Peek-A-Poke+維多利亞公園

【野餐隨行】銅鑼灣小巷清爽夏威夷魚生飯Poke Bowl 維多利亞公園大草地歎異國風沙律飯盒

Poke Bowl係一款近年逐漸於香港流行嘅菜式,簡單啲講就係夏威夷蓋飯,每份如同魚生飯,就似一盒沙律飯盒,屬於健康輕食,對於想拍拖兩個人食得輕型嘅你,應該要試一試。銅鑼灣小巷內就有一間主打Poke Bowl嘅小店,於上年中旬開業,既有5款指定Poke Bowl款式,亦有自選材料Poke Bowl可擇,到底Poke Bowl入面有咩呢?

事實上,Poke Bowl本身來自美國,係一種夏威夷州嘅清涼菜式,以前當地土著漁民以生魚切成細細粒,再於米飯上添加醬汁醃漬,即係夏威夷魚生飯,而夏威夷受唔少日本人移民影響,加入吞拿魚、三文魚並非最正宗做法,只係受日本文化影響,變成Poke Bowl受歡迎食材,故Poke Bowl亦有日本料理嘅影子。

本身Poke Bowl主要魚類為八爪魚、小珊瑚魚、鮪魚,最早期用嘅就係小珊瑚魚,傳到美國西岸之後再加上三文魚。Poke Bowl內有唔同佐料及醬汁調味,例如係海鹽、醬油、蔥花、甜洋蔥、海藻、辣椒、香油、柚子醋、毛豆、日式海藻等,可以任意配搭專屬配料,而銅鑼灣小店嘅主要魚生食材就係吞拿魚、三文魚、八爪魚,配料亦令人花多眼亂。

而「Poke」並非正常英語,而係夏威夷語,所以讀音唔係英文拼音,正確讀音其實係「Poh-keh」,有切成小塊嘅意思。銅鑼灣小店室內亦貫徹夏威夷海邊風格,牆身有船槳、繩網,再配搭綠葉、麻繩,有少少夏威夷嘅陽光與海灘感覺。

如果有留意eatwo嘅讀者,應該記得前往銅鑼灣嘅食肆之後,最好嘅野餐點就係維多利亞公園。維園本身係全港第二大嘅公園,於1957年開放,係以往一直係集會重要場地,但現時只能跟「姐姐」在草地野餐。維園之所以叫維園,係因為叫維多利亞公園,內有一個出自意大利雕塑家作品的維多利亞女皇銅像,有逾2米高,銅像係女皇於1897年登基時鑄造,一度經歷日治及二戰時期,銅像幾乎被熔化為軍事武器,最終被擺放於維園門口。

銅鑼灣「Peek-A-Poke」就有5款指定菜式,包括Poh-Keh夏威夷風味、California加州風味、Ahi-San丫嘻先生先生風味、The Vegan香菇素菜風味、Go Green輕型之選風味,每款Regular$78至$98,材料主要有吞拿魚、三文魚、八爪魚、雜錦香菇,亦有自選菜式。

其中,加州風味$98 包括有刺身三文魚、青瓜、雞蛋絲、三文魚子、果仁芝麻醬;至於丫嘻先生風味$88 包括有刺身吞拿魚、枝豆仁、青蔥、香菇、山葵乳酪醬,外賣極速完成,兩款飯盒賣相精緻,色彩繽紛,甚為吸引。

前者加添三文魚子令整體增添口感層次,芝麻醬撈飯再配沙律菜,伴有青瓜粒則一抺清爽氣息,鮮黃雞蛋絲為粒粒橙紅色調嘅三文魚點綴,紅黃綠色澤搶眼;後者以吞拿魚伴隨枝豆粒、香菇粒、蔥花、木魚絲,配料用色沉實,令紅潤嘅吞拿魚肉更明顯,更特別之處係山葵乳酪醬,採用嘅山葵並非一般Wasabi,質感唔稀身,亦唔係濃稠狀態,入口唔係辛辣刺激,辣味較淡身,而且辣中帶有些微甜味,似乎係混合Mayonnaise之後嘅火花,反而產生啖啖風雅感。

每份皆可選壽司飯、糙米飯、沙律菜混搭為基底,壽司飯比較普通,但就相對軟熟,而糙米飯較特別,但就比較硬身同乾爽。一盒飯盒足以飽肚,既屬低卡、亦係低脂,切合新世代清新飯盒嘅選擇。

一般$28至$38有梳打、奶昔等飲品,另有2枝Spain出品,一款係芒果熱情果人蔘果汁,另一款則為蘋果青瓜菠菜果汁,前者帶有果香甜味,後者則散發啖啖酸爽。

E.A.Tips :

❶ 店舖滿$200先可使用八達通付款,否則要現金支付。

❷ 供應時間14:30至17:30有得平啲,$58至$68有Mini Size,

❸ 希雲街內多間餐廳都為同路人。

❹ 另加配料每款加$6至$10。

EATWO
Miss A
Peek-A-Poke

Peek-A-Poke

銅鑼灣希雲街16號地舖
12:00 – 21:00
5595 7729

維多利亞公園

銅鑼灣興發街1號
24hours
2890 5824