【澳門美食】最美世記咖啡分店！正對南灣湖景望旅遊塔歎鹹牛肉厚多士／樽仔奶茶／瓦煲咖啡

澳門「世記咖啡」係香港人必定好熟悉嘅澳門產物，大多數人都會去大三巴店、氹仔店，甚至議事亭前地附近分店。當中有一間係好多人情侶拍拖兩個人去亦未必留意過嘅分店，皆因位置隱蔽，但該分店大門口卻正對湖景，更可以近距離望「澳門旅遊塔」，絕對可以叫最美「世記咖啡」分店！

「世記咖啡快餐」其中一間分店座落南灣湖畔，大門口及門口窗邊位更可外望南灣湖景，餐廳裝潢佈置雖然呈懷舊風，但湖景令環境寫意非常！而呢間分店竟然比較少遊客前往，既唔係外賣店，又有得慢慢坐，更加唔使排隊。從身邊客人嘅語言可以聽得出，大致上以澳門人居多，有機會係唯一澳門人多過遊客嘅「世記」分店。

「南灣湖」位處澳門半島南端，為當地一個最大嘅人工湖，面積比旁邊嘅「西灣湖」大，同樣鄰近「澳門旅遊塔」。從「世記咖啡快餐」門口眺望，可見「澳門旅遊塔」嘅玻璃子彈升降機，該塔有338米高，據悉60米可登頂，更可360度俯視全澳門！

相信大家對於1965年創立、擁有59年歷史嘅「世記咖啡快餐」美食選擇都好熟悉，故E.A.Two亦不便多講，只係簡單講吓我哋當日於南灣店食過嘅小食。講到「世記」人氣之選，當然係厚多士、奶茶、咖啡，但編輯發覺澳門人似乎食意大利麵或撈丁麵多過厚多士。

「世記」價格有如香港茶餐廳，但多年來依然保持一定水平。其中，豬扒包、鹹牛肉厚蛋多士MOP20、花生奶油西多方塊MOP32/4件係唔少人朝聖嘅小食，厚多士由兩塊厚切麵包夾住餡料，兩塊麵包加埋可能有5至6cm厚！多士內有鹹牛肉﹐夾雜金黃色炒滑蛋，滑蛋為半熟狀態。入口有炒香過嘅鹹牛肉，蛋香味亦濃，加上外面微脆、內裏鬆軟嘅厚多士，的確係有吸引力。而意大利粉、撈公都係比較受當地人歡迎嘅選擇，甚至係滑蛋牛肉飯、雞扒飯等，其中重有五香肉丁魚片撈公MOP30。

飲品最受歡迎嘅係秘製香滑奶茶MOP21、瓦煲咖啡MOP22，除咗用瓦煲去煮嘅咖啡引人朝聖，樽仔奶茶上亦寫有「世記咖啡」，嘜頭明顯，奶茶的確滑溜，有茶香，甜度唔算高，淡奶、紅茶比例恰好。不過，曾經試過台灣一間唔太多人知嘅茶飲店嘅紅茶﹐比澳門呢間人氣奶茶更滑。而「茶冰」凍檸茶MOP20 亦不容忽視，檸檬味、紅茶味皆濃，唔會好甜，依然以傳統方法製作，重有原味茶冰，唔係改用手打檸檬茶啲騎呢味。