油麻地人氣台灣牛肉麵Cut淨一間蕃茄濃湯點睛之筆係咩？

台灣美食有好多，隨便一款都能夠俘虜香港人，令本地台灣菜餐廳愈開愈多，荔枝角程班長結業之後，到底重有邊間台灣食店可以拍拖兩個人去支持呢？油麻地近麥花臣館就有一間幾有人氣嘅台灣菜餐廳阿木台灣麵，今年4月執淨一間，旺角店已經結業，現時只係淨返油麻地店，同埋一間雜貨店。

呢間阿木台灣麵一度被網民大力推舉，相當有人氣，甚至風靡旺角人，開業後不時大排長龍，只不過今年執淨豉油街一間分店，室內都係典型木系設計，外面有大型貨物架，擺滿相關雜貨，貌似裝飾。據稱，小店背後有一對夫妻經營，老婆為台灣人，都算係炮製地道台灣菜嘅小店，CP值應該唔低。

招牌之作應該係紅燒牛肉麵$70，湯底唔簡單，牛味濃郁，清澈而不濁，唔會好鹹，原汁原味，有牛骨等燉煮24小時嘅湯底係特別香濃，似乎重有啲藥材味，另外滲出鮮甜味，似乎湯底除咗有肉同骨熬煮，可能重有菜類，湯底有紅燒味，比較甘甜，但香辣度好低，而無乜油份嘅湯係比較考功夫。而麵條爽滑有嚼勁，唔會變成糊狀，唔算太掛湯，但就有煙韌感，加添蔥花等配料可作點綴，至於牛肉係牛𦟌肉，有3舊，亦算大塊同厚切，肉質軟腍，唔會好韌同黐牙，筋膜一職層分隔肉層，質感略有黏稠。

蕃茄牛肉牛筋麵$74 分別在於湯底加入蕃茄濃湯，除咗2舊牛鍵，亦有3舊牛筋，編輯覺得牛筋比牛肉更出色，而且入味，牛筋唔會變得軟爛，質感軟綿而有彈性，但唔會難以嘴嚼，腍身得入口即化，感覺充滿骨膠原。蕃茄濃湯內既有煲得軟爛嘅蕃茄，亦有大量酸菜，酸菜就咁食較淡，而酸菜鹹度、酸度滲入湯底又似乎調得剛好，令本來嘅牛骨湯頭帶有酸甜味，酸菜係湯底嘅點睛之筆。湯底相對普通紅燒牛肉麵較帶有香辣味，不過辣味唔高，而且唔會嗆鼻癢喉，一啖入感覺比招牌紅燒湯底更出色。

其他台灣小食如鹽酥雞、甜不辣、肉鬆蛋餅、梅子地瓜條、鹽酥肉、台灣小香腸、古早味炸排骨、拌麵、肉燥飯應有盡有，套餐飲品亦有半價，冬瓜茶$22 不過不失，質感清爽，唔算太甜，可以入口。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 阿木台灣生活百貨位於旺角白布街8號地舖。

❷ 小店歡迎自備食物盒同袋，外賣盒、杯、膠袋需要另外收費，湯碗加$2，膠袋加$1，紙巾$3。

❸ 下午茶餐會比較抵食。

❹ 麵條可以加$3轉手工關廟粗麵，或加$3轉新竹米粉。

❺ 午市套餐供應時間為星期一至五11:30-16:00，下午茶餐供應時間為星期一至五14:30PM-17:30。

❻ 以拎得LINGDUCK外賣平台預先落單會比較方便，節省等候時間，亦可以有優惠。

❼ 單據上買滿指定價錢，原來憑單到另外店舖消費有折扣優惠。