灣仔西營地3日2夜大草原露營體驗！晴天雨天營地優缺點大公開隨時步灣仔南封閉後塵？

眾所週知，上年底政府重開41個露營地點，而西貢灣仔南營地及灣仔西營地喺重開後無耐，於12月23日即時關閉並為公眾廁所進行緊急維修工程，營地暫停開放，以灣仔南營地衛生問題較為嚴重。及後兩個營地於12月26日僅維持有限度服務，只設有幾個臨時流動廁所，同時未能提供食水。最近，灣仔南營地及灣仔西營地正式全面重開，公眾廁所及水喉已經恢復運作，總算可以拍拖兩個人露吓營。不過，編輯寧願一直唔好維修廁所好過，到底點解會咁講？

上年底第一次營地重開係因為疫情完結，第二次營地重開係因為公眾廁所及水喉衛生問題需要維修，由有限度服務到3月完全重新開放，需要數個月時間。

上回編輯已前往灣仔南營地，今回就轉移前往灣仔西營地，集中講講灣仔西營地，前者毗連後者，命運亦一模一樣。西貢灣仔半島與港島灣仔區並無關係，位於西貢嘅灣仔半島本來於80年代只係採泥區，泥土用作興建發展大埔工業邨及馬鞍山新市鎮，無論係灣仔南營地定灣仔西營地，現時皆以偌大草地聞名。

基本上，兩個營地官方營位並唔多，以灣仔西營地為例，雖然有遼闊大草原，但其實以燒烤爐及枱櫈計算，只有約20個營位，只不過草地太廣闊，唔少人都直接於大草地紮營，並無理會實際營位。

由於西貢灣仔西營地同灣仔南營地一樣，設施齊全，既有垃圾收集站，亦有正式公眾廁所、有冷水供應嘅浴室、洗滌處、水喉，非常方便，故吸引唔少人前往露營。不過，以編輯以3日2夜灣仔西營地實測，幾乎可以肯定灣仔西營地遲早會再步灣仔南營地後塵，損壞後需要再封閉修復，只係不久將來嘅事。

雖然設備完善，但露營人士對衛生問題似乎無太大關注，更不用說公德心，雖然有正式公眾廁所及浴室，但每一格廁所都有人使用後唔沖廁，包括男廁及女廁，而地板亦遍佈濕泥。更嚴重嘅地方係洗滌盆，告示寫明廚餘、垃圾唔好倒入洗滌處，但仍舊可見洗滌盆內有大量食物殘渣、廚餘，甚至可見食物包裝紙！結果，只係3日2夜時間，已經見到洗滌盆、廁所塞咗幾次，編輯有一個諗法，真係寧願唔好維修好廁所同水喉，至少無咁多人一齊玩爛一個地方。

灣仔西營地靠近海下灣海岸公園，本身寧靜舒適，地方空曠，適宜觀星，週邊種滿林木，更有廣闊大草原，只係並無海景。營地不時有牛牛路過，基本上牛牛唔會騷擾人，除非嗅到食物濃烈香味先會被吸引。所以，強烈建議大家唔好煮太香嘅食物，因為編輯正身受其害，附近帳篷有人煮香氣四溢嘅食物，引來牛牛，然後香氣隨風飄散至我哋營位。當時我哋齋坐，但牛牛就走入我哋營位內，絕對係黑狗偷食、白狗當災。

長假期第一日，天氣不穩，唔算晴天，前往灣仔西露營人士唔多，分成左右兩排，編輯選擇嗰邊一整排偏靜，對面一整排則偏嘈。中央位置大草地有水窪，故一直無人紮營，但就有唔少人於中間草地放風箏、踢足球、跑跑跳跳、玩航拍等。而垃圾站乾淨整潔，少見垃圾，廁所並無臭味，洗滌盆亦無淤塞，大草地氣氛寂靜，坐低放空，輕鬆聽歌、煮簡餐、玩Broadgame、觀星，環境非常Chill，牛牛與人亦和平共處。

