跑馬地豪宅地帶舊街牌保養良好 10個T形街牌放題任睇任影

T形街牌係英國殖民時代嘅文化產物之一，隨住疑似「去殖」問題，本地僅存嘅舊式街牌更加愈趨罕見，想拍拖兩個人找尋T形街牌，通常會失望而回。皆因九龍區嘅舊街牌一般已經被拆除，但港島區嘅舊街牌則仍然保留下來，今次編輯以跑馬地為例，10個T形街牌全部仍舊屹立不搖，而且保養良好，即使大廈大堂裝修過，外牆上嘅舊街牌都十分簇新。

好少人會刻意對T形街牌行注目禮，以編輯所見，除咗拎住兩隻嘢影舊街牌被人行注目禮外，基本上十居其九都唔會對舊街牌看上一眼。但其實舊式街牌係值得深入研究。

（1）箕璉坊 GREEN LANE

編輯從跑馬地下行至銅鑼灣方向，首個T形街牌係「箕璉坊」，經箕璉坊配水庫休憩處，下行樓梯就會見到有幾個風格截然不同嘅街牌，當中歷史最悠久嘅係T形街牌。

T形街牌位處箕璉坊20號與比雅道15號交界，舊街牌置於現時住宅「潔園」嘅牆壁上，大廈英文為「Santarian Apartments」。新街牌嘅中英文皆由左至右讀，而T形街牌嘅中文係由右至左讀，而再行過啲會發現另一個年代係新舊街牌之間嘅方形街牌，中文字同樣係右至左讀，但旁邊就多咗「20至30」，標示街道號碼。

（2）蟠龍道 BROOM ROAD

第二個跑馬地T形街牌為「蟠龍道」，實際位置係蟠龍道16至20號，置於係住宅牆壁上，毗鄰蟠龍道變電站。

街牌正對蟠龍道盡頭蟠廬，中段會經過安廬、箕璉坊路口，箕璉坊與蟠龍道交界可見跑馬地上巴士總站，向東行為藍塘道，而向西行先係蟠龍道。

（3）藍塘道 BLUE POOL RD

第三個街牌只需折返「箕璉坊」方向，依循比雅道走到另一端盡頭，就會見到「藍塘道」T形街牌，位置毗鄰瑪利曼中學，街牌處於藍塘道117號，即係藍塘苑一角牆壁上。

藍塘道本身係跑馬地一道上行道路，有約1.5公里，連接成和道、大坑道，可前往黃泥涌道。藍塘道源自於舊時黃泥涌一帶嘅天然湖泊，故稱為「藍塘」，水源澄澈，第一次世界大戰時更有人作沐浴用途，水源基本來自黃泥涌峽，可流出維多利亞港。

目前，藍塘道一帶已成中低密度豪宅區，樓宇單位伙數唔多，私隱度高，人流唔算密集，環境仍屬清幽寧靜，故唔少名人及富豪都擇居此處，但藍塘道舊街牌附近則以學校為主。

（4）冬青道 HOLLY ROAD

走完3個跑馬地頂端嘅T形街牌，就可以向下行，第四個T形街牌就係「冬青道」。而冬青道舊街牌位處藍塘別墅入口牆壁上，位置係跑馬地冬青道10號，正對弼廬、小巴總站。

冬青道嘅豪宅以老牌豪宅居多，密度較低，大多雖然有40至50年樓齡，但外牆保養好，無太大修葺，反而帶有陣陣古樸氣息。一幢幢老牌豪宅外牆雖然無特別裝修改造，但內部則為新裝修，而舊街牌依舊簇新。

冬青道名稱本身係來自植物，係連接藍塘道嘅一道內街，位置屬「上跑馬地」，好處係地勢高而環境清靜。

（5）荷塘道 HAWTHORN RD

走向「冬青道」另一端盡頭，會到達「荷塘道」，於轉角位會發現另一個T形街牌。該舊街牌位於寶血幼稚園對出牆壁之上，靠近運輸署跑馬地駕駛考試中心，故不時有學神走過。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

（6）梅馨街 MUI HING ST

繼續向下行，再前往「梅馨街」，會發現最有古色感覺嘅T形街牌，與大廈相呼應，街牌毫無違和感，以整個空間配套嚟講，甚至可以稱得上係打卡位！

梅馨街一端為山光道公園，入口為轉角嘅春勝街，公園林蔭處處，環境舒適，多為狗公園用途，而另一端可以轉返出桂芳街、成和道。舊街牌位處跑馬地梅馨街5至7號、複合大樓祥苑一角牆壁上，隔壁係車房，而街牌嘅大廈相當古舊，同T形街牌毫無違和感，的確係好Match！

