土瓜灣啟岸隱藏高水準手打牛漢堡！Cutting Onion炸物出色前身係包販子？

土瓜灣近紅磡有一個叫啟岸嘅商場，樓上為住宅，下面為商舖，地方不大，內有數間餐廳，當中隱藏一間樓上舖，主打漢堡包，價錢上雖然較高，但炸物及burger皆有一定水準，值得拍拖兩個人一試。

以「Cutting Onion」命名嘅漢堡包店，據悉前身為「包販子」，同樣主打漢堡包，於2022年先進駐土瓜灣商場，今次就繼續賣burger。店內主食有漢堡包之餘，亦有意粉，另重有多款小食炸物及甜點，包括懷舊雪糕糖蔥餅$50、陀地西多$66等。小店星期一至五會平啲，每人都可享有飲品套餐優惠，而星期六日及公眾假期雖無直接附送飲品，但都有個叫「咳停一人餐」﹐挑選主食後，可選擇加小食，即會附送飲品，而啤酒咖啡就正價減$20。

該店位於啟岸商場樓上舖，需要刻意登上扶手電梯，再穿梭商場，方才到達。「Cutting Onion」特別設有落地大窗戶，引光入室，同時增強空間感，故室內座位皆甚舒服。

除咗主打咖啡及啤酒，亦有茶品、汽水等可以選擇。咖啡有兩款，皆為冷泡咖啡，包括老黃咖啡$70，為冷泡式手沖咖啡，以冷壓模式將咖啡保存，令咖啡味維持，而咖啡又唔會帶有苦澀味，冷壓咖啡入口就好似飲茶一樣。值得一提，店內嘅茶品係crossover另一間小店「想爺爺了」，該店本身位於觀塘，以茶品為主打，店內可坐於榻榻米上歎茶。入次就嘗試白蘭花綠茶$45，最初綠茶內無乜白蘭花味，但後來浸泡耐啲，白蘭花香味漸出，飽餐後正好解解膩。

小食款式不少，先揀鹽酥菇$40、勁樂雞3隻$40，方才發現店內嘅炸物頗為香濃惹味。鹽酥菇內為秀珍菇，外皮以脆卜卜麵衣包裹，顛覆菇菇印象。感覺就似西貢一間小店嘅「炸Oreo」，詳情請自行翻查eatwo西貢美食。而勁樂雞就有如連鎖店嘅麥樂雞，一嘗之下亦發現原來一直以來只係連鎖店做壞規矩，真正嘅呢種小食根本惹味非常。勁樂雞內裏確確實實係雞肉，而非唔知咩肉，肉質上亦可以食到肉絲。勁樂雞外皮同樣以一層薄薄麵衣包裹，外面脆卜卜，內裏則有雞肉感，蘸上沙律醬更為味道昇華。

而店內主要售賣嘅為漢堡包，包括招牌手打牛肉漢堡$138、炸雞包$88，甚至有泰式冬陰功酸辣沙葛炸軟殼蟹包、北京填鴨包$78等。基本上漢堡包內均有一片蔬菜、一片鮮蕃茄及蛋黃醬，麵包亦經過烘烤，表皮有牛油香，內裏極鬆軟，口感獨特。據悉，該店麵包為自家製嘅Brioche，故較深色，而且有幾分小麥香味。最值得一讚係以籤串連，而且串連後唔會容易散開，一邊食漢堡包亦唔會一地都係。

炸雞包內有一塊炸雞肉，外脆內軟，不過炸雞入口有啖啖咖喱香，而且係印度咖喱風味，故此有如一份印度炸雞。而店內主打嘅則為手打牛肉漢堡，上面更附送兩塊炸洋蔥圈！炸洋蔥圈絕對係點睛之筆，不僅油香十足，亦帶有微酸，感覺清爽，洋蔥圈甚開胃。相比將洋蔥放入burger內，美感及味道兼備，心思十足。而手打牛肉漢堡內有牛肉漢堡扒，據悉係採用Rump Cap（牛臀肉蓋）嘅部位，故牛肉入口軟腍，特別有肉味，而且油脂香十足。漢堡扒既有焦香，內裏亦充滿肉汁，漢堡扒上再加上一層半熟芝士及蛋黃醬，添上奶香味，同時亦增添邪惡感。