【北投美食】認實正版溫泉拉麵！满来日式風格白湯拉麵／炸豆腐／特色甜點結尾隱藏小遊戲優惠！

去北投除咗要浸溫泉，一定要試試北投美食，其中有間溫泉拉麵堪稱北投名物。而北投溫泉拉麵原來都有分正版貨同山寨貨，E.A.Two梗係希望大家堅持原創同正版啦，拍拖兩個人去食溫泉拉麵要識揀。想知點樣分清楚正版同山寨，即刻睇睇！

無論正版定山寨嘅北投溫泉拉麵，距離捷運站亦不遠，都只係2至3分鐘就可以到達，交通便利。要去正版溫泉拉麵，先會經過山寨溫泉拉麵。山寨版溫泉拉麵叫「滿足溫泉拉麵」，而正版溫泉拉麵就叫「滿來溫泉拉麵」。「滿來溫泉拉麵」名稱上其實係寫「満来」，唔知情嘅香港人可能會以為係簡體字，更會以為繁體字「滿足」一定係正版。事實上，「満来」係取自日文異體字，唔係中文字，因為台灣曾經歷日治時期，就好似北投依然保留日治時期嘅建築，用日文字好正常。

而「滿來溫泉拉麵」早於1999年已經開業，原址正正係現時嘅「滿足溫泉拉麵」，因為本身係「滿來」老細向該業主租下舖位，而「滿來」老細曾於日本求學及工作。後來，「滿來」因疫情提前退租，3個月後重開時已搬到附近舖位，但舊房東卻於原址自己開店，新開咗一間「滿足」，仿倣「滿來」所創下嘅「北投名物」，最終兩者一度令消費者模糊。據了解，目前「滿足」入面有個仿足湯池，而現時編輯見到嘅「滿來」，則為仿溫泉浴室。不過，最後正版竟然被指憑空杜撰，想要相信邊個正版、邊個山寨，大家自行判斷。

身為老字號北投名物，室內外裝潢都保留日式風格，比如係日式拉門、燈籠及竹子花紋，就好似一秒抵達日本，不過當中又好神奇地散發出一種台灣在地感，例如台式檜木筷子盒。餐牌上寫有好幾款拉麵同小食，口味有叉燒、什錦，亦有原味豚骨、味噌豚骨、泡菜豚骨、昆布醬油等﹐北投拉麵基本上都係介乎於TWD228至TWD268，折合港幣已經比香港食拉麵平。

試一碗白湯雜錦拉麵TWD258，平常香港嘅「什錦」即係乜都有，而台灣嘅「什錦」嘅「什」即係牛什、豬什等內臟。不過，呢度嘅「什錦」，原來係指海鮮，有啲意外。雖然係海鮮拉麵，但都有一粒粒嘅日式叉燒，比日本拉麵係爭少少質感同味道，但都算不過不失。拉麵內嘅海鮮包含有蝦、帶殼蜆肉、魷魚等，重有同日本拉麵一樣有筍絲、蔥花、海帶、芽菜等配料。

拉麵湯底則呈奶白色，帶有菜嘅甜味﹐比日式拉麵偏淡。麵條則似蕎麥麵，質感卻又少咗蕎麥麵嘅煙韌彈牙，但又似拉麵嘅軟腍同掛湯感。整體來說，拉麵似台式拉麵，而非日式拉麵，如果抱去日本食拉麵嘅心態去食，可能會失望，但呢度係台灣，帶有台式風格又幾合理。

第一次去「滿來溫泉拉麵」，竟然睇唔到佢有一款招牌炸豆腐TWD40﹐只聽店員建議試咗特色甜點奶酪TWD48。奶酪即係奶凍，質感一致，有奶香味，但唔算太獨特。反而，實在後悔無點炸豆腐。如果食炸豆腐，臨走重可以玩個幸運鈴活動，小遊戲玩法簡單，只要從門口處將鈴噹推到廚房處，成功送達嘅話，中咗就可以半價享用剛才食嘅炸豆腐，但只限內用，唔可以外用。