，可用美元消費，確實係本地人嘅回憶，當年熱門嘅海旁座位可享無敵海景，現時商場內只見到餐廳剩低嘅枱櫈，冷冷清清，但仍有如穿梭時空。而對編輯嚟講，更特別之處係有商舖搬出舊時香港麥當勞餐廳嘅Hello Kitty & Dear Daniel系列毛公仔，每隻只係$20/隻，多年來竟然只係漲價$2，比網上食水極深、高價「轉售」嘅網民有良心得多！

據官方重建計劃文件所見，政府於2012年已經有擴展該地嘅規劃圖（有指2008年已有拆卸打算），並整合新中環海濱長廊，連接中環至灣仔，建立公眾休憩用地，當中亦包括行人隧道、高架橋，2013年亦已拆除碼頭梯台。另外，消息指1955年起持有海軍商場嘅香港軍人輔導會（Servicemen’s Guides Association）曾提出將「休憩用地及道路」土地用途改成「商業、文化、機構及康樂用途」，惟似乎政府仍然堅持清拆分域碼頭海軍商場。政府於2020年初已經終止租約，不再享$1象徵式租金，香港軍人輔導會及商店於兩年內必須全部遷出，並騰出空間予港灣消防局，對於政府收地重置，香港軍人輔導會於今年亦曾經提出同消防局共存方案，保留集體回憶，不過被政府拒絕，分域碼頭海軍商場始終未能逃過拆卸重建嘅命運。

分域碼頭（Fenwick Pier）雖然靠近港島心臟地帶，靠近中信大廈，但位置上為中環至金鐘之間；而海軍商場（Fleet Arcade）亦交通不便，故鮮有人流，今年則傳出清拆消息，商場職員亦證實11月尾至年底將會進行清拆。碼頭商場以英式建築設計為主，美國文化從每個角落亦清晰可見，除咗美國麥當勞餐廳，亦包括以美式英文「Restroom」展示嘅洗手間標記，無論係美國文化定殖民地歷史，都將會一再消失殆盡，要朝聖就要趁早啦！

事實上，分域碼頭於19世紀建成嘅私人碼頭，由最初位處莊士敦道，因填海工程而遷移至告士打道，最後遷移到分域碼頭街，當中設有分域船廠（Fenwick & Co.），為本地第一間船廠。碼頭曾接待海軍訪客，如美國軍艦，包括14個國家船員（走到門口旁邊可見答案）、逾50000個海軍人員，而海軍俱樂部（China Fleet Club Royal Navy）亦於90年代搬移到分域碼頭，方便海員，碼頭亦為美國海軍嘅本地辦公地方。現時，從2樓右邊門口步出，可以循純白樓梯步上頂樓，近距離望招牌，亦可回望分域碼頭街景，不過3樓辦公室則未能進入。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線 302, 720A, 905P, 936A, 978, HR48 皆可到達灣仔。

❷ 由會展步行到分域碼頭海軍商場，穿過香港藝術中心西公園/Shui on centre Amarzaya，腳程約10至15分鐘；而經香港演藝學院，亦可到達分域碼頭街。

❸ 更多最新資訊可以瀏覽官方Facebook﹕https://www.facebook.com/FenwickPier/ ，內有唔少趣事。

❹ 注意入口位處分域碼頭街，唔好兜咗去後面龍和道或龍合街，

❺ 海軍高場門口寫有「只招待會員」告示，必須使用會員咭先可以進入，但實際上填妥簡單資料，如名字同電話號碼，然後簡單簽返個名，費用全免，就可以獲得會員咭同進入商場。

❻ 地下、2樓皆為商舖，1樓則為餐廳，部份會以港紙標價，而部份則會以外幣標價，有如回到過去。

❼ 內有少量停車位，需於場內消費，可享1小時免費泊車。

❽ 海軍商場本來於星期日休息，但現時7日無休。

❾ 2樓基本為客人嘅頂樓，推門到純白樓梯，可見前門同餐廳，可以再步上一層樓，到達商場頂樓，不過3樓頂樓為辦公室，門口係嚴禁進入。

❿ 地下Information Center有一本免費香港旅遊指南，免費取閱。

❿ 地下側邊有樓梯步行上洗手間，旁邊寫有Restroom，為美式英語。