【東京美食】拉麵迷必揀！居日港人推介橫濱家系拉麵店濃厚豚骨醬油湯地道風味

去日本旅遊，拍拖兩個人食拉麵固然係指定動作，你會選擇連鎖店定地道店呢？編輯就比較鍾意前往地道風味嘅日本人拉麵店。今次前往橫濱一遊，經目前於橫濱居住嘅香港插畫師John Ho推薦，到一嚐較地道嘅橫濱拉麵店，濃厚豚骨醬油湯果然寧舍不同！

身為拉麵迷，必然要到呢間位於橫濱嘅「橫濱家系ラーメン山崎家」拉麵店，小店基本上都係日本客人，較少遊客。踏入拉麵店，需先於點餐機買票，皆因店內係憑食券認人，而點餐機上亦只有日文可以選擇。而店內重有一個小規矩，若然唔遵守，就算唔出聲，都必定知道當事人係外國遊客！

呢間橫濱拉麵店於日本食評網站Tabelog評分有3.54分，店內拉麵基本上分為濃厚豚骨醬油湯同地獄辛辣湯，拉麵份量有小份至中份至大份可以選擇，但其實小份並盛嘅份量已經頗為足夠，最平只係800日圓，折合港幣50元有找！

而所謂嘅「橫濱家系」，其實都係以「吉村家」為始祖，由1974年於橫濱杉田開業起，直到1999年搬遷至橫濱站，歷史悠久。而「家系」嘅拉麵都係有獨特地道風味，平常日本大多數拉麵湯頭都係豚骨、味噌、醬油、雞白湯、海鮮、鹽味等，而「家系」嘅豚骨醬油湯底就係店內最大特色，湯底濃稠，口感較平常拉麵店嘅厚重，油脂量豐富，一碗有充足飽滯感，令人滿足！