40年懷舊港式冰室！新蒲崗金寶冰廳必飲傳統香滑絲襪奶茶

香港舊式懷舊冰室愈趨罕見，想要拍拖兩個人飲返杯傳統絲襪奶茶都有啲困難。新蒲崗小店眾多，當中重有一間一直屹立超過40年嘅傳統冰室，唔少街坊朝早都會去歎返杯香滑熱奶茶，確實係值得一試！

「金寶冰廳」四個大字整齊端正地寫喺招牌上，名副其實「金漆」招牌，裝潢陳設比較舊式，店內呈長形，地方不大，而且偏窄小。店內以典型懷舊式卡式廂座、方形桌，以及彩色紙皮石地板設計，都係帶有陳舊感覺。

對港式茶記有記憶嘅讀者，必然記得A餐、B餐、C餐係咩。一般嚟講，通常A餐都係最穩陣，A餐係火腿通粉、B餐沙嗲牛肉麵、C餐係雪菜肉絲米。而今次位於新蒲崗、近小巴站嘅「金寶冰廳」，就無A餐、B餐、C餐選擇，但就有叉燒湯意粉、沙嗲牛肉麵、雪菜湯米粉等典型茶記美食。

特餐$40 包含有沙嗲牛肉麵、火腿奄列、牛油餐包，其實沙嗲牛肉粉麵不俗，牛肉軟腍而份量不少，沙嗲味亦足夠，濃郁啲會更好，但火腿奄列係唯一失望嘅地方。以編輯認知，奄列應該係以蛋皮包裹滿滿火腿絲，但店內嘅奄列只係將少量火腿絲同雞蛋攪勻，並同步煎熟，所以其實係火腿絲煎蛋。而火腿量極少，雞蛋亦煎得比較燶，極為乾身，建議轉太陽蛋。另外，都有碟頭飯，基於煎蛋水平，所以芙蓉煎蛋飯$53都係同樣失望，煎蛋太老，並非想像中嘅質素。

牛油餐包可以加$6轉菠蘿油，感覺更抵食，菠蘿包內有小片牛油，上檯帶有少少暖身，表皮微脆，麵包鬆軟。不過，略嫌菠蘿包唔夠熱，一邊食嘅時候，牛油未能夠靠麵包熱氣而逐步溶化，但就算將牛油塗滿菠蘿包，都夠香口。

店內必揀嘅一定係招牌金寶奶茶，一杯熱金寶奶茶以厚厚瓷杯盛載，懷舊味濃，其實由創辦人到二代接班人，呢杯奶茶已經超過40年歷史。奶茶泡茶、撞茶手法專業，淡奶、熱茶程序大概充足，質感順滑。整杯奶茶入口香醇絲滑，而且有頗長餘韻，既無苦澀味，而茶味亦濃郁，奶味與茶味平衡，層次豐富，絕對唔需要加糖。店內嘅奶茶並非連鎖快餐店嘅清一色口感，帶有獨特濃香味，色香味俱全，絕對係「金寶冰廳」靈魂。