【食肆牌VS食堂牌】香港開餐廳需過五關斬六將費用要XX萬台灣僅需商業登記創業更容易？｜附工廈地契條款、發牌流程及細節

香港開餐廳唔容易，必須過五關、斬六將，除咗商業登記、水電煤、排污費、保險，申請牌照眾多，包括煮食牌照、衛生牌照、消防牌照，過程繁複，牌照費用更高昂！相反，台灣開餐廳手續較簡單，一查之下，原來主要只係商業登記，更方便一般人創業。另外，食肆牌、食堂牌又有咩分別？即睇香港及台灣開餐廳流程，以及所需牌照與費用！

觀塘駱駝漆大廈第三座內嘅工廈美食點運作有逾10年，一直係港人自發嘅「香港夜市」及「夜經濟」，吸引唔少人拍拖兩個人去工廈行街搵食。最近多間工廈食堂卻陸續被地政總署指違契經營，並以1967年舊有工廈條例執法，為殺一間食堂，結果焗住殺晒所有工廈食堂，所造成嘅影響隨時大得難以想像。

光榮米線被逼停業

第一間被指違契嘅係開業不足一年嘅「光榮米線」，近日被地政總署違契經營，必須於限期內停止違契用途。該餐廳同大廈內大部份食堂一樣，都已申領臨時食物製造廠牌照或食物製造廠牌照，但點解只針對一間呢？

據食物環境衛生署官方網站顯示，駱駝漆大廈3座內持工廠食堂牌照只有2間，姑勿論非工廠食堂牌照嘅食堂是否違法，其實目前持有工廠食堂牌照嘅2間食堂一樣違法，到底點解？容後再講。編輯日前由1樓行到12樓，眼見雖然有部份食堂已落閘或聲稱休息中，但仍有唔少食堂開門做生意，唔少食堂仍歡迎食客堂食，難道只係選擇性執法？

工廈地契知多啲

至今多數工廈都有地契，而工廈地契亦大多會標明物業或土地用途，例如係倉庫或工業用途等。如果業主或租戶想改用途，比如係辦公室、美容、零售、Party Room或健身室等，呢啲多數涉及商店及服務業，均需要向地政總署預先申報，並申請「短期地契豁免書」及繳交相關費用。否則地政總署一旦突然活躍執法，就會控告單位業主、租客違契，同時業主或租客須於28天內馬上回復單位地契標明嘅工業用途。若情況持續，有關當局就會直接援引《政府土地權（重收及轉歸補救）條例》，即俗稱「釘契」，轉歸政府所有。

雖然以2019年訂立新措施顯示，直到2024年1月底，工廈業主都可以直接申請「短期地契豁免書」，而且無需要繳改任何費用及行政費，並已放寬非工業用途，包括五類特定的非工業用途，例如「研究所、設計及發展中心」。不過，聽聞成功申請「短期地契豁免書」及獲批亦唔容易，通常寫字樓機會係會比較高，皆因人流客量並唔多。

香港開餐廳﹕流程及所需牌照

於香港開餐廳創業唔容易，過程繁複，除咗要預先為公司註冊及成立公司戶口，為店舖選取合適地址及擬定裝修設計圖，亦需要向有關政府部門申領牌照。唔單止要申請飲食牌照，與相關部門溝通，而且要經過食物環境衛生署及消防署等許可，等待各部門實地視察。

解決各部門提出嘅問題之後，再等對方進行實地驗收，先會處理申請文件。然後申領暫准牌照，取得各煮食牌照、衛生牌照、消防牌照。及後過五關、斬六將，先可以獲簽發正式牌照，需時至少3個月。

一間餐廳需要嘅牌照眾多，每一個牌照都需要繳交相關費用，包括煮食牌照、衛生牌照及消防牌照等。一般餐廳飲食牌照不外乎係普通食肆牌照、小食食肆牌照，食物製造廠牌照、綜合食物店牌照、工廠食堂牌照等。

食肆牌 VS 食堂牌

平常坊間餐廳都係持有食肆牌，而工廈範圍內嘅餐廳則持有食堂牌，至於食肆牌與食堂牌有咩分別？食肆牌又有幾多種？今次一次過為大家解答。

最直接嘅食肆牌係「普通食肆牌照」，俗稱「大牌」。凡持有「大牌」者，都可以自由烹調及售賣任何種類嘅食物，包括新鮮食物。坊間中式酒樓、酒店餐廳、西餐廳、火鍋店、日韓泰餐廳、茶餐廳、酒吧、中菜館等都係持有「大牌」。所以上述餐廳都係可以堂食，但規定要有洗手間，而廚房、清潔及煮食範圍需要係樓面嘅10%至25%，成本較高。

