【台北美食】自己人呀！台北8+3間精選貼地港店雪花冰/碟頭飯/咖喱魚蛋/傳統麵包異地尋港味｜台北好去處

台北係香港人常去嘅旅遊地點，亦係快閃遊熱門目的地，適合拍拖兩個人去逛一逛。台北以當地人常去嘅夜市最為人熟悉，但其實近年有唔少港人因唔同原因進駐台北，較早期嘅要選mandy蔣雅文開設嘅冰店，而現時更多港人移居台灣，今次編輯就為大家整理9間台北至花蓮一帶嘅港味店舖，既有餐廳，亦有書店，唔少由在台港人開設，通通都好貼地，出發去台北旅遊前不妨記低呢個清單啦！

台北＞花蓮美食﹕心地日常

講到最早期於台灣發展嘅香港人食店，由前歌手蔣雅文（Mandy）開設嘅心地日常必然入圍。先知自覺，早於2014年已經向舊公司請假到台灣發展嘅Mandy，打拼多年先稍有成績。原先心地日常店舖位置位於文青集中地赤峰街一帶，近年先將大本營搬到花蓮。店內以雪花冰為主打，不時有限定口味，每份雪花冰都好大碗，而且係好有水準，可以打卡之餘亦甜度適中，一份只係TWD180。而老闆娘Mandy亦會經常在店舖內親自打點，但花蓮店目前多數係由佢爸爸媽媽打點，編輯好想講佢爸爸真係好型，想要朝聖呢間冰店就要mark實地址！

延伸閱讀﹕【花蓮美食】Mandy蔣雅文姊妹創立！心地日常台北轉花蓮！知名老屋賣火山漸層雪花冰／桂花蜜酒湯圓

台北美食﹕半路咖啡 Halfway Cafe

鄰近國立臺灣大學嘅半路咖啡，係從香港開到台灣嘅食店好例子。半路咖啡本身於旺角、上環都有分店，交通方便，但台灣店距離捷運站就有一段距離。咖啡店靠近民居，但附近民居似學生租住嘅房屋，而且算靠近臺大，相信有唔少學生客。

台北美食﹕叁陸伍貳

台北西門町內有一間港式冰室「叁陸伍貳」，由近年於台北重新開始嘅香港年輕人自立門戶嘅地方。前身係因大火而結業嘅「保護傘」，年輕人曾於士林夜市開檔，直到2023年先正式開設呢間餐廳。店名係一個數字，意味365日乘10年，加上有2年為潤年，正正係3652日。店內以港式茶餐廳嘅碟頭飯為主打，包括滑蛋叉燒飯、乾炒牛河等，重有常餐必備嘅沙嗲牛通，叉燒貨源亦有港人於台灣開設嘅燒臘店取貨。

台北美食﹕獅鬥 cdou bar

台北西門町美食眾多，重有一間港式酒吧「獅鬥 cdou bar 」，據悉店入內設計充滿港味，包括香港獨有嘅九龍皇帝書法牆、港式霓虹招牌，加上舊時港式雜誌模式餐牌。而店內剛以港式小食為主打，例如咖喱魚蛋、牛肉丸、蘿蔔糕等，為地道台灣人及未能返家鄉嘅港人提供一個回味嘅地方。

台北美食﹕細記麵包

傳統港式麵包亦係重要港味之一，專賣店雖然唔係位於較多港人熟悉嘅西門町，反而係松山區。但據知老細係由香港到台灣發展，擅長製作雞尾包、雞批等傳統包點。其中，連港式菠蘿油都有得賣，比部份香港嘅菠蘿油更惹味，熱呼呼菠蘿包將一塊冰涼牛油逐步溶化，一份只需TWD50。

台北美食﹕再聚 Reunion Place

來自壹碗壹碟再聚 Reunion Place 港式餐酒館，現時位於臨江街觀光夜市一帶，即通化夜市。本來壹碗壹碟於香港設有多間分店，但近年已經全線結業，的確香港創業難、守業更難，另覓一片天地或者係好事。原先壹碗壹碟於香港係主打台灣菜，除咗牛肉麵、乾拌麵，更有台式車仔麵、麻辣鴨血。而今次再聚就調返轉以港式美食為主打，無論裝潢定特色調酒，抑或港式叉燒飯、沙嗲牛肉麵，甚至係冰室必備嘅法蘭西多士，都充滿港味。

台北美食﹕九月茶餐廳

同樣由香港人直接將香港文化帶到台灣嘅「九月茶餐廳」，位置距離寧廈夜市、大稻埕迪化街較接近，建議於捷運「雙蓮站」落車，徒步約5分鐘可達。該店同一般港式茶餐廳相近，菜式如滑蛋吐司、焗豬扒飯、星洲炒米，以至滑蛋叉燒飯、港式咖喱飯、沙嗲牛肉飯等碟頭飯應有盡有，甚至有各式香港點心，如招牌黃金流沙球、蒸銀絲卷、豉汁蒸排骨等。

台北美食﹕鳥山。商號 - 咖啡創意特調實驗所

台北赤峰街向來係在地文藝青年好去處之一，聚集唔少藝術及文青小店，近年則有一間由香港搬到台北嘅小店「鳥山。商號 – 咖啡創意特調實驗所」。該店於香港本身為同名咖啡店「鳥山。商號」，紅磡店結業後已消失於香港。目前，台北店採用相同名稱，但除咗售賣咖啡，亦有衣飾等精品可以選擇。

台北好去處﹕Daebak make my day 大發

台灣九份、十份係香港人去慣去熟嘅台北近郊旅遊景點，但原來細心啲自然會留意到有啲店舖係好有親切感。其中，十份火車路軌係放天燈熱門勝地，兩旁大多數都係售賣天燈嘅地方，而中間有一間賣精品嘅小店，有兩隻香港人好喜愛嘅pepe公仔，恍惚係一種無言的相認。雖然Daebak係韓文嚟，中文係大發，意思係有驚喜或意外之事，其實只係一間雜貨舖。