旺角白布街韓式奶奶雞元祖店屹立多年泡菜系美食辛辣度有層次

要拍拖兩個人選擇一間餐廳，你有何標準呢？有啲人會睇餐廳有無得獎，有啲人會睇食評，有啲人會睇開業年期，有啲人會憑自己經驗，亦有啲人漫無目的胡亂走入一間餐廳，每個人都有唔同嘅標準。今次編輯就走到一間屹立多年、曾經獲獎兼食評評分不俗嘅韓國菜餐廳，對韓國菜無太大感覺嘅編輯又覺得如何呢？

位處油麻地一角嘅韓式餐廳，開業多年屹立不搖，為本地首間以韓式燉雞聞名嘅食店，特別以「元祖奶奶雞」為主打，一直吸引唔少人慕名而至。於2018年，餐廳更獲選食評平台嘅韓國菜熱店選擇，其實除咗元祖奶奶雞，餐廳重有咩好食呢？

店內門面充滿韓式風格，而店內設計就似工業風，分成上下層，從門口「是日推介」餐牌可見，店內推薦韓國部隊鍋$108、泡菜海鮮煎餅$88、弘大燻豬手$108、咸興水冷麵$78，其他受歡迎嘅菜式有火焰韓牛飯、濟洲蠔肉泡飯，本來覺得伏伏哋，但嘗試後先發現都唔算係獨沽一味賣「元祖奶奶雞」。

泡菜海鮮煎餅$88 為經典韓式煎餅，唔少人去韓國旅行都會選擇煎餅，而煎餅並非容易炮製嘅菜式，頗巧功夫，因為粉太多又會影響煎餅質感。今次煎餅偏薄，一塊大圓餅切開6大塊，煎得乾身而唔會太乾柴，而油份唔算重，蛋餅表面煎得香脆，表面更淋上一堆蛋黃醬，減低煎嘅油膩感。煎餅餡料豐富，略帶微辣，煎餅一角放有幾塊辛辣泡菜伴碟，編輯覺得呢塊煎餅頂端加上少許泡菜會更香口，泡菜香濃而辛辣度唔高，為煎餅添上幾分層次。

而咸興水冷麵$78 入口清涼舒服，麵條軟硬適，幾有咬口，味道略帶酸甜，味道偏淡，表面只係有雪梨絲及青瓜絲，其實無太大驚喜，比較適合夏天食用。

韓國炸雞係其中一樣因韓劇面受歡迎嘅韓國菜式，剛巧店內無晒辛辣首爾雞鎚$48/3隻，所以編輯只點選咗辣炒年糕$98，亦即係泡菜辣炒年糕。辛辣年糕放於一個鑄鐵熱鍋內，年糕浸於辛辣泡菜湯當中，鍋內既有一塊塊年糕，亦有野菜、香菇、雞蛋片等，年糕入口煙韌，軟硬適中。泡菜湯帶有甜味，似乎係野菜清甜菜汁滲透辛辣泡菜湯內，湯底辛辣度唔高，偏向溫和，而且有層次感，唔會只會得死辣感覺，容易入口。