北投百年溫泉鄉！探索地熱谷／吉他橋／梅庭！IG打卡溫泉博物館／最美圖書館、公園藏露天溫泉／泡腳池

走到台北市最北端一隅，可以拍拖兩個人經捷運到達北投，該區向來擁有天然溫泉熱氣，而且終年不斷，故被稱為百年溫泉鄉，甚至有原居民居住。到訪北投，香港人一定知道地熱谷，但其實重有其他值得一遊嘅北投景點，包括近年成為IG人氣打卡點嘅溫泉博物館，以及一個最美圖書館。你又知唔知道，北投兩個公園內原來都有大眾露天溫泉、泡腳池呢！

去北投一日遊，建議先從捷運「北投站」走出，順序行過多個北投景點後，最後於新北投站離開，臨走前可以去埋E.A.Two提過嘅「滿來」，歎返碗溫泉拉麵。又或者從「新北投站」走出，先食一碗溫泉拉麵，再走訪北投景點，最後於「北投站」離開。

北投景點（1）﹕告白巷

距離捷運「北投站」不遠，前往「告白巷」。該小巷本身其實無乜太大特色，只有極少數彩繪壁畫。不過，該小巷就因為台灣人氣男團「五月天」主場阿信而成為網紅地。阿信曾指呢度係自己初戀告白地，象徵青澀嘅時代，令「溫泉鄉34巷」呢道普通巷弄，搖身變成歌迷打卡熱點，引發更多人朝聖「阿信的告白巷」。

據了解，巷弄彩繪壁畫原先並不存在，只係因為阿信令小巷受歡迎，溫泉里一方先至美化巷弄牆壁，由溫泉里朋友加上大學生創作壁畫。其實，從只有120米長嘅小巷中可見，週邊都幾古舊，甚至有斑駁位。

北投景點（2）﹕北投公園親水公園露天溫泉

經過「告白巷」，一直向北面走，自然可以走到屬全台首座溫泉公園嘅「北投公園」，公園建於1913年，內有潺潺溪流，又有多個知名北投景點。北投有好多浸溫泉嘅地方，原來綠意盎然嘅公園內，唔單止有噴水池、北投石、最美圖書館、溫泉博物館等日治時期建築群，更有一個親水露天溫泉！

園內有個露天溫泉浴池，大眾可以付費進入，人均只需TWD60，半票TWD30，分6場次進入，係北投區一個平價溫泉浴池！位置上靠近E.A.Two曾前往嘅「瀧乃湯浴室」，「吉他橋」亦於不遠處。露天溫泉上方寫有「千禧湯」，佔地有1000平方米，地方偌大，主要選用木材、原石等大地材質為原材料。溫泉同「瀧乃湯浴室」一樣，同樣係日式風格，都係採用青磺泉，屬酸性硫酸鹽氯化物泉，源自於「地熱谷」，亦係寶貴溫泉水源。溫泉水大概有38至45度，比「瀧乃湯浴室」低少少，只不過平價嘢就可能較多人共浴，同時必須要自備泳衣及泳帽。由於閘後係溫泉範圍，故不便拍攝。

北投景點（3）﹕吉他橋

離露天溫泉不遠，向「地熱谷」方向走，可以先前往「吉他橋」。而「吉他橋」唔單止位於「北投公園」內，同時亦毗鄰北投最古老嘅「瀧乃湯浴室」。「吉他橋」處於北投溪之上，狀似半月形。本身其實同結他無咩關係，直到1966年有位台灣歌手半夜坐喺呢條橋彈結他，拍攝一套黑白電影《溫泉鄉的吉他》，演繹日式歌曲風格，然後台灣人就叫呢條橋做「吉他橋」。

水泥造嘅先係「吉他橋」，橋身頗細小，而木棧道係後期加上嘅小路，橋身及護欄其實已經破爛，只不過台灣未有拆走，反而保留落嚟。遊人只可喺旁邊觀察，或者走到小亭中望望，其實橋身有幾分似一個小廢墟。

北投景點（4）﹕地熱谷

提到「地熱谷」，相信香港人一定唔陌生，皆因E.A.Two前往當日，沿途聽到好多廣東話嘅嚮亮聲浪。「地熱谷」座落北投陽明山山谷窪地﹐係一個長年累月都係滿佈蒸氣及熱氣嘅小湖，如果係紫色，應該會令人聯想成動漫中嘅地獄畫面。不過，溫度有攝氏80至100度，水質酸鹼度高，含有腐蝕性，一旦失足跌下高溫嘅溫泉水，就真係變成「地獄谷」，所以遊走「地熱谷」要小心。

「地熱谷」係台灣八景十二勝之一，景觀優美，尤其係日出晨光初現時，太陽光線射到溫泉水中﹐漫步其中恍如仙境般煙霧嬝繞，唔少人都指景象相當夢幻。小小嘅湖水，亦係附近溫泉嘅水源，好多間溫泉店都以「地熱谷」泉水作源頭，而適當溫泉水有保健功效。而「地熱谷」嘅泉水，帶布酸性，係一種罕有嘅硫磺泉，有啖啖硫磺味，又叫青磺泉。而溫泉水嘅色澤偏微綠，狀似翠綠玉壁。

整個溫泉谷有一條步道圍繞，遊客可以依路線走一圈，從唔同角度觀望「地熱谷」，一隅更有「愛情座椅」俾情侶打卡。熱騰騰溫泉水週邊栽種大量綠植，環境清幽，溫泉谷就似一個天然嘅Spa，可以感受當中原始熱氣。不過，要注意「地熱谷」係唔可以擅自煮溫泉蛋喔！

