【區區有良心💛】大角嘴富多來商場6間微舖食店間間出色連舊式涼茶舖都有？

大角嘴隱藏美食眾多係人都知，難以估到小小一個富多來商場內都可以找尋6間值得一試嘅小店，每一間座位都唔多，空間有限，由港式飯盒到日式料理，以致舊式涼茶舖都可以搵到，有時候拍拖兩個人唔一定要去大商場食飯，找尋小商場撐枱腳反而更有新鮮感。

（1）鮮餸便當

好多人返工唔想帶飯，但又想慳錢，都會去買兩餸飯或三餸飯，以港式便當套餐為主嘅鮮餸便當就推行平靚正便當，一個飯盒$48，來自米芝蓮三星中菜館主廚出品。便當飯盒內有前菜、主菜、藜麥紅米飯、餐湯或餐飲，健康之餘亦可減肥。餐牌上有約10款菜式可擇，而餐湯就係每日唔同嘅養生燉湯。

延伸閱讀﹕藜麥紅白米飯配滋補燉湯大角嘴$48健康港式便當

（2）回甘堂（林仔涼茶）

過一條馬路，仍然位處櫸樹街，右邊可以見到一間舊式涼茶舖，涼茶、五花茶、廿四味、龜苓膏等，每碗約$12，隨時即Paid即飲。涼茶甘甜而唔苦，值得一試，不過留意每日只營業10:00–19:30，而星期日會休息。

（3）蔥仔越南包

向前步行幾個舖位，會見到一間獨沽一味只賣越南包嘅小店，原來3年以嚟都無變過，只有越南包可以選擇，最多加上餐湯或沙律。越南包分半個包或一個包，4.5吋長為$38至$45，而9吋長則為$58至$65。越南包餡料豐富，法國麵包內有薄切扎肉、烤肉、甘荀、蘿蔔、肝醬、蛋黃醬、青蔥、芫荽、辣椒、豬肉鬆，令麵包清爽開胃，足以頂肚。

延伸閱讀﹕躲藏大角嘴舊商場微舖獨沽一味只賣越南包

（4）小島料理KOJIMA

再前行少少又會見到一間好神秘吓嘅日式料理店，以木系為主調，有如日本街頭小店，以沖繩風牛丼為主打，每日只有5款主食，當中有3款為限量牛丼。其中2款牛丼甚至分成小盛、並盛、大盛，西冷牛丼、肉眼牛丼、壽喜牛丼價錢約由$50至$110左右，分別在於肉量多少，份量則不變，亦屬合理價錢。慢煮牛丼內嘅牛肉特別軟腍，以並盛為例，約有10片牛肉，配搭日本生蛋同乳酪醬，入口無膩感，同時飯粒略帶黏稠感。

延伸閱讀﹕每日只做5款主食！大角嘴商場限量日本牛丼沖繩小島料理心機爆滿

（5）So Good So Yummy

行到近盡頭位置，會發現另一間叫So Good So Yummy嘅小店，曾經一度版針對而告急，一盒飯約$50，同樣屬街坊價錢。餐牌上以日韓菜式為主，包括韓式拌飯$48，連嘢飲，可選配牛肉或豬肉，拌飯屬正常水準，不過不失，肉絲、紅蘿蔔絲、大豆芽、菠菜、冬菇、煎蛋等，飯量適中，只係略嫌泡菜醬份量較少，較為清淡。

延伸閱讀﹕大角嘴微舖告急！街坊價外賣日韓飯盒似足家常菜

（6）Top Thai Thai Food

轉個彎，會發現重有一間隱藏嘅泰國菜位處商場內，藉藉無名嘅小店原來係泰國人主理，包含各款泰國菜式，款式唔多，只有8款，例如海南雞飯、泰式金邊粉、泰式雞扒飯、香葉肉碎煎蛋飯等，亦有少量泰式小食，如冬蔭功、生菜包、青咖哩、木瓜沙律等。以一份海南雞飯為例，價錢分為$43、$45、$50，3個價錢代表雞肉唔同部位，即使係雞髀肉亦只係$50，而且水準不俗。

延伸閱讀﹕泰國人主理？大角嘴低調泰菜Top Thai Thai Food 海南雞飯分成3款任你揀