港式燒臘天花板！灣仔人氣燒味店主打古井燒鵝／黯然銷魂鴛鴦飯

港式燒味向來係香港菜式嘅代表作，亦係其中一種他國難以模仿嘅菜式選擇。要拍拖兩個人喺香港搵到適合自己又高水準嘅燒臘店唔容易，當中現時灣仔與大埔都有分店嘅燒味店，突然又成為香港排隊店，堪稱港式燒臘天花板！

位於灣仔區嘅「竺扶大班燒味」，已經開業多年，最近經媒體報道過後，又再變成一間熱門排隊店。呢間燒味店固然只賣港式燒臘，包含有招牌古井燒鵝、燒腩仔、金牌叉燒、油雞、切雞、乳豬，亦與其他燒味店一樣，可配搭飯或粉麵，更有金牌四寶飯、乳豬五寶飯可以選擇。

原來小店唔單止係街坊推介，而餐廳主廚都有份量，既曾任職酒店總廚，亦曾獲得法國藍帶勳章，加上被傳媒再推一把，難怪店外不時滿佈等食人龍。

其中，黯然銷魂鴛鴦飯係人氣之選，每份都可以配上一碗老火靚湯、鵝汁菜芯，重有自家製羅漢果茶等。而金牌叉燒之所以加上金牌，原來係因為叉燒係特別選用波蘭黑毛豬，豬肉肉質肥瘦適中，油花均勻，並唔乾柴，唔會太嚡或太油膩。至於油雞、切雞，肉質軟嫩，唔會黏骨，油雞嘅雞皮帶有陣陣玫瑰露香味，同時有蜜糖香甜味﹐反而幾有驚喜。

而古井燒鵝、燒腩仔則分別配有酸梅醬及黃芥末醬，一般嚟講，通常都會蘸醬食燒味，但現實係小店嘅燒味並唔需要蘸醬，皆因反而會搶去原先燒臘香味。燒腩仔表皮鬆脆，一咬之下脆卜卜，而豬肉肉質同樣肥瘦適中。燒鵝皮脆肉嫩，表皮香口，燒鵝皮連有一層油脂，於口腔中散發油香，而鵝肉亦軟腍，保留鵝本身鮮味，燒鵝亦帶有甜味，故此蘸醬只為帶上一抺梅子酸香。