太子名物爆餡沙嗲牛肉包/西多士！逾40年港式快餐店親民小食唯獨炸髀扣分

本地港式快餐曾經係香港人鍾意嘅小食，不單平價，而且快捷又方便，經濟起飛後香港人食慣貴嘢，少食平嘢，到今時今日經濟變差，香港準備變返條漁村，繼兩餸飯興起，呢種平價港式快餐店其實都有條件變返香港人嘅飯堂。今次編輯本來想搵炸雞髀店，就到太子一間巷弄港式快餐店，卻發現另一種小食先係太子名物。

位於大埔道一角嘅利口福快餐店，裝潢頗舊，已經屹立良久，有超過40年歷史，不時有街坊到小店醫吓肚。店內以港式快餐為主，包括各款港式小食，亦有飯麵可擇，雖然只係巷子之間，並無冷氣供應，但價錢相宜。

本來想搵炸雞髀店，於是先點選炸雞髀拼西多士$42、炸雞髀拼薯條$40，皆為套餐價，凍檸茶由紙杯到入口，都有傳統港式風味，不過檸茶就偏甜；另外重有加$5支裝汽水提供。至於炸雞髀，其實都幾失望，因為雞髀帶有黏性，並非生炸雞髀，而係先灼熟後炸，欠缺傳統生炸嘅脆口。不過，炸薯仔的確係舊式嘅粗薯條，而且有坑紋，都係香脆可口。

縱然有失望，卻仍然有希望，原來呢間港式小食店主要賣點並非炸雞髀，反而係沙嗲牛肉包及沙嗲牛肉西多士，還有流心芝士豬扒包，其中珍寶沙嗲牛肉包$35、流心芝士豬包$35、沙嗲牛肉西多士$30，邪惡滿分。

西多士係傳統港式冰室嘅小食，多數餐廳都會採用花生醬作餡，再加上糖漿；而利口福快餐店嘅西多士同樣以花生醬作餡，但糖漿卻採用帶有蜜糖味嘅糖漿，而且係有香甜蜂蜜味，配合充滿蛋香嘅金黃麵包同花生醬，鹹甜交織。

而沙嗲牛肉包原來係店內嘅招牌貨，人氣十足，絕對係太子名物！一舊熱狗包內塞滿沙嗲牛肉餡料，香濃沙嗲味飄散，牛肉配上洋蔥都係黃金組合，麵包軟熟，醬汁濃郁，吸盡沙嗲汁精華。牛肉肉質軟腍而唔韌，入口似食緊沙嗲牛肉通粉，但又有鐵板炒洋蔥牛肉嘅惹味。而另一款人氣之作係沙嗲牛肉配搭西多士，雖然未有嘗試，但相信都係兩者交疊係非常有新鮮感。