【區區有小店】沙田瀝源3間街坊小店尋$36碗3餸麵/傳統酒樓歎下午茶

沙田瀝源邨雖然離市中心不遠，以天橋連接，如果嫌市中心食店太多人或太貴，可以拍拖兩個人稍移玉步前往瀝源邨，內裏有3間街坊小店，包含傳統酒樓、港式粉麵、車仔麵店，間間價錢相宜，座位亦比較多。

（1）時新車仔麵屋

香港租金、物價依舊高企，連食碗車仔麵都隨時$40起跳，沙田天橋底下嘅車仔麵檔賣$36/碗3餸車仔麵，加多款餸先加$5。店舖位於屋邨之間，除咗車仔麵，亦有其他飯麵，有如屋邨茶記，店面甚小，有室內外座位可擇，點餐就只需填上點餐紙。飲品方面有豆漿、菜蜜、涼茶、汽水、檸蜜等可擇，檸檬有三四片，酸澀味適中，檸檬新鮮。

車仔麵每碗麵底充足，車仔餸亦份量適中，豬紅入味之餘亦挺身有咬口，蘿蔔無渣又清甜，韭菜餃餡料夠、野菜魚餅有粟米粒，甜酸齋同菜底一樣非常索湯。以屋邨麵檔嚟講，湯底少有地有5款選擇，包括豬骨湯、蕃茄湯、牛腩汁、沙嗲汁、滷水汁，有如新式車仔麵店，湯汁濃郁，當中蕃茄湯有蕃茄蓉、洋蔥，入口香甜，而牛腩汁則較清淡，帶清甜感覺。