另一種常見嘅食肆牌係「小食食肆牌照」，俗稱「細牌」。凡持有「細牌」者，同「大牌」一樣，容許堂食，但就唔可以用新鮮食材，只可以提供官方「⼩⻝⻝肆獲准烹製及售賣的⻝物⼀覽表」裏面預先製作嘅食物，同時只可以製作其中一類食物，飯類亦唔得，種類受到限制。通常城間嘅雲吞麫店、粥品店、咖啡店、甜品店、蠔吧都係取「細牌」。而舖頭都規定要有洗手間，煮食、清潔地方亦需要係樓面嘅10%至20%，同時唔可以使用大型烤焗爐。

第三種亦頗常見嘅食肆牌係「食品製造廠牌照」，亦即係食品加工牌，可配製食物，於加工廠以外地方進食，食物類別並無限制。一般嚟講，呢種牌照都係適用於製造罐裝食物、調味料、醃製食品等，又或者係經燒烤嘅食物、甜點、小食、麵條等。呢種牌照屬食物製造廠，唔可以堂食，只可以售賣外賣熟食或快餐，食物室要有最少6平方米空間，至於售賣煮食食物嘅食物室就要有3.5平方米空間，成本較「大牌」及「細牌」低。同上述兩個食肆牌照分別在於唔可以處於註冊學校、幼兒中心下層或地庫第四層以下，以免造成火警消防安全問題。另外，如果係一啲公開活動臨時攤位需要售賣預先煮熟嘅熟食，則要申領「臨時食物製造廠牌照」，有效期為7天。

另外一種涉及出售食物嘅牌照係「綜合食物店牌照」，呢個牌照可以售賣各種簡單而即食嘅食物，並無複雜製作過程，比如係沙律、三文治、壽司、刺身等，但就唔可以係涼茶、軟雪糕或生蠔等食物。呢種牌照需要有攝氏低於10度嘅雪櫃，若部份要處理嘅食物，需要同零售部份以玻璃分隔。

其他牌照重有「受限制食物售賣許可證 — 網上售賣受限制食物」、「烘製麵包餅食店牌照」、「冰凍甜點製造廠牌照」、「凍房牌照」、「酒牌」等，如果涉及多種類別嘅食肆，有機會要申領多於一個牌照。

至於「工廠食堂牌照」，雖然可以做堂食客人，但就同「食肆牌」完全唔同，因為凡持有呢種「食堂牌」，即代表於工廠大廈範圍內經營，只可以招待於該幢工廈內工作嘅員工。故此，剛才提到觀塘駱駝漆大廈第三座雖然有2間持「工廠食堂牌照」嘅食堂，但嚴格嚟講2間都係唔可以招待街外客人，所以一樣有機會違法。

「食堂牌」嘅餐廳規定廚房、製作食物、清潔地方亦要係樓面嘅10%至14%，同時需要有洗手間，只能提供非樽裝無酒精飲品。另外，食堂門口或當眼處必須要清楚以中文及英文標明明工廠食堂「只准本大廈之工廠員工使用」（FACTORY EMPLOYEES OF THIS BUILDING ONLY）。

至於申領「工廠食堂牌照」前，會先取得「暫准工廠食堂牌照」，有關當局接到申請書之後，就會以書面認收，然後擬定設計圖。合格後就會有衛生督察擇日前往實地視察工廈。與此同時亦會聯絡消防處處長、屋宇署署長、地政總署署長、勞工處處長及其相關政府部門，而工廈租契、特別條件都有訂明限制工廠食堂用途，若改用途則要向地政總署申請「短期豁免書」，不過當局就寫明唔保證可以批核。

倘若使用煤氣或石油氣，亦需要提交符合規定證明書及完工證明書，該證明書更需要由機電工程署氣體標準事務處註冊的氣體工程承辦商填妥及簽署。而若安裝新固定電力裝置，亦需要請機電工程署註冊的電器技工／承辦商作出檢驗、測試及證明，再提交完工證明書、機電工程署署長批註的定期測試證明書。至於消防方面，就要搵消防署申領消防證書，並需要繳費，同時確保通風系統運作良好，例如喉管簡單裝置，取得通風系統符合規定通知書。做齊各項要求，先可以獲取「食堂牌」。

