新蒲崗街坊點心專門店屹立9年一盅兩件好過去酒樓

新蒲崗雖然於地圖上佔地唔多，但區內良心小店絕對係意想不到地多，逐間懲罰都要去幾個星期！當中，靠近Mikiki商場就有一間街坊點心舖，從外到內，由價錢到食物，以致座位到服務，都同酒樓差唔多，兩個人想拍拖飲吓茶，點都好過去大集團酒樓啦。

中式點心如蝦餃、燒賣、腸粉、牛肉球都係飲茶必備產物，於新蒲崗區內屹立9年嘅陳師傅點心專門店就以即叫即蒸手工點心聞名，地方唔大，座位狹窄，現場唔少客人均貌似熟客，似乎明顯重視熟客多於生客，眼見熟客們一盅兩件，似足去酒樓歎茶。

望望點心紙，同酒樓嘅點心紙無異，點心無分大、中、小點，亦無分早茶、午市、下午茶，只有劃一價錢。嚴格嚟講，部份點心比酒樓貴，最平嘅點心都要$20一籠，但每位茶芥就只係$4，比現時酒樓平。

魚子燒賣皇2個 $23 熱辣辣上枱，顆頭圓潤飽滿，豬肉、蝦肉餡料充足，啖啖肉感夾離蝦肉爽口感覺，唔鹹亦唔肥膩。而陳皮牛肉腸 $29 嘅腸粉皮唔厚身，不過粉皮略有黏度，唔夠爽滑，陳皮味唔重，牛肉味就較重，而牛肉份量唔少，比較軟爛。

古法馬拉糕 $24 質感麻麻，略有鬆軟感，但糕身太鬆散。最特別反而係好少見嘅時令臘腸卷 $26，麵包、臘腸都軟熟，臘腸帶微鹹味，軟包可中和鹹味，臘腸同軟包好配合。

薑蔥牛柏葉 $33 吸盡醬汁，味道偏鹹，算爽口，入口略有韌度，不過底下一條條烏冬味道就剛好。至於平時好少見酒樓有白花釀魚肚 $35，表面蝦滑彈牙，魚肚入味，軟稔爽滑之餘有咬口，厚身啲會更吸引。

甜品揀咗宮廷桂花糕 $26，有少量龍眼肉同杞子，帶啖啖香甜味，算係一種唔錯嘅飯後甜品。

兩個人旅吓行

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 一定要避開食飯時間，否則外賣同堂食都有排等。

❷ 座位空間有限，最好輕便啲去，而且每次唔可以叫太多點心，因為無位擺，要將蒸籠一個又一個疊高。

❸ 逐籠點心叫會比較貴，最好效法公公婆婆一盅兩件方式，以盅飯打底，再加一至兩個點心，埋單就會比較平。

❹ 最低消費每位係$60。

EATWO

Miss A