100％經實地視察！尖沙嘴11個海旁聖誕燈飾一秒回到80年代！西九裝置最誇張！最靚竟然係XX酒店？【聖誕燈飾 2023】

聖誕來臨，意味步向2023年尾，尖沙嘴向來係睇聖誕燈飾嘅好地方，今次編輯就帶大家拍拖兩個人率先遊覽一下尖沙嘴聖誕燈飾。尖沙嘴海旁有大概10個聖誕燈飾裝置，於11月29日已經悉數亮燈。其中以西九海濱長廊最為誇張，但以往尖東海旁嘅大廈外牆等燈飾就有如時空穿梭，到底點解？編輯覺得簡約就是美，最靚嘅竟然係一間與知名品牌聯乘嘅酒店，即管睇睇今年聖誕燈飾情況如何！

西九文化區﹕2023 香港繽紛冬日巡禮──聖誕小鎮

西九文化區毗連維多利亞港，整道海濱長廊向來係本地人及旅客嘅打卡地，今年聖誕節期間特別設有「聖誕小鎮」，由香港旅遊發展局主辦，展現冬日夜繽紛，大門口更寫到明「Hello Hong Kong」！高聳入雲嘅聖誕樹高約20米，於11月24日已經亮燈，樹身矗立草坪正中，閃亮燈串的確吸睛。巨大聖誕樹旁邊亦有多棵小型聖誕樹，當中有唔同造型。

事實上，西九文化區嘅燈飾係尖沙嘴海旁嘅聖誕燈飾中擁有最多打卡裝置，同時亦都係人流最多人嘅一個。草坪上地方唔算大，但粗略估算，聖誕裝飾就有超過廿款，包含有多株聖誕樹、聖誕鹿、聖誕屋、聖誕禮物盒、聖誕花環，以及模仿月亮嘅白色波波等。整個迷係海邊聖誕小鎮設置大量新裝飾，燈串閃亮，多得令人眼花，當中聖誕馴鹿造型係幾可愛，但一隅聖誕裝置設計成心形花環，則有如白事花圈，認真大吉利是！

由2023年12月9日至26日，西九文化區更會有限定「冬日維港水上煙火」表演，夜空會出現煙火圖案，與聖誕樹互相映襯，有興趣睇煙花可以到時一拼欣賞。而12月21日至30日，藝術公園草坪上更有聖誕露天市集，禮物盒造型小屋甚至會有聖誕老人呢！

1881 Heritage﹕BOTANICAL CHRISTMAS

上年1881 Hertage嘅聖誕裝飾就飽受批評，今年就以最穩陣嘅Tiffany Blue為主要色調，加上玻璃屋設計嘅聖誕花園，夜晚特別搶眼，新設計足以吸引唔少人打卡。

延伸閱讀﹕【聖誕好去處2023】上年被批史上最迆？尖沙嘴1881 Heritage 搶眼Tiffany Blue玻璃屋聖誕花園一洗陰霾

永安廣場

正對尖沙嘴海旁嘅永安廣場，由1982年開幕至今，繼續一如以往於外牆放有一個寫有「MERRY X’MAS」嘅七彩霓虹巨型燈牌，風格同80年代如出一徹。

九龍香格里拉大酒店

同樣外牆正對尖沙嘴海旁嘅「九龍香格里拉大酒店」，並無特別霓虹燈飾，反而以玩咗好耐嘅充氣聖誕老人為主打。酒店外面設有3個充氣聖誕老人，其中一個位於海旁對面，有如聖誕老人爬爬入屋內，不過夜晚時份充氣聖誕老人亮起燈，其白色褲瞬間變發光白色純情三角底褲，甚搶眼。而另外兩個充氣聖誕老人就設於麼地道一方，只係簡單坐喺酒店大門口上迎賓。

麼地道

依循麼地道走，不難發現行人天橋上嘅聖誕裝飾，寫有「Season’s Greetings」，設計簡單到不能再簡單。麼地道有兩條行人天橋，同樣設有相似嘅聖誕燈飾，設計有如返回80年代。

尖沙嘴中心

而位於麼地道嘅尖沙嘴中心，雖然未見有特別聖誕霓虹燈飾，但小巷一隅竟有充氣聖誕裝飾，包含有聖誕老人、聖誕樹，不過設計就有如馬拉松比賽衝線一刻。

麼地里

毗連麼地道嘅麼地里，曾經係尖東打卡必到嘅聖誕燈飾熱門地。依據以往經驗，麼地道今年繼續於天花設有聖誕燈飾，寫有「Season’s Greetings」。不過，今年聖誕燈飾設計真係不堪入目，顏色配搭絕對係九流設計，霓虹燈雖搶眼，但色調奇特，有如80年代，極老土。基本上只係以粉紅、綠色、紅色為主，加上一個藍色大心心，加埋就係連photoshop都唔識用嘅朋友設計出嚟，小畫家製作隨時更靚。

帝國中心

鄰近麼地里嘅帝國中心，外牆上同樣有「Season’s Greetings」字樣，聖誕燈飾面向麼地道花園。燈飾設計簡單，同樣係霓虹式巨型燈牌，風格同麼地里相近，充滿舊時80年代風格。

南洋中心

穿過麼地道，走到另一邊，到達市政局百週年紀念花園，當中有兩組巨型霓虹聖誕燈飾牌。其中一個係南洋中心外牆上嘅「MERRY X’MAS」聖誕燈飾，大幅外醬只有寥寥元素，設計簡單，只係至少有個聖誕老人同禮物，但始終有如80至90年代聖誕裝飾。

東洋商業中心

花園盡頭就係東洋商業中心，亦係另一個聖誕外牆裝飾，設計比南洋中心更簡單，只有3個聖誕老人拆禮物嘅畫面。紅色配綠色係典型聖誕配色，但最大問題係加上藍色，老老土土，設計比80年代更老土。

半島酒店 x Chanel

每年半島酒店外牆都會有特色聖誕裝飾，今年就再與Chanel聯乘，清雅酒店外牆以女士最愛CC logo粉飾，加上一個又一個Chanel小物作聖誕裝飾，顯得簡約而高貴。編輯覺得半島酒店嘅裝飾並不花巧，愈簡單反而感覺愈靚！忍唔住停低打個卡，赫然發現身邊好多遊客，同樣停低對住半島酒店外牆打卡，所以要有心理準備，停低一刻隨時令自己都以為自己係一個遊客。