大美督獨木舟+大尾督濱景租艇+龍尾灘

潛入神秘紅樹林隧道!獨木舟遊大美督闖馬屎洲連島沙堤 羊洲有羊群眺慈山寺觀音像 黃昏登龍尾灘觀夕陽賞夜景

盛夏即將來臨,又係時候準備去玩水啦!獨木舟、直立板、滑浪風帆等係近年愈來愈多人喜愛嘅水上活動,西貢係最熱門嘅落水去好處,其他地方則為次選或三選,事實上好多地方都係值得拍拖兩個人選擇,今次編輯帶大家到大埔大美督,以獨木舟安全暢遊大美督一帶,找尋神秘嘅紅樹林隧道打卡之餘,一邊登上漁排,另一邊亦登上一個又一個島,一個滿佈羊群,另一個則為擁最古老岩石嘅香港特別地區。

租艇位置﹕

由大埔墟乘搭巴士或小巴路線抵達大埔大美督巴士總站後,穿過一直封閉嘅大美督燒烤場,沿海旁嘅大美督路走,就可以見到一間又一間租借獨木舟嘅店舖。離大尾督水壩比較近嘅係大尾篤水上活動中心,係政府康文署旗下嘅地方,有租艇服務,甚至有導師教授。海邊選擇的確眾多,經編輯精挑細選之下,最終選擇一間靠近大美督二號碼頭、2019年開業至今嘅濱景租艇,價錢都算合理,店內亦有小食店,方便醫肚,只能夠講嘅係可以幫襯。

小店以一群年輕人打理,本來以租借天鵝形腳踏船、鴨仔形腳踏船、可愛貓咪、叮噹腳踏船為主,甚至水上單車等,1年前新增獨木舟設施,繼續提供租艇服務,各水上設施、划槳同救生衣都保養不俗。

大埔獨木舟起步點﹕

大美督位置本來就山明水秀、風光明媚,有如山水畫,加上交通方便,向來係進行戶外活動嘅熱門場地,位置正對馬鞍山,背靠八仙嶺,可眺望馬屎洲、馬料水、大帽山。由小碼頭前行至盡頭,就係船灣淡水湖大美督水壩,故此大美督係水陸兩得宜嘅好地方,平日前往就更為清靜,有遠離繁囂之感。

燈洲﹕

船灣淡水湖與馬鞍山之間有一個小島,名為燈洲,同樣位處赤門海峽,有如荒島,不過離馬屎洲有一段距離,如果要登島就必須較早時間出發,又或者放棄其餘景點,比較適合有足夠力氣之人,再有力氣可以划到對岸馬鞍山方向。據小店負責人指出,由小碼頭起步,大概1小時先會抵達燈洲,距離有約3.5公里。

汀角東海岸沙灘﹕

如果想走輕鬆啲路線,可以依循內海遊玩,從小碼頭起步向龍尾灘方向划過去,經過呢個上年6月先開放嘅人工泳灘,然後前行至相對鮮為人知嘅汀角東海岸沙灘,距離雖然唔遠,只有10分鐘獨木舟路程,但可以登岸作第一個休息點。沿途從獨木舟仰望,可以遠眺慈山寺巨型純白觀音像,上次近距離觀望,今次遠觀全球第二高嘅觀音像,的確仍然極有霸氣。

沙灘只為一個淺灘,雖離龍尾灘不遠,但人跡罕至,沙地與草地夾雜,岸邊更有紅樹林群及細小生物,例如蟹仔、海星,紅樹林則有指有助淨化海水,難怪岸邊海水都能夠清澈見底。據悉,位於汀角東嘅紅樹林,係一個被列為具特殊科學價值地點嘅地方,有相當高嘅生態價值。

紅樹林隧道﹕

繼續依循岸邊繼續划過去,大概10至15分鐘,沿途都係比較淺水,划個槳可以掂到海底,此後你就會發現一道神秘嘅紅樹林隧道就隱藏於汀角路旁邊!紅樹林生長狀況比汀角東岸邊嘅紅樹林更茂密、更壯觀,同樣係天然生態物種,陸路係唔可以步行而至,只有水路先可以前往紅樹林隧道,水漲時可以划獨木舟穿過去,即使水退時亦無相干,可以步行走入紅樹林當中。水退時,紅樹林比人還要高,畫面有如仙境,由小碼頭划槳而至,30分鐘內可以到達,絕對係安全影相好去處!

羊洲﹕

從汀角路岸邊再向海中心划過去,大概15至20分鐘就會到達羊洲,雖然羊洲登島地方唔多,僅有超細小嘅沙灘,但細心嘅你不難發現羊洲內滿佈羊群,單單一角已經可以眺望4至5隻小黑羊,煞是可愛!

