香港去澳門搭車定搭船好？4大交通方法﹕金光飛航／噴射飛航／金巴／直通巴

由香港去澳門嘅方法愈來愈多，交通比以前更方便，可以拍拖兩個人趁週末假期去澳門快閃一日遊。唔少人都會問到底搭車定搭船好，其實香港去澳門現時有4大實際方法，搭船係咪一定最貴？搭車又係咪一定最快呢？即刻睇睇邊個最適合自己啦！

香港去澳門方法（1）﹕港珠澳大橋金巴

港珠澳大橋通車後，金巴就係港人去澳門最常見嘅交通方式，皆因車費較平，而車程亦睇落最快，毋須1小時就已經可以從香港口岸抵達澳門口岸。據E.A.Two實測車程計算，點對點時間大概係35至45分鐘，由08:26開車至09:10落車，自己計實際時間。金巴最大優點係24小時都有金巴往返香港至澳門，每班次大概等付候10至20分鐘，有雙層巴士、單層巴士及旅遊巴random出現。

只要乘搭巴士前往港珠澳大橋口岸，就可以轉乘金巴前往澳門，但要留意有分「港澳線」及「港珠線」。雖然可以預先透過金巴官網購票，但其實無需要提早購票，於口岸可以直接購票，全為電子化，並無人手購票櫃檯，可以用八達通付款。金巴日間車費每程為人均HKD65﹐來回就需要HKD130；夜間車費每程人均則為HKD70，來回就要HKD140。

於實測路線計算，前往港珠澳大橋大致上有兩個方法，第一係乘搭港鐵欣澳線至欣澳站，再轉乘巴士專線B5，直達總站港珠澳大橋口岸，價錢相對較平，但就較麻煩；第二係編輯覺得較好嘅方法，就係直接乘搭來往香港國際機場嘅龍運巴士路線，即係A車，車費較高，但就一程直達較方便。如果以旺角鬧市為例，乘搭A21至港珠澳大橋，需時大概30分鐘，車費為HKD34.6；而從旺角鬧市至欣澳站，再轉乘B5車，需時約45分鐘，車費為HKD15.9加上HKD6.1。

另一點需要注意嘅地方，轉乘金巴前往澳門口岸之後，落車地點位置偏遠，與市中心有一大段距離，必須轉乘澳門巴士路線101X或102X，而該路線返回市中心需時，以亞馬喇圓地為例，大概就需要至少30分鐘，因為中途站多，路線迂迴曲折。而澳門巴士若以現金付款，每程為原價HKD6；現時使用澳門通則有半價優惠，每程僅約HKD4。另外，都可以選擇轉乘酒店發財車，可以免費乘搭，於該酒店落車。本身E.A.Two都以為發財車有排等，但以澳門十六浦酒店發財車為例，回程實試後發現其實人流甚少，而車程更快，中斷唔需要停站，15分鐘就直達大橋澳門口岸。

香港去澳門方法（2）﹕金光飛航

對香港人來說，去澳門最普遍同最熟悉嘅交通方法應該都係金光飛航。搭船過澳門係以前港人會使用嘅交通工具，現時依然尚存，可以從上環港澳碼頭直達氹仔客運碼頭，以往搭過嘅好清楚，船程約需50分鐘至1小時，同以前無咩分別。

金光飛航每班次大概30分鐘至1小時，去程最早班次為07:30，回程最夜班次則為23:59。只要直接於上環信德中心3樓303B號金光飛航櫃檯購買或換領船票，不過要留意金光飛航係藍色，而非紅色，金光飛航櫃檯只係位於一角，為人手購票櫃檯。來往澳門船票平日人均HKD175，週末假日則為HKD190，夜航就需要人均HKD220，來回人均需HKD350至440。

搭船過澳門，雖然係較搭車貴，但最大優點係節省時間，落船位置係氹仔，比較接近澳門市中心。除咗可以轉乘澳門巴士路線26、36、AP1、MT1、MT2，目前澳門全新輕軌已經開始營運，更可以乘搭輕軌路線去氹仔市中心，15至20分鐘就可以直達氹仔酒店賭場群，例如威尼斯人、巴黎人、倫敦人，甚至可以去到官也街，交通方便。

好多人覺得搭車好過搭船，若居住港界西或九龍區的確無錯；但如果居住港島區，就絕對係搭船好過搭車，因為既可以慳返過海車錢，又要以慳返時間。由中環市中心去上環計，電車每程人均HKD3，可以去到西港城站，再徒步去信德中心搭船。若從旺角市中心去上環，一程巴士路線905人均HKD11.4，需時約15至20分鐘。

香港去澳門方法（3）﹕噴射飛航

搭船除咗金光飛航，另外重有噴射飛航，如要簡單分辨，就係分別以藍色同紅色為主調。紅色嘅噴射飛航同樣可以於上環港澳碼頭上船，但落船點就多數位於外港客運碼頭，位置近澳門漁人碼頭、澳門金沙酒店、回力海立方娛樂場。

至於以前可以去九龍區上船嘅尖沙嘴中港客運碼頭，現時就只係得09:30一班去程船同17:15回程船，九龍區朋友無需要過海。另外，其實重可以去香港國際機場出發去灣門，不過機場需HKD297，價錢又貴，每日只有一個班次，而且應該無咩香港人有呢個需要，故此亦無需要特別講，有需要自己再查官網。

若乘搭噴射飛航，船票基本上同金光飛航無異，平日都係人均HKD175，週末假日都係人均HKD190，而夜航班之同樣係需要人均HKD220。落船後，可以乘搭澳門巴士路線3、10A、12、28A等來往市中心。既然價格相同，船程亦無異，咁就要睇行程上係需要前往澳門半島定氹仔一帶，如果係遊走澳門島，咁就應該乘搭噴射飛航。

香港去澳門方法（4）﹕香港直通巴

除咗港珠澳大橋金巴、金光飛航、噴射飛航，其實重可以乘搭港澳直通巴士來往香港至澳門，比如係環島中港通、永東巴士、港澳快線。直通巴係金巴以外嘅陸路選擇，從香港九龍市中心出發，可以直達澳門熱門酒店，點對點直達，車程大概係2小時。

如果從香港出發，可以於太子上海街、鑽石山荷里活廣場、觀塘APM、葵芳新都會廣場、尖沙嘴圓方上車。每一班次落車地點不一，可以於新葡京、澳門金沙、澳門美高梅、銀河、威尼斯人、皇冠假日、巴黎人、回力等酒店落車。乘搭直通車來往香港、澳門，一程過可以到達澳門市中心。不過，直通車班次較金巴、金光飛航、噴射飛航少，最早班次為09:00，回程服務時間最遲約為22:00但價錢上，人均每程需要HKD160至180。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 金光飛航時間表﹕https://hk.cotaiwaterjet.com/ferry-schedule/hongkong-macau-taipa.html；噴射飛航時間表﹕https://www.turbojet.com.hk/tc/routing-sailing-schedule/hong-kong-macau/sailing-schedule-fares.aspx。

❷

❸

❹