上水Homy Cafe 9月尾結業咖哩雞扒香口惹味上水千萬公廁旁小公園野餐

近年，香港城市變化愈來愈大，食肆開一間又執一間，唔少都寧願選擇結業，一係經營不善，一係移民。最近編輯又發現一間於上水開業5年嘅小店，表示只做到9月尾，門口寫明「再見上水」，並無標示結業原因，只係提到「老細唔撈啦」、「經歷上水嘅變化同善忘」，所以先決定於月底結業，想拍拖兩個人最後前往試吓就要趁最後幾日去食啦！

位於上水嘅Homy Cafe，開業約5年，室內外以工業風設計，門口廣告已標明店內係主打漢堡，例如係芝士漢堡、烤焗蘑菇漢堡、牛肉漢堡、千島菠蘿芝士豬肉漢堡。但其實除咗漢堡，都有其他好選擇，例如係意粉、燴飯。

Homy Set Lunch有8款，今次就揀其中2款，份量適中，包含西西里風蒜香海鮮意粉$72，意粉軟硬度適中，至少外賣唔會變成一餅嘢。意粉帶有辛辣味，辣味係同蒜味一齊層層滲出，係幾香口惹味，反而有啲似泰式。意粉以菇菌伴碟，加上3隻蝦肉，並非大隻，質感亦算彈牙。

另一款則為香草烤雞扒飯伴自家椰香咖哩$78，係一款幾有驚喜嘅菜式，雞扒大塊，打開紙盒蓋馬上傳來陣陣香味，非常香口，雞扒煎成金黃色，肉質軟腍，唔會乾身。白飯屬珍珠米，粒粒分明，煙韌有咬口，伴有少量沙律菜，但真係少量。更特別之處係伴有一份咖哩汁，咖哩味同樣香濃，但並非有辛辣感，反而帶有幾分甜意，咖哩汁用嚟撈飯一流！

每份套餐都包括有檸茶或檸水，凍飲加$3，茶底有濃郁茶味，茶味同檸檬味無被冰度蓋過，茶味未有轉淡。

有留意eatwo嘅讀者應該會記得呢個野餐點，上次編輯已經到上水花園第一號野餐，貪佢有枱有櫈，離食肆點不遠。更特別之處，係公園有一個造價近千萬嘅公廁，你想唔想睇吓呢個「千萬金廁」係用咩堆砌呢？

事實上，上水花園第一號只係一個普通公園內嘅公廁，同樣只係包含男女廁、殘廁，廁所內籠亦同平常嘅公廁無異，最貴可能係紅外線感應水龍頭，但呢個小公園面積不大，單單一個蚊型公廁嘅造價居然高達962萬？

據悉，公廁本身只係估價624萬，後來工程超支，結果變成962萬，加上每年清潔、維修等費用，開支逾42萬。而最奇怪嘅地方係，顧問費竟然都可以超支，由90萬上升至167萬，到底哪個顧問有需要超支呢？附近真係無公廁？呢個公廁其實會唔會多「廁」一舉呢？

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 凍飲加$3，其他特飲半價。

❷ 星期一至五午市套餐可升級是日特飲，供應時間為12:00至14:00。

❸ 堂食40分鐘內結賬可獲9折。

❹ 繁忙時段用餐時間限時60分鐘。

❺每人最低消費為$70。

❻ 每份外賣加$3。

❼ 每個星期有Monthly Happy Friday，時間為11:30-02:00。

EATWO

Miss A