【台北夜市】臨江街8間重點小吃攻略米芝蓮熱湯臭豆腐／麻辣鹽水雞／九份芋圓｜通化夜市美食推薦

位於大安區臨江街嘅通化夜市，屹今不足10年，附近為住宅區，亦鄰近台北101知名地標，為一個熱門台北夜市之一。該夜市以大直路為主軸，中間含通化街39巷50弄，構成十字型，而臨江街夜市全長約達300米！據悉合共有接近200間小吃攤檔，為其中一個拍拖兩個人必去夜市。

臨江街夜市位置上介乎於臨江街、基隆路二段及通化街，故此有人叫臨江街夜市，亦有人叫通化夜市，而夜市距離捷運站最快約有5至15分鐘步程。臨江街夜市主打客家文化，街道上小食眾多，包含有米芝蓮級臭豆腐、古早味乾拌麵肉羹湯、米粉湯、蚵仔麵線、小炒、滷味、豬血糕、九份芋圓等，美食不勝枚舉，但大部份需要於傍晚時份先會營業。馬上收藏E.A.Two實地整合嘅名單！

通化夜市美食（1）﹕雅口天香臭豆腐

通化夜市美食不少，原名「天香臭豆腐」嘅小吃店，經營有超過20年。現時﹐該店稱為「雅口天香臭豆腐」，同樣可以食到《米芝蓮指南》必比登星級推介嘅臭豆腐。該店不僅有暢旺臭豆腐鴨血，而且有夜市牛排可以選擇。因為「雅口」係賣牛排，而「天香」則賣臭豆腐，兩者共用一個舖面。

一般來說，臭豆腐都係脆炸最惹味，但店內不單有煎炸臭豆腐，更有熱湯臭豆腐，入口令人意外。一份脆炸臭豆腐賣TWD75，而一份腸旺臭豆腐鴨血剛賣TWD150，素食亦可以選擇賣TWD75嘅素食臭豆腐，另有多種口味嘅臭豆腐。該店臭豆腐與港式臭豆腐稍有不同，並非好嗆鼻嘅臭豆腐，而配搭熱湯後嘅臭豆腐，伴有滑嫩嘅台式鴨血，兩者皆非常入味。至於湯汁，入口清爽，並唔算太濃郁，無搶過臭豆腐香味。

現場所見，脆炸兼香煎嘅臭豆腐中間有窿，內裏倒入醬汁，上檯時會伴有台式泡菜。而編輯所選嘅熱湯臭豆腐，內裏就無咩醬汁，反而係吸附唔少湯汁，對於食慣港式臭豆腐嘅香港人，絕對係一大驚喜。

通化夜市美食（2）﹕富爸爸肉捲

「富爸爸肉捲」元祖店位於臨江街夜市，後來其他夜市都有分店，例如樂華夜市。該店於台北為人氣小店，以自家手作芝士肉捲為主打。另外，重有新鮮輕送平價海鮮製作小炒，例如蚵仔、扇貝等，適合佐酒。

肉捲基本上包含6款口味，除咗有豬肉、牛肉、雞肉，亦有羊肉、芝士、和牛，肉捲可以配搭3款醬料，包含有特製酸辣醬、蕃茄莎莎、芝士乳酪味，自由選擇。每份肉捲為TWD60起，皆為現點現炸，不過該店於夜晚先會開始營業，太早就未有啦！

通化夜市美食（3）﹕艋舺雞排

來自艋舺夜市嘅「艋舺雞排」，分店開到臨江街夜市，雞排等候時間頗長，起碼20至30分鐘，而且係先做外賣再做現場客人。該店炸雞排現點現炸，共有8款口味可以選擇，包括原味爆汁嫩雞、天王雞排、辣妹雞排、苔客雞排、梅子雞排、韓式雞排，甚至韓式炸雞等，每塊賣TWD99。另外，亦有其他小食如地瓜薯條、香酥炸雞皮、酥炸杏鮑菇等。

