【曼谷美食】4間熱門曼谷快餐店一覽！麥當勞叔叔1:1公仔／kfc炸雞桶打卡！邊間汽水任飲？呢間係曼谷人最愛快餐店！

於香港未必會幫襯連鎖快餐店，但外地就自然可以拍拖兩個人一試，曼谷有4間熱門快餐店可以選擇，除咗麥當勞同肯德基，重有香港已經失蹤嘅Burger King，另外重有一間係曼谷先有、而曼谷人最愛嘅快餐店！

曼谷快餐店﹕McDonald's

曼谷麥當勞McDonald’s同香港絕對係與別不同，店內並非只有薯條、漢堡包、汽水，更有麥當勞意想不到嘅選擇。香港麥當勞只係淨返1個麥當勞叔叔，但曼谷麥當勞就幾乎每間分店都有1:1麥當勞叔叔，每個麥當勞叔叔雕塑都係雙手合手，企喺門口迎賓，恍惚向客人大叫Sawadecup，去到真係不得不打卡！

最特別之處係早餐時段，曼谷麥當勞有豬肉粥、雞肉粥可擇，套餐可配搭油條、薯餅、煎蛋或咖啡。以單點一碗粥計算，最平只需39泰銖，折合僅約8元；套餐則為49至99泰銖，折合約10至21元。

雞肉粥其實只係將雞扒變成手撕雞，不過雞肉原先為炸雞，所以炸雞皮有如送粥嘅薄脆，而雞肉就似手撕雞，為清淡白粥增添雞肉香味。不過，一碗粥份量唔多，亦無加大可以選擇，如果唔夠就只能點兩碗。

曼谷快餐店﹕KFC

肯德基係另一間泰國熱門快餐店，無論當地人定遊客都會走入去大快朵頤，部份餐點更有白飯到肚。相對於香港嘅貴價KFC，同一個價可以於泰國KFC食到至少一倍雞量！

曾經於網上見過，泰國KFC一堆炸雞最平賣99泰銖，雖然係雞翼，但已經足以用抵食嚟形容。但實際上，於泰國曼谷KFC餐牌中可見，其實現時無呢個選擇。以單人炸雞餐計，由89至159泰銖不等，其中5件炸雞就賣139泰銖，折合約30元，包含有2款口味，一種係正常原味，另一種就係辛辣口味。另外，多人套餐就有349至449泰銖，最貴都係100元有交易，曼谷KFC更有茶飲可以選擇。

泰國KFC始終較香港KFC好得多，對上一次於香港食已經係幾年前，香港KFC炸雞真係大多數都不堪入目，唔少網民現時更大彈炸雞縮水。而泰國KFC雖然辛辣度較高，但依然能夠入口，唔係真係辣到頂唔住，畢竟係一種商業模式。正常原味炸雞皮脆肉嫩，而辛辣口味炸雞反而更有驚喜，表面有橙紅色調味粉，並非單純灑上，而係有醃製過，入口有酸辣感，辣得過癮，竟然一不小心將全部吃完。

而曼谷KFC最特別之處係汽水任飲，購買套餐後若連有飲品，店員會將空紙杯遞俾客人。拎住空紙杯到汽水機前面，可以自由選擇飲咩汽水，而汽水機旁邊亦有各樣調味料、紙巾、清水等可以隨便攞。除咗幾款百事口味，亦有七喜、檸檬汽水、橙味汽水、士多啤梨汽水等。拎住一個紙杯，可以無限量自由斟汽水，有唔少客人於離開時，將餐盤棄置回收區後，只取走杯子，臨走再多斟一杯汽水呢！

值得一提，Samyan Mitrtown內嘅KFC分店設有一個巨型炸雞桶設計嘅餐檯。從後面睇只係一張普通餐檯，但從正面睇，就係一個大型炸雞桶，呢個炸雞桶設計係其他分店少見！

曼谷快餐店﹕Burger King

曼谷熱門快餐店中，重有一間就係Burger King，銷售手法一直受到唔少掌聲。一份特長芝士雞堡套餐賣279泰銖，雙份漢堡套餐賣219至229泰銖不等，最平漢堡包甚至賣99泰銖，折合港幣100元有找。

近年Burger King最特別之處係推出咗一款Black＆Pink漢堡，以粉紅色及黑色為主色嘅麵包，加上牛肉餅、或炸三文魚扒作餡料。原來呢份限定漢堡係近年情人節推出嘅作品，一度引起熱話，本身同韓國女團Blackpink無關係，只係一度吸引唔少粉絲買嚟打卡，至今部份分店如Asok仍然有得賣。

曼谷快餐店﹕Chester's Grill

至於Chester’s Grill，就係編輯所講曼谷人喜愛嘅快餐店！Chester’s Grill本身係一間以烤雞聞名嘅泰國快餐店，同KFC炸雞一樣有分原味同辣味。店內餐點以西式為主，無論點咩餐都係使用刀叉進食。

其中，Steak扒類套餐價錢由159至229泰銖不等，折合約35至50元，當中就有烤雞，而三文魚飯套餐只賣199至229泰銖。除咗採用魚露或辛辣口味嘅泰式烤雞飯，亦有日式及韓式炸雞可以選擇，甚至係炸魚、意粉或沙律，一份炸魚套餐連薯條、汽水賣189泰銖。值得一提，烤雞配搭濃黑嘅泰式獨有照燒烤雞醬，鹹中有甜，係特別惹味。