【曼谷酒店】紅燈區老牌酒店似《入住請敲門》人均$200／晚！泳池＋健身室空無一人入住最多竟然係XX人？｜曼哈頓酒店（SHA+）

曼谷不時有新酒店落成，而且新酒店係比較受香港人拍拖兩個人歡迎，但老牌酒店就比較少見。今次編輯就趁一間曼谷老牌酒店低價時嘗試入住體驗，酒店位置近紅燈區，有近60年歷史，到底係驚喜定中伏？

距離BTS「Asok」站只有數分鐘步程之遙嘅「曼谷曼克頓酒店」，於1965年落成，屹今有約58年歷史。雖然酒店於2020年曾經裝修過，但室內外依舊充滿歷史痕跡。上行至房間，燈光昏暗，會發現走廊、樓梯都似拍鬼片，恍如睇緊《入住請敲門》！

入住老牌酒店同新開業酒店有唔同規矩，比如係登記同退房時間固定而無走盞，酒店服務員亦會為客人推行李，客人亦需要額外付小費等。而酒店設施較新酒店少得多，大多數活動範圍都係地下一層，比如係大廳、提供早餐嘅餐廳。

雖然為4星酒店，但整體其實並唔似4星，其中一粒星大概係靠養住一個山旮旯嘅泳池同健身室。酒店泳池、健身室比較難搵，電梯宣傳海報無提過樓層，而櫃檯亦無提過，似乎係根本唔想客人搵到。對於喜愛尋求真相嘅編輯，自然要搵到為止！結果，於3樓發現有水牌顯示「Swimming Pool」，但完全係泳池入口痕跡，查問執房職員先得知原來盡頭似逃生出口嘅大門，就係泳池入口！

打開「逃生門」，會發現超神秘嘅泳池就位處樓梯之下，只要下行2層樓梯，自然抵達小型泳池。而健身室則毗連泳池，雖然健身室有開冷氣，而且落地玻璃窗正對泳池，但室內就有一陣異味，而且器材古舊，狀似古董，似乎長期無人用過。泳池相當迷你，同健身室一樣似乎極少人使用，從另一個角度睇，其實無人用反而更乾淨。

餐廳似中式設計，地方偌大，食物選擇不過不失，亦有少量即叫即煮嘅雞蛋款式，大多數食物都係偏向中式為主。細心留意一下自然會發現，酒店住客大多係印度、中國遊客為主，只有少量西方遊客，尤其係印度人佔多。酒店位置近紅燈區，由BTS站返回酒，沿途會有唔少行乞者同紅燈區嘅人，比紅燈區隔離更複雜。紅燈區人流反而集中，但間酒店附近散落晒紅燈區嘅人。想挑戰吓可以試吓入住，不過雖則係價錢平，亦係老牌酒店，但呢間真係可一不可再。

房間空間頗大，有基本設備，咖啡、茶、水都有，更多咗張梳化擺放行李，但一側大窗戶景觀欠奉。浴室地方唔大，淋浴間無乜滲水到外面，但花灑輕輕一拉就甩開，但又神奇地可以放返入去繼續使用。水溫比較難以調校，要先調到最冷，然後逐少調返溫水，單單調水溫都調足幾分鐘。不過，最大問題係廁紙擺放位置，並非放於馬桶前或身邊，而係後方，每次都要扭轉手先可以攞到廁紙，第3次嬲嬲哋2卷都拆出嚟用。

酒店設有198間房間，房型包括雙人房、高級房、豪華房等，樓高僅8層，第9層則並非住客範圍。入住1 間房間，平均每晚約2000泰銖，折合約港幣450元，人均約為220元。

入住日期﹕2023年10月

即睇【曼哈頓酒店【SHA+】 (Manhattan Hotel (SHA Plus+))】住宿價錢及限時優惠﹕Agoda｜ Booking.com｜Trip.com｜ Hotel.com｜Expedia｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 官方網站﹕http://www.hotelmanhattanbangkok.com/。

❷ 酒店距離BTS「Asok」站有大概4分鐘步程。

❸ 登記入住時間為14:00，退房時間則為12:00。

❹ 注意老牌酒店bellboy係比較熱情，會主動幫手拎行李，為免有咩麻煩，一定要俾tips，以現時計大概係30至50泰銖。