泰國小通道！西營盤正宗泰國菜極高水準離海旁僅10分鐘步程

現時，香港有好多以泰國菜為主打嘅小店，但地道正宗泰國菜又有幾多呢？西營盤就有一間隱藏於大街小巷內嘅小型泰菜店，由泰國人主理，炮製傳統泰國菜，水準係區內之上，步入店內，有如拍拖兩個人乘搭Bangkok Express走進泰國通道。

小店位置離捐山窿公園只有10分鐘步程，基本離海旁唔算遠，況且價錢貼地，就算外賣野餐亦無不可，而店舖地理上位置係西區警署、中聯辦之間，客人不單以街坊客為主，亦有唔少外國人，故此可見內裏同時有中英餐牌。據悉，店內兩位老闆娘兼大廚都為泰國人。

要炮製傳統而地道風味泰式料理的確唔容易，有指Q彈醉鬼炒河為招牌菜，以泰國河粉加上配料爆炒，再以醬油上色，隔離枱傳來陣陣香味。另外，傳統風味鮮蝦冬蔭公、香葉肉碎煎蛋配飯都為人氣菜式，款款地道而平靚正。

即使係最普通嘅午市套餐，都為正宗泰國菜，牛丸肥牛泰國船湯金邊粉$68 包含肥牛、牛丸、白蘿蔔、響鈴，更有炸豬皮，份量唔少，炸豬皮微脆，白蘿蔔軟嫩入味，略嫌肥牛稍韌。湯頭正宗，如同泰國船河湯底，鹹中帶甜，略有金不換、芫荽味。

坊間泰菜店比較罕見嘅係青咖哩炒金邊粉$72，可選雞球、豆腐乾、燒腩肉$8，而燒腩肉肥瘦相間，毫不油膩，金邊粉條條被染得青青綠綠，於青咖哩中加入蛋花、豆角、辣椒、紅椒、蔥花、蔬菜等快炒，香氣撲鼻，咖哩味濃厚，香滑有椰奶香，辣度恰好，金邊粉辛辣惹味，相當開胃。

海南雞飯亦係泰國著名菜式，去骨海南雞及香茅雞湯配雞油飯$68 以無骨雞加雞湯配油飯，雞肉呈金黃色，只係略嫌唔夠嫩滑，而金黃色雞油飯有啖啖黃薑味，至於雞湯則帶香茅味，湯底鮮甜。

飲品中有凍檸茶，為港式檸茶，凍奶茶為泰式奶茶，其他有椰汁冰、珍多冰、龍眼冰、青檸梳打，當中比港式奶茶略深色嘅泰式奶茶略帶泰國奶茶嘅香甜味，冰度唔算太重，茶底為泰式菜葉，濃度適中，入口順滑。

兩個人旅吓行

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 小店離捐山窿公園約10分鐘步程。

❷ 凍飲需加$2。

❸ 無加一服務費。

❹ 留意有中英文餐牌提供。

❺ 特別注意，西營盤泰道Bangkok Express唔等同於位處西貢大網仔路沙下村9號地舖嘅泰道 Thai Dao，純粹中文同名，西營盤泰道先至係同路人小店。

EATWO

Miss A