大網仔路出發西貢偏僻露營地！一條路線闖深山曝罟灣南風灣營地眺萬宜水庫西壩

本地官方露營地僅有41個，鍾意露營嘅朋友，不難發現唔少營地都被人群、帳篷擠得水洩不通，想要拍拖兩個人搵個清靜嘅營地唔容易，今次編輯就走上山路，前往兩個相對比較偏僻嘅深山露營地，都係靠近萬宜水庫西壩，山脊之上的確係可以避免人患，但到底係咪好事呢？

曝罟灣營地

前往曝罟灣營地等同前往近年人氣影相位曝罟灣半月堤圍，於大網仔路發記士多旁邊郊遊徑進入北潭涌自然教育徑，步行10分鐘即達上窰民俗文物館、聖母七苦小堂，沿途為上窰家樂徑。1分鐘後從家樂徑轉向上窰郊遊徑，前行3分鐘左右，於分岔路口轉右至山路，既係曝罟灣半月堤圍山路路線，亦係曝罟灣營地路線。

步行約30分鐘至45分鐘，就係半月堤圍與營地分岔路口處，右邊會見到唔覺係入口嘅路口，認住路口個告示牌，此為半月堤圍入口，背後就係半月堤圍秘路，一直下行就係海邊嘅曝罟灣半月堤圍影相位。不過，今次前往營地，只要前行幾步，就會到達曝罟灣營地範圍。

曝罟灣營地極為偏僻，位置屬山脊，為山丘高處，屬西貢東郊野公園範圍，但處於深山之中，營地雖然有多個營位、燒烤爐，粗略計算有逾10個，但其他設備及配套唔齊全，所以人流較少。從營地觀察，基本上無乜露營痕跡，連垃圾桶被吹跌都無人理，營地無人到底係點解？

從地理位置上嚟講，曝罟灣營地處於深山，需要步行至少半小時先可以到達，而且係走崎嶇不平嘅山路，部份路段屬懸崖，背負重物比較危險。營地基本並無草地，大多為石地及硬地，難以插營釘起營，而附近亦有可能有野豬出沒，加上營地週圍林木茂盛，並無景觀，海景全被樹木遮擋，需要前行一段路或折返下路前往半月堤圍先會見到海景。

配套方面，營地只有燒烤爐同旁邊燒烤櫈，並無另設枱櫈，但無污水穴，雖然官方寫有旱廁，但現場係見唔到營地有任何洗手間或旱廁。營地無補給點之餘，無風亦無任何水源，最近可能係半月堤圍嘅海水，整個營地基本上係「百無」，有嘅可能係蚊同陰氣，同埋手機訊號。

由曝罟灣營地出發，步行約15至20分鐘會到達元五墳（南風灣）營地，沿途可眺望鹽田仔、滘西洲等，瑙貢內海一覽無遺，相對於曝罟灣營地，南風灣營地至少有少量設備，亦無需走太長嘅山路，因為另一邊經麥理浩徑第一段就可以上行山路至南風灣營地。

元五墳（南風灣）營地

如果由萬宜水庫西壩、元五墳觀景臺上行至元五墳（南風灣）營地，步程只係約15分鐘，只需要沿上窰郊遊徑走就會到達營地範圍。由南風灣營地折返萬宜水庫西壩，大概亦都係15分鐘步程。沿途至南風灣營地，手機訊號均好強，唔需要擔心收唔到訊號。

依循上窰郊遊徑走，沿途風景優美，既可眺望西貢內海，亦可俯視萬宜水庫西壩景色，皆因元五墳位置正正處於糧船灣萬宜水庫西壩西北面，同時位處南風灣北面及大頭洲東面，所以下行至南風灣營地時，可以俯視西壩同南風灣海岸。

南風灣營地位於南風灣山上，前往南風灣營地需要從上窰郊遊徑下行一段山路梯級，沿途至營地均可收到清晰手機訊號，而萬宜水庫西壩景色，以至對岸大頭洲都清晰可見，甚至可眺望滘西洲，週邊湖光山色盡收眼底，景色壯觀。

相對於剛才嘅曝罟灣，設備同樣唔多，但除咗燒烤爐，至少有一個旱廁，相對方便，只係同樣係比較適合有露營經驗嘅營友。由營地入口起計算，基本上分為3層，只有3個Area，前面兩個較小，而最後一個就較大，可以望到少量海景，但大多數景觀都係被林木遮擋。

南風灣營地明顯有露營痕跡，並非如曝罟灣營地全無露營人士逗留跡象。營地內露營人士唔多，所以草地都算明顯，地面唔硬，方便紮營。營地環境清幽，附近一帶都算寧靜，但如果想睇景，可以折返入口，沿途可以眺望全海景，亦可前往小沙灘行逛或睇日落。

萬宜水庫西壩

麥理浩徑第1段可以直達萬宜水庫西壩及東壩，兩條堤壩均位於西貢東郊野公園範圍，壯觀景色盡收眼底，屬香港一個大水塘，工程目的在於封合糧船灣洲官門海峽東西兩端。西壩同樣擁有湖光山色，湛藍湖水配上鐘形虹吸溢洪道，即係水庫嘅排水口，景觀亦好獨特，不比東壩專美。

萬宜水庫東壩向來係受歡迎嘅行山路線，而萬宜水庫西壩其實都係同一個工程，東西壩合計係全港存水量最大嘅水塘。而由於西壩光害較少，故相對嚟講係較適合觀星。而入口嘅元五墳觀景臺係賞景地之一，可望向萬宜水庫及對出海域風景，比如係大頭洲、吊鍾洲、滘西洲、西貢一帶景色。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線94,96R,289R，於上窰站落車，即係北潭涌站之後嘅一個站，落車後折返發記士多就會到達入口。

❷ 山路雖然唔難走，但都算崎嶇不平，亦要上落，不適宜拖車前往。

❸ 部份路段狀似懸崖，所以都要小心步行。

❹ 若去南風灣營地，可以直接於萬宜水庫西壩起步，既可乘搭巴士路線94,96R,289R前往上窰站，依大網仔路上行，30至45分鐘就會到達西壩。

❺ 小巴路線9A可以直達西壩，該路線係以東壩為尾站，需要於北潭涌上車，路線只係走北潭涌至東壩，回程就算搭完小巴都係需要轉巴士，而東壩通常已經滿座，所以最好都係預返時間沿大網仔路步行折返發記士多等巴士。

❻

❼

EATWO

Miss A

【區區有小店2025】上環9間尚存本土餐廳美食！萬壽無疆咖啡／脹卜卜餃子／人氣車仔麵

曝罟灣營地

元五墳（南風灣）營地

萬宜水庫西壩

兩個人旅吓行

專題

E.A.Tips :

曝罟灣營地

元五墳 (南風灣) 營地

萬宜水庫西壩