長洲市中心隱藏3個全島碩果僅存懷舊T形街牌！殖民時代產物見證大半世紀疑缺乏保育？

對於殖民歷史，你又有幾多認知呢？如果有睇eatwo嘅讀者，應該會知道早年鑄造嘅皇冠郵筒係咩一回事，今次編輯唔講皇冠郵筒，講吓另一樣殖民時代產物，而且集中只講長洲島內嘅殖民時代產物，呢樣產物同皇冠郵筒一樣都係充滿價值嘅歷史遺跡，值得拍拖兩個人探索吓，答案係咩？答案就係T形街牌啦！

據了解，現時長洲島內只係淨返3個殖民時代懷舊T形街牌，絕對係碩果僅存，編輯行咗好幾次長洲，先搵齊島內3個T形街牌，皆因街牌位置的確係比較少資訊。搵到3個T形街牌之後，方才發現，原來3個僅餘嘅殖民時代T形街牌都係位於長洲市中心範圍內。香港主權移交後，曾有紀錄指當時仍有近200塊T形街牌，唔知到咗今時今日全港重淨返幾多塊呢？

新式嘅香港街牌，物料同舊式街牌截然不同，而寫法亦都千差萬別，而呢種舊式T形街牌嘅歷史可以追塑至19世紀，有逾百年歷史。新式街牌嘅街道中文名稱寫法一般係由左至右，英文亦如是，呈上中下英，多數呈長方形；反之，舊式T形街牌最特別係以T形設計，街道名寫法係上英下中，英文雖然係從左至右寫，但中文就係由右至左讀。

事實上，T形街牌係街頭文物之一，外框有30至50年代鑄造，凹凸字清晰可見，係瓷製獨立字粒，目前非常罕見嘅金屬街牌，而呢種金屬街牌最大優點就係保養期較長。T形街牌一直見證住香港歷史變遷，不過近年買少見少，一直以來都少見社會對舊式T形街牌嘅關注，而且唔多見有對T形街牌嘅保育工作。至於長洲島內嘅T形街牌有3個，包括學校道、中興街、大新街，3個都位處市中心範圍內，3個街牌似乎都各有特色。

學校道街牌

首先前往長洲學校道街牌，街牌位處滿佈長洲中學嘅「學校道」，靠近長洲官方中學，呢個「學校道」街牌係位於中華便以利會長洲堂嘅牆身，係最隱藏嘅一個，因為同牆身用色一致，真係如同保護色。「T」形下面係兩個燈箱，係長洲島內3個街牌中最難以相信係金屬街牌嘅一個。

中興街街牌

第二個係位於長洲中興後街1號A嘅「中興街」街牌，步入中興後街，以長洲中興街街坊值理會會址為地標，就會輕易見到樓上有一個T形街牌。「中興街」街牌款式同「學校道」基本一致，但就比較明顯係黑框白底嘅典型金屬製T形街牌。細心啲留意吓，「中興街」街牌望落明顯比較簇新，到底係味真係舊式街牌，定係保養過而變得新簇呢？

大新街街牌

最後一個係最少人會留意到嘅長洲T形街牌，呢個「大新街」街牌位置隱蔽，位置靠近民居，但只要以長洲洪聖廟為地標，從左邊路口離開長洲洪聖廟，「大新街」街牌就呈現眼前。「大新街」街牌係3個街牌當中最殘舊，恍如全無保育或保養，只係任由街牌褪色或生鏽，甚至被燻黑，街牌一年比一年衰老，舊事物能夠逃過被拆毀嘅宿命嗎？