其中，天王雞排為原始口味，無多餘配料，雞排上手熱焫焫，而且份量不少。雞排一咬入魂，表皮色澤金黃，入口鬆脆，香口惹味，唔會太油膩，內裏卻又保持嫩滑。而整塊雞排完全無骨，起骨手勢不俗，令雞排留有肉汁，鎖住水份。當然，係因為該店當日未能供應海苔味雞排，編輯先點選原味雞排啦！

通化夜市美食（4）﹕梁記滷味

另一間曾經獲得台灣《米芝蓮指南》必比登星級推介嘅臨江街夜市小吃店係「梁記滷味」，主打係冰鎮滷味，包含有鴨翼、鴨胗、豆乾、脆腸，重有雞頸、雞腳、海帶、鴨血等超過20款滷味可擇，更可自選沾醬與否。該店於1965年創立，歷史悠久，一直為臨江街通化夜市歷史見證，店門外不時出現人龍，不過評價上就好壞參半。

通化夜市美食（5）﹕御品元冰火湯圓

臨江街通化夜市有不少《米芝蓮指南》必比登推介小吃店，其中「御品元冰火湯圓」亦係星級之選，該店於傍晚6點先營業，顧名思義以冰火湯圓為主打﹐每碗TWD80起。店內將溫熱湯圓與清冰融合，形成冰火交融嘅畫面，每碗大概有6粒湯圓。而冰火湯圓中有酒釀芝麻湯圓口味，啖啖有芝麻香，最後淋上桂花蜜，入口帶有香甜味，有如刨冰中嘅熱湯圓，別具特色。

通化夜市美食（6）﹕九份芋圓

另一間受歡迎嘅甜品店係來自九份嘅「九份芋圓」，位於臨江街夜市嘅芋圓店，讓台灣人無需去九份都可以食到九份獨特芋圓，每碗約TWD60左右。該店芋圓份量不少，包含有芋圓、地瓜圓，另有蜜芋頭、蜜地瓜可擇。而配料則可選擇檸檬愛玉、豆花、刀削冰、黑糖粉圓等，六有燒仙草及紅豆湯。

通化夜市美食（7）﹕紅花麻辣鹽水雞

至於「紅花麻辣鹽水雞」，於台北其他地區都有分店，不過臨江街通化夜市嘅為創始總店，由路邊攤做到店面，再開設分店，開業有超過30年，亦係通化夜市中另一間排長龍嘅小吃店。而呢間鹽水雞店位置為夜市第一檔，地理位置優越。不過，最好開店不久就好到達，就無需要排隊，否則等候時間會較長。

店內有多款鹽水雞可以選擇，包括TWD260嘅全隻鹽水雞、TWD130嘅半隻鹽水雞，經濟實惠啲有TWD65嘅鹽水雞翼及雞胸、同樣賣TWD65嘅鹽水雞腿，另有賣TWD55嘅鹽水雞胸、4隻鹽水雞翼，部位眾多。一般來說，平常於香港食到嘅鹽水雞嘅質素都係比較參差，但台灣地道鹽水雞明顯有好大分別！

當地鹽水雞價廉物美，調味上望落唔多，食材新鮮，雞肉有爽彈不乾柴，配料亦唔會只有鹹字，反而有種清爽感覺，或者關鍵就在於攪拌嘅醬料及雞汁。若然配搭店內嘅特製辣椒醬，入口既香則麻，更為惹味。

通化夜市美食（8）﹕再聚 Reunion Place 港式餐酒館

最後一間係位於臨江街通化夜市入口附近嘅「再聚 Reunion Place 港式餐酒館」，該店由港人開設，為信義區中一間酒吧及水煙館。店內除咗有各式創意調酒，亦有唔少港式無酒精飲品，包含有凍檸茶、絲襪奶茶、利賓納、楊枝甘露、咸檸七等。最特別嘅係酒名，例如係一日喪命散、含笑半步癲、癡情士多、海棠小姐等，重有啲酒名就不便講啦。