油麻地廣東道2間茶餐廳推介！永發電影取景地推姜濤餐合發翻新置壁畫引《孤星淚》對白本土味濃

油麻地廣東道係一道頗長嘅街道，當中靠近旺角方向就有兩間字面相近嘅茶餐廳，一間屹立幾十年，最近因成為電影取景地而蛻變追星應援地，另一間則於上年尾翻新完畢，細心置有精緻壁畫，更援引《孤星淚》對白，本土味甚濃，兩間都係值得拍拖兩個人前往一試嘅茶記。

（1）永發茶餐廳

呢間茶記係近期上畫嘅電影《阿媽有咗第二個》拍攝場地，電影為彭秀慧執導、編劇，以男團Mirror成員姜濤及柳應廷主演，故唔少Fans都專程朝聖戲內取景嘅地方，拉近與偶像嘅距離，甚至經店舖同意於餐廳內貼上大量應援物。

以電影故事大鋼嚟睇，姜濤於電影內係飾演茶餐廳茶水部員工，所以Fans亦將茶餐廳變成應援地。編輯亦前往現場查看，發現永發近期亦趁機推出特製嘅「姜濤餐」，門口大排長龍，一眾「姜糖」等候入內朝聖打卡。

舊式茶記的確充滿港式味道，不過，呢間茶餐廳開業有20幾年，牆身為綠色紙皮石，大門口有個麵包櫃，櫃內又有舊式嘅黑白淡奶杯，老式茶餐廳嘅歷史痕跡亦難以隱藏。

而最深刻嘅應該是加$3嘅凍奶茶，有記憶嘅你應該會記得2014年之事，而呢間隱藏版茶記更不時舉辦地下音樂活動，顯現茶記都可以有Livehouse。呢杯奶茶頂端有碎冰，茶色望落稍淡，但奶味甚濃，質感絲滑，茶膽亦濃，慢慢有啖啖甘甘哋紅茶味，甜度唔高，並無苦澀味，碎冰溶化後仍然有奶茶香。

除咗招牌陳皮鴨腿湯飯、焗豬扒飯、蛋治值得一試，炸雞髀$27亦都係茶記經典小食，下午茶配沙律或薯條$34。炸雞髀未至於特別出色，但就夠晒大隻，而且係傳統生炸雞髀嘅炸法，表皮脆口，但唔會好油膩，完全係舊時生炸感覺，只係有啲畫蛇添足，表皮加咗少少淮鹽，其實係無需要。雞髀肉質相對比較遜色，唔夠嫩滑，厚肉位置更有啲韌，未有外脆內嫩嘅口感。

甫踏入小店內，會發現當日幾乎全場都點選差唔多嘅食物，老闆告知好多人都點「姜濤餐」$47，餐中包含3款小食，有椒鹽炸燒賣、蛋撻、西多士，大多數人都係為姜濤而嚟，不過編輯者時無機會入戲院睇戲，未知劇情，到底係姜濤角色鍾意食呢個餐，定姜濤角色推介食呢個餐呢？

椒鹽炸燒賣炸得香脆，不過椒鹽太多，入口比較鹹；蛋撻表皮為傳統酥皮，唔係牛油皮，酥脆可口，蛋漿相比坊間嘅係偏黃，有蛋香，但比較薄身；至於西多士則炸成金黃色，麵包切成4個三角形，內餡含有花生醬料，表面有少少牛油，比較乾身。

（２）合發茶餐廳

離永發茶餐廳不遠嘅係合發茶餐廳，同樣位處油麻地廣東道，本來開業有約40年，比永發其實更舊，上年中至尾先翻新重開，以木屋設計，變成新式茶餐廳，唔知情嘅人可能以為佢只係一間新開業嘅茶記。

早前小店指會拆除店內壁畫，但甫踏入室內，現時仍然有一幅逾10米嘅超大壁畫映入眼簾，壁畫以獅子山為背景，設計獨特，本土味濃，甚至引用法國文學家雨果（Victor Hugo）作品《孤星淚》對白「For the wretched of the earth, there is a flame that never dies. Even the darkest night will end, and the sun will rise.」，全句意思係「悲慘之世，焰猶不絕。黑夜再黑，終有終結，黎明將至」，寄語港人勿忘初心。