【東京美食】近本願寺！築地場外市場100円人氣玉子燒連食海膽／生蠔／吞拿魚丼築地水產｜附交通及地圖攻略

築地市場係東京知名嘅魚市場，商家眾多，被稱為「東京廚房」，係一個東京自由行大清早拍拖兩個人歎海鮮嘅好地方。不過，現時築地場內市場已經搬遷至附近嘅豐洲，而築地場外市場就依舊屹立原地，多道狹窄小巷內佈滿海產小店，既可以壽司、丼飯當早餐，亦可順道買海產手信返香港。即睇築地場外市場有咩好食！

事實上，築地場內市場於疫情前2018年底已經關閉，轉移陣地至豐洲一帶，而築地週邊建築物屋齡有逾80年歷史，至於築地場外市場則依舊於小巷內營業，現時都重有好多間餐廳及商店，售賣鮮魚料理，部份甚至可見即席劏魚，壽司、蓋飯等種類繁多，好多都仍然街知巷聞。

逛築地場外市場最佳時間

一般來講，朝早9點之前，都係當地餐廳採購嘅優先採購時間，所以旅客最好朝早9點後到達築地市場，而下晝1點，商舖後又會陸續關門，所以早上9點至下晝1點就係最佳時間。

築地美食﹕玉子燒

築地場外市場有多間玉子燒專門店，包括「山長玉子燒」、「丸武玉子燒 TAMAGOYAKI」、「松露玉子燒」，於日本人食評網站Tabelog上都獲得超高評分，為人氣十足嘅玉子燒選擇，同樣門庭若市。其中，「丸武玉子燒 TAMAGOYAKI」以低至100円玉子燒作招徠，店家有逾80年歷史，於Tabelog上更獲得3.49分，玉子燒入口偏甜，以高湯鮮味炮製，雞蛋層層堆疊，質感札實，蛋香味濃。

築地美食﹕海膽＋生蠔

想要食經典新鮮即食海膽，不妨到「まる一浜田商店」、「齊藤水產」，前者以竹炭麵包包裹海膽，後者就有大大隻生蠔同新鮮海膽，入口鮮甜而無腥味，絕對係築地不得不試嘅美食。

築地美食﹕牛丼

築地場外市場有唔少食店都大排長龍，其中以賣牛丼嘅「きつねや（狐狸屋）」為佼佼者，當中有牛肉飯，亦有牛雜飯，包含有燉煮牛腸、牛肝等﹐想試牛蓋飯就要預早到場排隊，皆因至少要等1小時，不過該店逢星期三及日都會休息，唔想摸門釘就要注意。

築地美食﹕鰻魚

築地場外市場有好多平價新鮮食材，例如係「太助鰻食堂」，以蒲燒鰻魚為主，將日本鰻魚燒至焦香，加上調味，特別惹味。即使唔走入餐廳，於築地場外市場掃街亦不失為好主意，鰻魚都係其中一款小食，既有串燒，亦有原條可以選擇，價格豐儉由人，而鰻魚亦鬆軟惹味。

築地美食﹕海鮮丼

築地市場外以新鮮水產聞名，當中有多間食肆售賣海鮮丼飯，平貴皆有，比如係隱藏於巷子內嘅「鮨國Sushikuni」，係其中一間受歡迎嘅海鮮丼專門店，不過價錢較高，每人平均12000円，而且需要預先排隊，想要食有可能要朝早8、9點到門前排隊，而逢星期三亦可能休息。另外，「壽司三味本店 Sushi zanmai」就係一間24小時營業嘅連鎖壽司店，價格低至150円，適合預算較少嘅朋友。如果想持尋平價選擇，亦可以到街邊小店，一樣有三色丼、吞拿魚丼，每碗1200円就有交易！

築地景點﹕築地本願寺

距離築地市場不遠處，有一間「築地本願寺」，曾經因大火被燒毀，後來於築地原址重建，係東京比較少見嘅古代印度風寺院，行過築地場外市場時，有時間不妨參觀一下啦！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於都營地下鐵大江戶線「築地市場站」A1出口、或東京地鐵日比谷線的「築地站」1/2號出口，徒步約5分鐘即達。

❷ 留意大部份營業時間由朝早6點起，大概下晝1至3點就會關門，而且愈晏愈多人，所以要盡早去。

❸ 週邊有「PURATTO築地」，內有服務台、儲物櫃、吸煙區、ATM、外幣兌換機、汽水機、退稅服務台等。

❹ 記得唔好一路行一路食，去一間企定定食完先好去下一間，食完將垃圾交俾該店處理。