長假期第二日，日間天氣晴朗，前往營地露營嘅人愈來愈多，灣仔半島兩個營地全被插針，連灣仔西營地大草地都被帳篷填滿。有唔少人都係只講求Gear、玩Glamping嘅人，但現場目測見到有營位一晚四人丟出三大袋垃圾。及後，垃圾站於第二晚瞬間被填滿，甚至有垃圾袋跌出大型垃圾桶；而廁所亦逐漸傳出陣陣惡臭，洗滌盆造成多次淤塞，牛牛不斷因食物香氣闖入多個營位。另外，夜晚時份甚至有南亞裔人士開Party，對面一排營位氣氛高漲，恍如夜場，聲音至少延續至晚間12點至1點，皆因凌晨落雨。

長假期第三日，前一晚突然大風大雨，唔少人營位被破壞，未知係牛牛搵食定大風大雨吹散。多數露營人士都只係玩2日1夜，所以第三日自然人數大減，當然亦有少數人第三日先前往營地。垃圾站垃圾依舊堆積如山，水喉及廁所維持時好時壞嘅情況，其實露營前預先處理包裝，露營時將垃圾壓縮及分類，自然可減少大多數垃圾，要做到山野不留痕，香港人真係要向「姐姐」學習。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 前往灣仔西營地與灣仔南營地基本一樣，既可從海下灣步行前往，亦可以於黃石碼頭乘搭渡輪前往。如欲乘搭渡輪，可於鑽石山巴士總站乘搭巴士路線96R或西貢巴士總站乘搭巴士路線94，直抵終點站黃石碼頭，然後轉乘渡輪，最早船班次為10:40，只限星期六、日及公眾假期，沿途會先經過赤徑，再前往灣仔半島碼頭，巴士車程約30至45分鐘，船程大概20分鐘。

❷ 灣仔南營地與灣仔西營地之間只係一道碎石路，基本平坦，但略有凹凸不平，兩者之間步程約為5至10分鐘。

❸ 而如欲步行至灣仔半島，可乘搭小巴路線7號，至海下村總站，落車後依大灘郊遊徑走，大概45分鐘至1小時即達灣仔西營地，此為平日路線，小巴大概30分鐘一個班次，最好預早前往站頭位置。

❹ 大船人均$18，而快艇人均則為$30，前者需經赤徑，後者則直接往返黃石碼頭及灣仔半島碼頭，時間快速，不過快艇比較危險，而且並非合法交通工具，保險亦唔包，所以建議都係睇返大船班次，選擇較安全嘅方法。

❺ 灣仔南營地有圍欄，牛隻難以進入，但多隻牛隻於灣仔西營地經常出沒，所以要特別小心，唔好將垃圾及食物隨處擺放，亦唔好煮香氣四溢嘅食物，隨時害到自己又害到其他人，因為牛隻會依風向嗅到香味，其他營都會無辜遭殃被牛隻入營，因為編輯身受其害。

❻ 若牛隻不慎闖入營，謹記保持冷靜，唔好以餵食物為引誘方式驅趕，旁邊大叔教路只要輕輕拍打牛隻就得，而天真無邪嘅小朋友將小足球碌到牛隻腳邊及用球拍打牛隻，牛牛亦會懂得向前步行離開。

❼ 唔少人會於營位附近放置樹枝，以免牛隻進入，有啲人會檢枯枝，但編輯見有唔少人貪快捷方便，都係攞刀鋸樹斬枯枝，此做法絕對唔建議。編輯另有建議，實地引證後確認用營繩築起圍牆更有效，只要細心啲留意吓就會發現，牛隻係識得避開營繩，所以將營繩於營位圍一個圈，自然可以防牛，使用此方法嘅話，最好多帶4至5條營繩。

❶ 朝早、夜晚溫差較大，一時太熱，一時又轉涼，謹記帶備足夠衣物保暖。

❷唔建議露營使用波波燈，盡量減少光害，先可以親近大自然。

❸ 謹記於適當營區生火，以及離開時要將所有火種完全熄滅。

❹ 呢個世界有惡性循環，亦有良性循環，同隔離鬥大聲只會愈來愈大聲，反而鬥細聲先係控制聲浪嘅做法，編輯用實驗證明，一整排營位都係偏靜，就算有人新插入嚟，播歌或大聲說話，但見附近聲音極小，都會不自覺細聲咗，最終露營環境變得更好。

EATWO

Miss A

隱身中央圖書館背後！Dream浪漫西餐廳「世一」焦糖燉蛋／風乾黃油雞／紅菜頭刈包