北投景點（5）﹕北投梅庭

離開「地熱谷」，可以折返「北投公園」，重有唔少北投景點隱藏於公園內，其中有「北投梅庭」。呢座建築物係和日式後洋式混合設計，係一種和洋風格。建築物於1930年代建成，曾經歷日治及二戰時期，於2006年曾獲封為「台北市歷史建築」。「梅庭」位於溫泉區內，屋旁有個戶外庭園，故屋內一度設有溫泉浴室，目前可以同時參觀室內日據時嘅閣樓同防空避難室。

走入屋內，不難發現室內係分成以上、下層。「梅庭」有百年歷史，以檜木為原材料，內有八角窗、釉面馬賽克磁磚、洗石子門柱等，日式木系與洋風混合，風格簡樸雅緻，整座民宅實而不華。入口「梅庭」二字係來自曾居此處嘅「一代草聖」于加任先生手書，館內亦有其書法作品。

北投景點（6）﹕北投溫泉博物館

提到北投IG打卡地，不得不講被列為市定古蹟嘅「北投溫泉博物館」！博物館前身其實係北投一個公共浴場，但現時就無溫泉或餐飲服務，只係一個博物館形式做展覽。值得一提，進入博物館係需要換上指定拖鞋，將自己嘅鞋放入儲物櫃，參觀時帶上鑰匙，離場時再換返鞋，儲物櫃及入場費皆為免費。

館內外都係來自日式溫泉公共浴場，同時有紅色磚牆及黑色瓦頂，相當沉穩，不失英國都鐸時代嘅鄉村風格。雖然整體係和室格局，包括日式地板，盡現日式美學。而室內浴池週邊亦有羅馬拱柱，亦有彩色玻璃，樓高2層嘅建築物將和洋風融合。

博物館基本上分1樓及2樓展區，即下層及上層，可以由樓梯穿梭兩層樓。1樓可見以前只准男性進入嘅大浴池，重有北投石，以及北投浴場SENTO。另外，重有關於北投溫泉鄉歷史及原住民凱達格蘭族嘅歷史，亦可以從中參觀以前嘅人點喺公共澡堂洗浴，感受來自日本人嘅泡湯文化。另外，呢層樓亦有片語拾光、博覽廳EXPO展區，能探索北投溫泉博物館嘅歷史軌跡，睇吓1998年博物館建成前到式係咩情況。

至於2樓上層空間除咗係入口處，既有北投印象展區，亦有多媒體視聽室、台語片的荷里活等展區，可以睇導覽影片及溫泉旅館發展史。另外，該層空間亦設布一個叫望樓嘅榻榻米大廳，遊人現時可以進入榻榻米範圍休憩，但就唔可以腳踩拖鞋入內。

北投景點（7）﹕臺北市立圖書館

北投另一個IG打卡點係「台北市立圖書館北投分館」，該建築物同樣位於「北投公園」內，毗連「北投溫泉博物館」，分館雖於1963年建成，但輾轉於2006年先重新啟用。圖書館樓高2層，地方偌大，館內藏書豐富，從外到內，可見呢座圖書館有大量落地大窗戶，採光自然，全座建築物則以木材配搭鋼材建成。

北投分館唔單止有多個綠建築設計，係台北首為綠建築圖書館，有如溫泉鄉中嘅森林浴場！圖書館設計更曾獲得多個獎項，包括「2007年國家卓越建設獎」、「第6屆台北市政府品質創新獎」、「2007年台灣建築獎」、「第6屆台北市都市景觀大獎」、「第8屆行政院公共工程品質優良獎」、「內政部96年度優良綠建築設計獎」、2008全球建築金獎等。該圖書館建築設計早年曾被美國娛樂藝文新聞網站Flavorwire.com封為「全球最美的25座公立圖書館」之一，後來於2015年更獲外國網站WHEN ON EARTH列為「全世界最酷10大綠建築」，北投最美圖書館當之無愧！

北投景點（8）﹕復興公園泡腳池

走完「北投公園」，繼續向捷運「新北投站」方向走，經過捷運站可以去到「復興公園」。而「復興公園」內竟然隱藏一個大眾泡腳池，當日就見到唔少在地人都喺度泡腳！不過，大多數泡腳嘅人都係上咗年紀嘅阿公阿嬤，年輕朋友則比較少見。

「復興公園」內同一般公園設施相近，有籃球場、滑梯、沙地、步道等，但當中最特別就係有一個開放式水池。同「北投公園」內嘅親水露天浴池一樣，「復興公園」嘅泉水都係來自於附近嘅「地熱谷」，而泡腳池溫度有約40度，色澤為透明，水質食然滑，只係色澤同「地熱谷」嘅青磺色稍有分別。呢個泡腳池則為免費入場，係北投免費泡腳嘅地方，但公園泡腳池人數頗為密集，可以容納約100個人同時泡腳！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運淡水信義線至「北投站」，穿過北投市場，可以前往北投公園，或者從「北投站」轉乘粉紅色新北投線至「新北投站」，會更接近北投公園。

❷ 去地熱谷要小心安全，唔好跨過圍欄。

❸ 進入博物館及圖書館要保持安靜，同時唔好做任何破壞行為。北投溫泉博物館只係博物館，無泡湯或餐廳服務。

❹ 公園露天浴池係大眾使用，要注意使用守則。除咗北投公園內嘅露天浴池需要入場費，票價人均約TWD60，需要自備毛巾及拖鞋，其餘都係免費入場。