漁排﹕

繼續划20分鐘之後,就可以到達漁排,一直處於大美督內海,海面較為平靜,該海域划槳相對安全,係一段適合獨木舟新手嘅路線。登上漁排可以稍作補給或休息,亦可以燒烤、食海鮮,瞄到人哋枱面嘅餐牌,海鮮價錢都頗高,食碗海鮮麵或海鮮飯可能會較化算,不過…編輯自己無打算食,幫襯與否就自行選擇。

馬屎洲連島沙洲﹕

經過漁排,10分鐘就可以到達馬屎洲連島沙洲,如果想直接從起步嘅小碼頭出發,大概30分鐘就會到達馬屎洲連島沙洲。馬屎洲係一個海陸相通嘅小島,既可以從陸路三門仔前往,亦可以划獨木舟到達,馬屎洲被劃出一道自然教育徑,早於1999年與附近嘅丫洲、羊洲、鹽田仔附近嘅烏浪頭構成馬屎洲特別地區,地質資源豐富,係一個香港自然護理區,亦係香港地質公園赤門景區。

馬屎洲小島內遍佈岩石,包括有沉積岩,當中更被指擁有本地僅存而最古老嘅岩石,有指可以追塑至侏羅紀時期,實在歷史悠久,保存住本地遠古時期嘅古老地貌。

折返大美督碼頭﹕

今次嘗試穿過連島沙洲,於外海返回水壩,沿途不時有快艇經過,令海浪增加,海面相對起伏不定,從馬屎洲連島沙洲返回大美督小碼頭,整體點對點需時大概45分鐘,始終都係內海比較風平浪靜,故此編輯認為大美督內海係獨木舟初學者嘅天堂。

龍尾灘﹕

回程時返回大美督水壩方向,風和日麗時亦可觀賞黃昏夕陽西下靚景,於海中心望向日落餘暉,比岸邊觀賞更目不暇給。折返小碼頭歸還獨木舟之後,唔代表行程就此結束,反正都要沖身,倒不如前往龍尾灘再迆多陣,既可游吓水,亦可於黃昏時份曬吓日光浴,Tanned Skin係最健康嘅膚色。

龍尾灘係上年6月先開放嘅人工泳灘,全長僅有約200米,由泥灘變沙灘,填海填足廿年,海面生物已幾近絕種,目前灘內係睇唔到海底有任何天然生物,沙灘上沙粒粗嚡,唔太舒服。最初水質由欠佳轉為極差,不斷採樣之下先改善至一般水平,泳灘開放時再改善至良好水平,但水質始終無隔離汀角紅樹林咁清澈。海面上唯一可取嘅地方,係可以觀賞黃昏夕陽餘暉,附近青山綠水,而沖身點之上有一個人工小木屋,最後可以夜景為大埔大美督一日遊作結。

E.A.Tips :

❶ 大美督濱景租艇為可支持同路人,唔好問點解,有咩Like us and PM us。

❷ 租借獨木舟位置為大尾篤村二號碼頭,靠近大尾督水壩。

❸ 獨木舟星期一至五租借時間為10:00至19:00,星期六及日則為09:00不19:00。

❹ 雙人獨木舟價錢為$300、單人獨木舟$200,另有小童獨木舟$100,但必須要有大人陪同。小店間中會有優惠,編輯當日為平日,6月享有半價優惠,價錢幾乎係全港最平。

❺ 除咗獨木舟,亦有直立板SUP、天鵝型同鴨仔型等船租借。

❻ 於大埔墟巴士總站乘搭75K或大埔墟小巴總站乘搭20C,於總站落車,都可以到達大美督水壩,沿穿過燒烤場向海旁大美督路走,就會到達租借獨木舟位置,而盧慈田站就靠近龍尾灘。

❼ 記得要提前至少一個工作天預約,避免出現爭拗。

❽ 預約留位之後,店方表示唔好退款,天氣問題則可改期一次。

❾ 小店有免費物品托管服務,可以將少量隨身物品放置士多Locker內。

❿ 小店有大人、小朋友嘅救生衣免費提供,都算乾淨企理,無論識唔識游水,都謹記要穿上救生衣。

⓫ 海邊有提供淡水水喉沖身,不過建議先沖走鹹水,然後徒步到龍尾灘再沖身及更衣。

⓬ 水上活動必須要量力而為,唔好逞英雄。

⓭ 回程時記得要預好充足時間,如果有需要,可以要求小店協助回程,但會收取$100起跳嘅費用。

⓮ 如果租借之後逾時歸還,店方會收取每半小時$50/隻嘅罰款,器材如有損壞亦需要賠償,所有價格寫明,透明度都算高。

⓯ 馬屎洲係香港地質公園赤門景區,謹記眼看手勿動,切勿帶走地質公園內嘅生物,既保持生態可持續性,同時以免觸犯法例。

⓰ 記得自己垃圾自己帶走,唔好遺留海洋及小島。

⓱ 建議盡量於內海撐獨木舟,外面海浪可能會較大。

⓲ 如果要登島或登漁排,記得要綁緊於特定位置,將獨木舟放上岸,以免被海浪沖走。

⓳ 如果要橫越連島沙洲,記得要抬起整隻獨木舟,唔好拖行,底部些微破爛而又無人發現到嘅話,隨時會連累下一個用家。

⓴ 夏天陽光猛烈,謹記要做足防曬措施,長袖衫褲會較適合,防曬手袖、帽係必備,有需要可再加上手套、太陽鏡。

❿ 最好穿著包腳鞋,鞋頭特別要有防撞物料,以免踢到尖石或蠔殼,防止受傷。

❿ 帶上隨身物品都要用防水袋,手機就記得要另外使用防水袋,以免入水,同時要鎖緊防水袋。

❿ 可以隨便登上漁排,至於食唔食海鮮就自行選擇。

❿ 除咗碼頭起步嘅士多,漁排、馬屎洲都可作補給點,汀九東海岸就要行返出馬路邊先有。

EATWO
Miss A

大尾督濱景租艇

大埔大尾篤村二號碼頭
6064 6611
編輯自選路線﹕大美督→龍尾灘→汀角東海岸→紅樹林隧道→羊洲→漁排→馬屎洲連島沙洲→大美督水壩

大美督水壩→龍尾灘﹕

龍尾灘
新界大埔區汀角路