事實上，獲發「食堂牌」嘅工廠食堂並唔多，因為有關當局一直唔認同工廈中嘅食堂。多數批地契約都唔包括呢種非工業用途，需要修改契約先可以做工廠食堂，更牽涉到消防問題等。

食肆所需牌照費用

每一個食肆牌照都需要繳付相關牌照費用，基本上每個牌照都係依樓面指定平方米面積計算，每年均需繳交牌照費用，大多數牌照價錢都唔平。最平係「小食食肆牌照」，但不足100平方米面積嘅空間已需要$1810！而最貴嘅就係5000平方米以上嘅食品製造廠，每年需繳交$223300。一般嚟講，以基本500平方米面積嘅空間計算，每年牌費大概係$9920至$24550，僅以一個牌照計算。換言之，喺香港呢個城市，無港幣100萬大元都唔使旨意開餐廳。

先以「普通食肆牌照」費用為例，100平方米以下總樓面面積計算，每年所需牌費為港幣$2520；300至350平方米則需$8170；而800至900平方米就需要$21380。

而「小食食肆牌照」中，最平係100平方米以下，每年牌費僅$1810；300至350平方米就需要$5860；而800至900平方米則需要每年繳交$15320。

「食品製造廠牌照」方面，每100平方米總樓面面積中，每年牌費為$4460；300至350平方米就需要$14500；至於800至900平方米則需要$37950。

到近期最熱門嘅「工廠食堂牌照」，總樓面面積低於100平方米嘅食堂，每年牌費為$3740；而300至350平方米就需要$12200；至於800至900平方米總樓面面積，每年牌費為$31860！

台灣開餐廳﹕流程及所需牌照

香港開餐廳頗困難，而1至1.5小時機程嘅台灣就相對容易入場。雖然於台灣開餐廳亦需要經各政府部門審核，需要做多個手續，但申領牌照步驟比香港已經簡化得多。而且台灣方面入場門檻較低，香港整體要100萬先有機會創業開舖，台灣都係100萬，不過但新台幣100萬，折合港幣只需約25萬！

要於台灣申請食肆牌照，當然先要先到各區工商局為公司登記，申領「企業登記申請書」，皆因台灣係需要先申請「免用統一發票」。

於台灣開餐廳，步驟較簡單，只需申領營業牌照，再申領營業執照（工商）、衛生許可證（防疫）及稅務登記證（地稅）等，現時亦有機會需要辦理健康證（防疫）。於台灣開店，記得要申領合法營業登記，了解產業相關法規。

其中，辦理「衛生許可證（防疫站）」時，需要準備健康證、店面平面圖、方位圖，以及、法人身份證及租約，7天即可領取許可證。而辦理「環保審批手續」則需要準備方位圖、經營場所嘅房產證明。等待審批後，就可以去工商辦理「營業執照」，屆時要準備身份證正副本、股東決議書、公司章程，同時需要公章、銀行開戶許可證、現金新台幣243元。此外，亦需要去地稅局填表，審批工資，準備稅務登記證及營業執照副本等，但過程已比香港簡化。

辦理以下證件、執照前，最好先向有關部門諮詢清楚，以免出現爭拗。當向各部門申領相關證件後，亦需要等待衛生監督、環保部門等審核，先可以取得「工商營業執照」。及後，就可以於30日內到稅務機關辦理稅務登記，皆因台灣餐廳都要繳交「營業稅」、「營所稅」。基本上「營業稅」即係香港所講嘅「銷售稅」，每兩個月一次，大概係交易額嘅5%；而「營所稅」就係等同香港嘅「利得稅」，同香港一樣每年交一次，最高約需20%。

此外，亦有「城建稅」、「教育費附加」、「所得稅(地稅)」；「工商管理費(工商)」、「衛生檢疫費(衛生)」、「衛生費(城管)」等，雖然同樣要繳交各類費用，但所需費用已經比香港低。

當然，申領「營業執照」前，需要先經消防、衛生、環評部門檢驗餐廳，合格後先會獲得正式執照，基本上每項都係7日可領取許可證。據悉，一般台灣餐廳限定每個禮拜需要有一日休息日，即係台灣所講嘅「公休日」。