【路環景點】路環市區都有沙灘？澳門南端小漁村打卡彩色教堂／葡式圖書館／日落碼頭｜附交通方法

幾年前，澳門路環因一排排彩虹屋成為網紅熱點，吸引唔少遊人前往打卡。現時路環彩虹屋雖然已經消失，但呢個南端小漁村嘅彩色教堂及葡式圖書館依然屹立不搖。去路環除咗食葡撻，海旁散步亦係適合情侶拍拖兩個人嘅路線，一端碼頭更加係觀賞夕陽西下靚景之地。

路環交通﹕

路環本身係澳門四大區之一，澳門新城區路氹城以下嘅基本上都屬路環區，涵蓋黑沙、九澳、竹灣及路環市區，由於三面環海，背靠山巒，環境優美，故有人稱之為澳門後花園。不過，其實路環本身只係一個島嶼，只係後來因填海而同路氹城相連。

要前往路環市區一帶，只需要乘搭巴士路線15、21、21A、25 、26或26A，至「路環市區站」落車，位置近「恩尼斯總統前地」、「路環市政街市」。由氹仔前往路環，車程約30分鐘，而由澳門半島前往則需約45分鐘。每程巴士車程人均MOP6，使用澳門通更可享半價優惠，即係MOP3。不過，要留意多數巴士首班車、末班車時間分別為06:00、23:30，可下載「巴士報站」app查詢巴士確實位置。

路環市區景點（1）﹕路環聖方濟各聖堂

路環「彩虹屋」雖然已經被封閉，但其實依然係一個海邊童話風小鎮。其中，主要街道內設有「聖方濟各聖堂」，教堂設計似中世紀歐洲風格，似巴洛克式。純白色牆身加上橢圓窗戶，設計獨特，中間重有座鐘樓。兩端亦設有圓弧走廊，教堂前黑白階磚地板充滿葡式風格。雖然教堂設計打卡味濃，但不失其莊嚴肅穆。

路環市區景點（2）﹕路環圖書館

同樣位於路環市區、毗連教堂嘅「路環圖書館」，地方有限，只係路環居民嘅小巧圖書館，館內藏書量並唔多，據悉唔夠10000冊，但設計卻甚具特色。圖書館裏裏外外盡現葡式風格，外牆為米黃、白色相間，窗框呈綠色，屋頂則有三角形花狀突出。

圖書館以六支柱樑構成迴廊，柱頂有雕塑花紋，設計古樸優雅，又帶有簡潔溫馨感。呢座圖書館前身其實係一座路環公局市立學校，建於1911年，直到1983年先改建成圖書館。以圖書館嘅面積可見，基本上地方只係得大概百幾呎，睇嚟都算係一間面積頗細小嘅學校。

路環市區景點（3）﹕十月初五馬路

路環以往係一個小漁村，有唔少棚屋，就似迷你版大澳，甚至香港。而當中亦設有造船廠、發電廠、水泥廠，九澳更設有油庫及貨櫃碼頭。現時路環一帶以「十月初五馬路」呢條臨海街道最為人熟悉，都係由於以往廿幾年前嘅電視劇《十月初五的月光》於澳門取景。不過﹐「十月初五」其實係指昔日葡萄牙推翻帝制，革命成功，故特別紀念呢個日子。而呢條毗連大海嘅小路，就被稱為最落日馬路！

至於「十月初五馬路」附近一帶，除咗有一間又一間廟，比如係「天后古廟」、「譚公廟」，週邊更有唔少壁畫，展現昔日漁村風情，目前以「路環巷里」算係擁有較多彩繪壁畫嘅巷弄，打卡必到！另外，路環市區內亦有唔少騎呢街道名，包括「情人巷」、「美女巷」、「老人巷」、「雞公圍」、入便街」、「日光圍」，有時間不妨一一探索吓呢啲古靈精怪嘅街道名啦。

路環市區景點（4）﹕路環沙灘

路環島擁有自然風光，週邊有古蹟保留，又有古色建築打卡，但就無喧鬧嘅車輪及人群，而古樸小漁村味道亦未有隨時間消失。雖然澳門官方於路環島列有兩個認可沙灘，包括「黑沙海灘」及「竹灣海灘」，但其實路環都有個小沙灘，更少人前往，只係唔係一個正式沙灘。

小沙灘位置鄰近「十月初五馬路」盡頭」嘅「譚公廟」，後面往竹灣方向嘅「鄉村馬路」有個海邊小路口，能通往呢個小沙灘，有興趣不妨兩個人靜靜哋逛無人沙灘漫步一下啦！

路環市區景點（5）﹕路環碼頭

走過路環市區每個角落後，如果剛巧係黃昏時份，記得一定要轉入路環碼頭，欣賞碼頭日落餘暉先至離開呀！碼頭就係路環沙灘嘅另一端盡頭，該碼頭曾為澳門公眾碼頭，只係現時已經無咩大作用，無貨船來往，恍如被廢棄一樣，只係見到好多釣魚郎，以及岸邊被海浪一直拍打。路環碼頭目前已經變成釣魚地，賣海味，甚至係觀賞日落嘅好地方。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 路環週邊有唔少咖啡室，行到攰可以隨時坐低休息吓。

❷ 路環十月初五馬路上嘅澳門彩虹屋已經無咗好耐，本身位於鹹蝦巷、音調巷之間。只係得返路環巷里等壁畫巷。

❸ 小沙灘並唔係正式泳灘，因為澳門正式沙灘只係得兩個，路環市區呢個只係一個極細小、可以散吓步同坐吓嘅沙灘。

❹ 建議同竹灣路線一齊行，而黑沙路線就視乎時間。