【曼谷手信2024】實試19款精選曼谷零食特產！激罕Blackpink x Oreo、勁辣魷魚片 x 炸雞餅乾！食唔停口鹹蛋黃魚皮／冬蔭功杯麵／皇家蜂蜜

去泰國曼谷旅遊，無論超市定7-11，抑或係夜市、市集，林林總總零食特產應有盡有，拍拖兩個人想要買零食做手信都有排揀，今次E.A.Two就實試19款零食特產，大多數都可以於Big C買得到，一晚就買得完，方便快捷，不過有部份於Big C係買唔到呢！

泰國曼谷必買零食推介

曼谷零食｜1. Mo-Min 魚皮

鹹蛋黃味零食一度風靡唔少香港人，泰國早就有唔少零食以鹹蛋黃味零食，其中Mo-Min 魚皮不僅有單純鹹蛋黃味，更值得一試再試嘅係冬蔭功鹹蛋黃味魚皮，鹹蛋黃香伴隨冬蔭功酸辣味，泰式風味濃烈！雖然係好食到停唔到口，但一包就只有4至5小塊，眨吓眼就食完，略嫌數量太少。

曼谷零食｜2. Bento 魷魚片

泰國出產嘅Bento 魷魚片常見有2種口味，大家一定唔陌生，亦係常見曼谷手信之一。Bento 魷魚片其實有多款口味，除咗藍色及紅色，其實重有一隻黃色。藍色為hot&spicy口味，魷魚片偏乾，但辛辣度最低，容易入口；紅色係sweet&spicy口味﹐魷魚片黏身，帶有微甜味，辛辣度比藍色高；而黃色則為spicy larb口味，辛辣度係最高嘅一款，入口極辣，往往要飲好多水，甚至牛奶、冰凍飲品。不過，黃色呢款嘅辣同時散得比較快，辣得過癮，而紅色嘅辣就散得較慢。

曼谷零食｜3. 小老板海苔 Big Sheet

而小老板海苔 Big Sheet 向來係泰個知名手信之一，亦係5大暢銷零食。簡單嚟講，其實即係香脆紫菜，當中有多款口味可以選擇，而去曼谷不得不試嘅應該係冬蔭功味及龍蝦味！海苔經過油炸，入口酥脆，表面帶有唔同口味嘅調味粉，質感獨特。最大優點係每包唔會佔據太多行李量，左攝右攝就得，即使買多幾包返香港都無問題。

曼谷零食｜4. 合味道杯麵

合味道杯麵向來口味眾多，受到唔少歡迎，而泰國超市內有一款酸辣冬蔭功蝦湯味杯麵，冬蔭功味濃香，蝦湯濃郁，帶有微微辛辣味，像真度高，泰國風味十足。

曼谷零食｜5. Lay’s 薯片

泰國樂事Lay’s係知名薯片品牌之一，薯片口味不少，大包、小包擺放貨架之上，不時更有限定口味。於泰國超市掃貨，泰國菜式口味琳瑯滿目，濃郁嘅綠咖喱雞、清爽嘅酸辣檸檬、惹味嘅打拋豬肉、香辣龍蝦、烤辣魷魚，以致選擇困難症必選嘅「 2 in 1 」烤蝦及海鮮醬味，通通都能食完又一塊又塊！

曼谷零食｜6. 泰國水果乾

另外，泰國水果乾都係隨處可見，芒果乾、金枕頭榴槤乾，甚至椰肉乾、草莓乾、香蕉乾、鳳梨乾、蕃茄乾等，都係抵買之選。以芒果乾為例，超市不時有買X送X推廣活動，一個價錢嘅大包裝內含有數小包裝，芒果乾買4送1，送禮自食皆宜。

曼谷零食｜7. Pretz ／Pocky 百力滋

相信大家對Pocky呢個牌子好熟悉，一直出產多種口味百力滋餅乾條，比如係香蕉味、芒果味、荔枝味、草莓味、朱古力味等。而Pretz其實與Pocky係同公司，但就有更多香港或其他國家難以買到嘅百力滋口味。其中，冬蔭功味、酸辣味、打拋豬味等，都為泰國限定版，而且一大盒有10包，適合當作手信。

曼谷零食｜8. LOTTE Koala’s March 小熊夾心餅乾

以小熊圖案為主題嘅LOTTE Koala’s March向來出產小熊夾心餅乾，外形討好，浮誇又可愛，而且價格超值。泰國超市就有與別不同嘅口味，例如係草莓味、芒果味，適合送俾小朋友。

曼谷零食｜9. MAMA 媽媽麵

產自泰國嘅MAMA 媽媽麵，於超市及便利店均有售，係當地即食麵嘅代表作之一。雖然只係即食麵，但酸辣蝦湯味湯底入口酸酸辣辣，椰奶味重，濃郁可口，溫和又容易入口，老幼咸宜。當地MAMA 媽媽麵有多款口味可擇，除咗酸辣蝦湯味，重有鴨肉味、綠咖喱雞味等。

曼谷零食｜10. 皇家牛奶片

泰國皇家產品向來受到當地人及遊客歡迎，其中由皇家牧場出產嘅牛奶片就係健康零食之一，原先其實只係泰皇為幫助窮人補充鈣質而製作牛奶片。皇家牛奶片奶香濃郁，牛奶味酵厚，據悉牛奶量有70%！牛奶片有2款口味，包括白底藍字嘅普通牛奶味，而啡字就係朱古力味，牛奶片甜度唔算高，大人小朋友都可以食。

