8間本土良心店打入米芝蓮必比登推介2023！台灣菜佔3席位星馬菜/川菜/中港菜式大熱入圍

最近，米芝蓮公佈《香港澳門米芝蓮指南 2023》完整名單，由米芝蓮評審員推薦入選必比登名單嘅65間香港餐廳已經出爐，其中有8間為本土良心店，包括星馬菜、川菜、街頭小食、中港菜式，而台灣菜更佔3個席位，拍拖兩個人想去試吓米芝蓮就記得要睇實呢個私伙名單啦！

所謂米芝蓮必比登推介，其實即係一啲為消費者提供低於港幣$400或澳門幣$400嘅餐廳，而呢個價錢可享用3款菜式美食，價錢唔包括飲品，簡單嚟講，就係物有所值嘅食肆同街頭美食。

今次2023年米芝蓮必比登推介名單中，有8間本土良心店榜上有名，包括兩姊妹涼皮有限公司、大圍小館(大圍)、吃什麼、阿元來了(西環)、古月、倆口小吃 (元朗)、八寶清湯腩、西關老祖，排名不分先後，成功晉身為摘星餐廳，獲得星級肯定。

北角﹕古月

首先係已經於2021年打入過《米芝蓮指南》必比登推介嘅古月，小店只係位處北角小巷內，開業至今有8年，以星馬菜為主打，其實從2016年起已獲得米芝蓮星級餐廳榮譽，而且連續多年打入米芝蓮必比登推介。

小店以古月命名，意指古月粉（胡椒粉），重點菜式係新加坡正宗肉骨茶，以古月茶配搭米粉或白飯，比例為1:1，當日實試配料充足，大舊蒜頭配上骨肉分離軟腍肉排，加上湯底有濃郁胡椒香味，辛辣刺激，非常暖胃。新加坡肉骨茶同馬來西亞肉骨茶最大分別就在於湯底，後者以大量藥材、香料熬煮，色水較深；而前者湯底則較清澈，只簡單以生蒜、胡椒作湯，辛辣味重，比較嗆喉。

延伸閱讀﹕港島7黃店入選《米芝蓮指南2021》必比登推介北角突襲封區內摘星餐廳實試正宗新加坡肉骨茶

連鎖店﹕兩姊妹涼皮有限公司

而兩姊妹涼皮有限公司係7間之中最為人熟悉嘅小店，屬平價街頭小食店，分店開完一間又一間，小店於太子、荔枝角、元朗、屯門皆有分店。

香港人鍾意食川菜，雲南米緞、酸辣粉都係喜愛菜式，但通常川菜餐廳少見有質素良心店，而呢間小店以平價及貼地為主打，加上杜汶澤嘅Yellopenrice及喱騷曾經推介過，就更受到本地人歡迎。店內以好姊妹涼皮、重慶酸辣粉、黑糖五彩冰粉等最受歡迎，醬汁酸辣，配料及口味正宗，涼皮順滑，薯粉晶瑩，辛辣有層次，都係嗜辣之人必食之選。

延伸閱讀﹕太子3間酸辣粉專門店涼皮煙韌彈牙滲出麻辣鮮香

中環﹕吃什麼

位於中環心臟地帶嘅吃什麼，同樣係由2019年起至今連續五年入選《米芝蓮指南》必比登推介餐廳，小店以台灣菜為主，包括台式牛肉麵、九層塔蛋餅等台灣小食，一直受到本地人歡迎。

天后﹕八寶清湯腩

與古月一樣於2021年已經打入過《米芝蓮指南》必比登推介嘅八寶清湯腩，早就係星級餐廳，食店從紅磡開到天后，以牛寶為主打，包括3款牛腩，有坑腩、崩沙腩、爽腩，受歡迎程度之高，從售罄兩個字就睇得出。

一碗牛腩麵，以前賣十零蚊碗，隨便一間雲吞麵舖都有好高水準，但現時可能已經失傳，想搵最傳統嘅清湯腩都唔容易。講返呢間位於天后嘅小店，清湯蘿蔔牛腩麵係必試之選，碗內牛味濃郁，即使係普通牛腩，肉質都軟嫩唔黐牙，入口鬆化。麵條為本地製作嘅傳統手捍竹昇麵，麵質爽口彈牙。而湯式則為藥材湯，八寶意思正正係代表湯底有八種藥材，再配搭牛骨熬煮，相當香濃，不過就略嫌比較鹹。

延伸閱讀﹕天后米芝蓮級數清湯腩竹昇麵配濃厚藥膳湯牛氣沖天