（7）山光道 SHAN KWONG RD

要前往「山光道」T形街牌，可以經過剛才嘅「狗公園」山光道公園，又或者經正路走，於跑馬地郵政局轉入聚文街，盡頭位置就係聚文街與山光道分岔路口，而舊街牌就位於轉角處。

山光道係港島跑馬地區最長嘅街道三甲之一，僅次於第2長嘅成和道，全長有約590米，整道山光道靜中帶旺，未有太繁華熱鬧，但又離市區不遠，同時連接多條主要街道，十分方便。港島只有跑馬地馬場，而山光道設有馬房，亦有香港賽馬會跑馬地會所。

簡單啲講，「山光道」T形街牌位處寶覺小學牆壁之上，呢座小學於1935年創辦，故屬戰前建築物，舊街牌亦於當時建設，而該小學早已被列為香港一級歷史建築。

值得一提嘅係，「山光道」嘅T形街牌並非只有一個，另一個舊街牌位於跑馬地山光道7A號，即係崇德大廈騎樓上，樓下為超藝地産，即係山光道與山村道交界。另外，同樣位於山光道嘅豪宅「Resiglow」亦特別設計咗2個偽T形街牌，編輯覺得設計別緻，仿真度頗高，連舊式生鏽感都有。

▼ 有新落成建築物以仿T型街牌做該標誌，相對其他仿制品，此牌制作質素算高

（8）綿發街 MIN FAT STREET

再向下行，於成和道轉入綿發街，會同一時間發現2個T形街牌，2個位置接近，其中一個係綿發街16號，目前樓下係一間女性飾物店。

整幢大廈係一幢複合大樓，名為怡發大廈，轉角則為協和里。跑馬地係好早開發嘅地區，別名為「快活谷」，即係「Happy Valley」。

（9）協和里 HIP WO LANE

跑馬地區內尾二一個T形街牌就係毗連綿發街嘅協和里，未到達協和里，T形街牌已經映入眼簾。協和里只係一道巷弄，街牌旁邊為香港賽馬會馬伕宿舍。

更值得留意嘅係，此街道的確係曾經歷戰時情況，皆因舊街牌嘅另一端為協和里防空洞！你大概無估到呢個街道盡頭一個毫不顯眼嘅建築物，竟然隱藏咗一個二戰防空洞。據了解，協和里防空洞約有5條街咁長，約945米，有指防空洞內空間偌大，能夠容納747客機，入口就位處協和里，只不過目前已經封閉，未能進入。

如果以現時情況去觀察，街牌隔離有道坑渠，然後就係一個石屎牆，旁邊有大樹，下方本來有個小窗口，正正係防空洞入口，估計大概布2乘2米。呢個防空洞建於1940年代，係防空隧道，通常建於小山之下，出入口眾多，當日軍空襲時，可以用作俾平民躲藏之處。

（10）成和道 SING WOO RD

折返成和道，步行至最下方，離跑馬地電車站不遠之處，會發現最後一個跑馬地T形街牌。舊街牌位處跑馬地成和道1A號至1C號，抬頭可見香海正覺蓮社，呢幢戰前建築物為愉園大廈。

成和道本身長約800米，連接藍塘道、山光道，亦可到達多條主要小街道，靠近銅鑼灣方向，不出10分鐘就能夠步行至銅鑼灣。

簡單嚟講，T形街牌同新式街牌最大分別就係形狀，前者通常位於戰前建築物牆壁之上，甚至係單幢式樓宇，以T形設計，有別於新街牌嘅長方形設計。呢種舊式街牌係以金屬鑄造，基本同皇冠郵筒一樣，都係經歷百年都一樣簇新、堅固。街牌以白底黑字為主，鐵造框架加上鑲嵌於街牌上嘅瓷製字粒，字粒凸出，每一個舊街牌凹凸感明顯

維多利亞城係隨住香港1841年開埠而形成，為英國殖民時代，而舊式T形街牌就係呢段時間嘅文化產物。以跑馬地區內為例，大家不難同時發現舊街牌同新街牌嘅存在，兩者更大分別係新街牌中英文都係由左至右讀，而且係以上中下英方式呈現，字體如黑體之類電腦字；而舊街牌則以上英下中方式呈現，只有英文係由左至右讀，中文就係由右至左讀，字體獨特。

E.A.Tips :

❶ T形街牌為歷史痕跡，切勿破壞。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023