曼谷零食｜11. Taro 鱈魚絲

平常鱈魚絲通常係一片片或一條條，都係比較短小，而Taro 嘅鱈魚絲最大特色就係極長，係泰國經典零食之一。Taro 鱈魚絲有基本款及圈圈款，有辣有唔辣，BBQ味帶有微微炭香。一大開包裝取出鱈魚絲，會發現內裏根本係一條超長嘅鱈魚絲，甚有驚喜。

曼谷零食｜12. 泰式手標奶茶

泰式奶茶係去曼谷必飲嘅飲品，想要將泰式奶茶帶返香港其實不難，只要去買包泰式手標奶茶包裝茶葉或茶包就得。ChaTraMue係手標茶嘅佼佼者，其亦出產罐裝茶葉，甚至3合1茶包，方便大家即沖即飲。手標泰式奶茶分金色、紅色及綠色，口味上金色至紅色係有濃至淡，而綠色就係奶綠。除咗奶茶口味，亦有檸檬茶口味可以選擇。

曼谷零食｜13. My Chewy 牛奶糖

泰國手信當中，My Chewy出產嘅牛奶糖絕對係數一數二最抵買嘅曼谷手信。因為每包都有好多粒，如果想要送一大班人，淨返嘅錢唔多，行李喼又無乜位，最簡單當然係買一大包，直接與所有人分享。除咗牛奶味，亦有芒果味、草莓味、榴槤味、芋頭味、荔枝味、粟米味等，甚至比較特別嘅益力多味。

曼谷零食｜14. LOTUS蓮花 × Bento 小雞髀餅乾

想要買曼谷獨特嘅零食自己食或當手信？編輯私心推介一款獨特零食，該零食由LOTUS蓮花與香辣魷魚片品牌Bento聯乘之作小雞髀餅乾！該零食同Bento魷魚片一樣，都包含有3款口味，包括甜辣魷魚味、BBQ味、辣魷魚味。話明小雞髀餅乾，當然就係以小雞髀為形狀嘅香脆餅乾，似足炸雞髀原型，造型可愛！留意3款口味為3種顏色包裝，紅色包裝就係Bento甜辣魷魚味，綠色包裝就係Bento BBQ味，而藍色包裝則為Bento辣魷魚味，款款入口酥脆，記得唔好買錯自己想要嘅口味啦！

曼谷零食｜15. 泰式調味包

泰國美食眾多，旅遊期間未夠喉點算？超市內其實都有唔少泰式調味包，可以俾大家將各款美食帶返屋企，比如係酸辣冬蔭功湯、泰式船麵、打拋豬、泰式炒河、綠咖喱等，返到香港一旦掛住泰國菜式都可以自己即時一試。

曼谷零食｜16. 泰式炸雞醬

泰國醬料琳瑯滿目，品牌極多，以泰式炸雞醬為例，酸酸甜甜，開胃又惹味，用嚟點炸雞翼一流！而曼谷超市內有好多款炸雞醬，價格不一，但其實隨便一支都已經抵買過喺香港買。泰國買大大支只係11泰銖，香港買細細支都要16元，重點係泰國炸雞醬最平嗰支都已經出色，內裏有粒粒蒜，相當濃香。

曼谷零食｜17. 皇家蜂蜜

皇家系列向來係泰國必買特產，其中皇家蜂蜜亦係值得一買嘅選擇。本身皇家蜂蜜係泰皇為平民整嘅蜂蜜，表面其實似護膚品包裝，沖水飲或敷面皆宜。據悉，皇家蜂蜜係100%天然蜂蜜，蜜糖入口不俗，的確有蜂蜜味，滋潤可口，而非混有糖漿。難得係價格親民，而非香港啲蜂蜜溝完糖漿再加價。

曼谷零食｜18. 芒果糯米飯

而芒果糯米飯絕對係泰國必食之選，若行李唔多，不妨將芒果糯米飯帶返香港！曼谷最受歡迎嘅芒果糯米飯必然係「Mae Varee」，香甜新鮮芒果與椰漿糯米飯，啖啖令人垂涎，而且有飽足感。不過，最好留意該店營業時間，由朝早6點至夜晚10點期間都可以去買，上機前買幾盒返香港自食或送人都適合呢！

延伸閱讀﹕【曼谷美食】只限外賣？毗連曼谷BTS站／5分鐘達全新商場坐低歎最高人氣新鮮芒果糯米飯！

曼谷零食｜19. Blackpink x Oreo餅乾

2023年以韓國人氣女團Blackpink為主題，並與品牌Oreo聯乘推出嘅粉紅色餅乾，造形及餡料獨特，吸引唔少粉絲慕名購買。該限定餅乾最先登陸泰國等東南亞國家，其後台灣、香港便利店都曾經有得買。不過，香港限定完又消失返，想要朝聖就要去泰國睇睇啦。事實上，該系列有黑色及粉紅色可擇，用色夢幻，包裝上更隨機有1位成員簽名！口味分2種，BLACK係以黑色曲奇配粉紅草莓夾心，而PINK則為粉色曲奇配黑朱古力奶油夾心。