【台北玩樂】E7PLAY新北店一票通行玩到底最平50蚊／3小時！保齡球／撞球／飛鏢／籃球機／遊戲機台任玩！

拍拖兩個人去台北旅遊，除咗搜羅景點及美食，可以去埋香港難以搵到嘅娛樂設施。今次E.A.Two前往一個台北玩樂好去處「E7PLAY」，意思即係「一起玩」！一個價錢可以玩到底，一票通行任玩3至5小時，人均低至TWD200，折合港幣只係約HKD50﹐即刻為你實測新北館有咩玩！

E7PLAY 新北三重店

「E7PLAY」以「一票玩到底」自居，而三重館更有3層樓高，地方偌大，內有超多遊樂設施，係一個綜合休閒館，若要逐個玩嘅話，3小時都玩唔完！三重館距離台北捷運「台北橋站」及「三和夜市」不遠，交通便捷，從「台北車站」或「西門町」前往亦好方便。該分館24小時全年無休，就算旅行若遇上落雨天氣，都可以有玩樂嘅地方！

由捷運徒步而至，見到一個超大嘅保齡球樽，就代表你已經到達三重館入口。甫踏入大門就係向下走，B1層為現場購票及出入口處，每人都需要購買一張門票入場，買票後就毋須要再為遊設施購票，入面大多數設施都係輪流玩，先到先得。

唯獨保齡球道，職員會問玩唔玩保齡球，多人就要花時間等候，但若然無咩人就可以直入球道打保齡。屆時，職員會俾安排一個球道號碼，只要去返相應號碼就無問題。不過，球道部電腦一開始有機會壞壞哋，要搵職員調校好就可以。三層樓玩樂空間內，保齡球區已佔兩層，球道基本上只有32條，B1層為1至15號，而B3層則為16至32號，每層上、下午都有1小時清潔時間。

保齡球最重有十幾號，最輕嘅有6號，亦有球櫃可供租借，以自助式租借保齡球鞋，自己對吓最適合著幾號球鞋就得啦！一舨情況下，球道同其他保齡球場無異，但間中會出現夜店風格嘅夜光保齡球，原來係來自日韓風格，可以潮玩夜光保齡球，喜愛打卡嘅你絕不能錯過！

除咗保齡球區，三層樓重有其他遊樂區，包括背後嘅撞球區及電子飛鏢區，另外更有遊樂場區、娃娃機、電話亭KTV區，甚至係桌遊區及按摩椅視聽包廂區等等。

撞球區至少有6張檯，不過就係美式桌球，而唔係英式桌球，同樣需要去櫃台講想玩撞球，職員就會安排邊張檯俾你。而電子飛鏢區則至少有8部機﹐亦需要去櫃檯講聲，職員就會俾號碼你，再為你提供飛鏢設備。

視聽娛樂區及電話亭KTV方面，都要去櫃台講聲，職員就會為你安排，按摩椅同視聽區都有好多張Panasonic按摩椅，而KTV區就只有少量包廂，每個包廂可以容納2至4人，得2個咪高峯。「歡樂天地」式嘅遊樂場就反而有好多部機，例如籃球機、賽車機、射擊機、足球機、格鬥機等，甚至有太鼓之達人機及桌上曲棍球機。如果想要靜態少少，就可以上行至自遊空間區及自遊舒壓空間，內有桌遊、漫畫及雜誌，不過桌遊就需要有E7會員卡或證件先可以借用。

場內更有餐廳區，中途肚餓想醫吓肚，都唔使專登走出外面，皆因入面都有小食及飲料可以選擇。好夾多娃娃機內唔單止有娃娃，重有零食，值得一提嘅係電話亭KTV同好夾多娃娃機都係可以免費取代幣，唔需要另外再俾錢。至於旁邊小餐廳，則以飲料及炸物小食為主，一個人TWD40、兩個人TWD70就可享無限暢飲，炸物小食就有炸雞排、雞塊、薯餅、熱狗等。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運至「台北橋站」，徒步約10分鐘即達「E7PLAY 三重館」，位置近「三和夜市」。

❷ 「E7PLAY 三重館」入場費人均TWD200起，星期一至五為TWD200/3小時及TWD240/5小時，星期六及日則為TWD240/3小時，6至11歲入場費則介乎於TWD130至156，所有價格依時間而定，早、晚會平啲，晏晝時段會貴少少。可以喺入口處現場候位購票，或者於「E7PLAY」APP購買門票。「E7PLAY 三重館」主要分3小時、5小時玩樂時間，按人頭收費，超時每30分鐘加TWD30。

❸ 「E7PLAY 三重館」設有特約停車場，只要入內消費，就可以享泊車優惠，記得買飛時要講聲。

❹ 「E7PLAY 三重館」於星期五晚，以及星期六、日人流較多，最好安排喺平日前往，如果係朝早，更加係完全唔需要排隊。