荔枝角工廈接替程班長？黑布小巷滷肉飯滿到瀉台式肉蛋吐司厚底飽滿

程班長台灣美食於荔枝角工廈聞名，早幾個月宣佈徹走，唔少愛好台灣美食嘅香港人都表示捨不得，想拍拖兩個人食地道台灣美食可以去邊呢？事有湊巧，幾個月前就有另一間小店於荔枝角插旗，同樣炮製台灣菜，不過就以肉蛋吐司、芋圓、滷肉飯為主，感覺上係直接替代程班長，或者可以擔當同區工廈嘅台灣菜代表。

小店黑布小巷與程班長舊有位置相距不遠，同樣位處工業大廈內。黑布小巷由旺角黑布街開到葵涌，今年喺程班長結業後，再於荔枝角插旗，有如為程班長台灣美食做一個延續。

黑布小巷旺角店本身並無堂食位置，其後葵涌廣場亦係小食店模式，而現時荔枝角店就多咗堂食座位，不過以食物質素嚟講，即使外賣都唔輸蝕堂食，實在無必要選擇堂食。

店內固然以台灣美食為主打，但同程班長嘅分別就在於食物偏向乾身，無乜濕潤嘅選擇，例如牛肉麵。黑布小巷主打嘅係台式肉蛋吐司、滷肉飯、芋圓，其他小食包括花枝丸、台式香腸、甜不辣、蝦捲等都係比較乾身。

招牌吐司有招牌菜招牌台式肉蛋芝士吐司，新品有慢烤雞腿芝士蛋吐司$48、麻辣鬼椒雞腿芝士蛋吐司等，後者有指採用台灣直送鬼椒辣粉。當中，慢烤雞腿芝士蛋吐司包含有厚身雞扒，就好比一件啖啖肉嘅三文治。

麵包經過烘烤，表皮略有微脆，但仍保持應有嘅軟熟度，內裏更有塗上蛋黃醬。餡料既有雞扒，亦包括雞蛋，切開後嘅吐司賣相美觀，半熟雞蛋呈流心狀態，一手拿起，蛋漿洶湧而出。麵包、雞蛋、雞扒之間，更夾雜一塊微溶嘅芝士，難怪帶有芝士鹹香味，蛋香中夾雜芝士香。

至於雞扒，厚度的確估佢唔到，雞扒令吐司更顯飽滿，對半切開之後有爆餡感覺。雞扒以慢烤方式呈現，雞肉採用雞髀肉，烤至腍身，軟嫩可口，雞扒無骨無筋，每啖仍舊保留肉汁。由於包裝精美，紙盒內亦有一層紙袋包裹，故此蛋汁、醬汁都唔會濺出，減低弄髒手嘅機會。

而古早味手工滷肉飯$48 亦係出色之作，以傳統台式做6，頂端舖滿滷肉，配搭自家製滷水汁，加上慢煮豬腩肉、兩片解膩酸蘿蔔，珍珠米亦夠煙韌。

滷肉碎配滷水汁撈飯一流，但平常食一碗滷肉飯通常食到底就無滷肉兼無汁，今次竟然食到底都仍有滷肉同滷水汁，滿口肉香，醬汁味道香甜，油香滿瀉，但又唔會好多肥膏同豬油，似台南嘅滷肉飯，其實滷肉飯比肉蛋吐司更出色！

古早味冬瓜茶$5，簡單一杯茶飲模式，相對台灣冬瓜茶，甜度無咁高，冬瓜茶有助解辣或解膩。

兩個人旅吓行

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 最後落單時間為20:30。

❷ 黑布小巷有3間分店，地址分別為荔枝角長沙灣道883號億利工業中心4樓405室、北角炮台山電氣道160號木蘭苑地下A號舖、葵芳葵富路7號葵涌廣場3樓摩登世界26號舖。

❸ 可以先用App落單，再外賣自取就更方便。

❹ 注意小店有附上膠手套。

EATWO

Miss A