【澳門後花園】葡京人3間一字排開咖啡店絕美日落勝地 MOSS Coffee House／Rethink Coffee Roasters／Cotiz

「澳門葡京人」雖然座落路氹以東，位置偏僻，但其中有個空間就係澳門後花園，3間咖啡店一字排開，環境僻靜，黃昏日落時更恍如飛越洛杉機置身電影《La La Land》，情侶拍拖兩個人不妨去Chill一下！

該打卡位有大大個「Lisboeta」英文字裝飾，代表「Lisboeta Macau」，即「澳門葡京人」。3間咖啡店就位於呢個巨型招牌旁邊一字排開，隨意任揀一間都可享相同景色。本身「葡京人」商場係以60年代為主調設計，盡顯舊時代風貌，穿過一個懷舊風格嘅商場，自然可以抵達呢3間咖啡店，上空可見有人玩「澳門飛索」。

澳門葡京人咖啡店（1）﹕Rethink Coffee Roasters

第一間葡京人咖啡店係位於3間咖啡店之間嘅「Rethink Coffee Roasters」，該店於2015年建立，以精品咖啡店為主，更有自家烘焙工場。該咖啡店至今有9年歷史，「葡京人」分店位處「Fun Factory 娛樂廠」出面，門口可見大大個雪糕裝飾，入面雪糕MOP30起，分大小杯裝，但不時無雪糕賣。而該店係3間咖啡店中最早收舖嘅一間，日落未到就準備閂門，所以想買呢間就要預早前往！

門口寫有一款叫「Wafflochi」嘅甜品，更寫明「The waffle of buttery and chewy」，大件賣MOP40，4小件賣MOP30，窩夫上為雪糕球。而飲品有茶、檸檬梳打、黑咖啡、意式咖啡，一杯咖啡都係約MOP35至65，價格不過不失，不過太早收舖，當日黃昏時間未能一試。該店於澳門另外重有3間分店，包括巴黎街、澳門百老滙、栢林街，但「葡京人」分店就係景色最美嘅一間。

澳門葡京人咖啡店（2）﹕MOSS Coffee House

毗連「Rethink Coffee Roasters」嘅「MOSS Coffee House」，同樣係位於「葡京人」範圍，亦喺「Fun Factory 娛樂廠」外嘅咖啡店。呢間咖啡店係3間當中，最接近彩色巨型「Lisboeta」招牌嘅一間，地方空曠，黃昏時景色絕美！

「MOSS Coffee House」嘅「葡京人」分店其實係同「Grab Grab Store」聯乘合作，所以店內同時見到好多單車，因為另一間店係以運動、健康、環保為主打。目前，呢間咖啡店於室內打造咗一個小步車咖啡區；而室外就係露天茶座，任君選擇。該店於「三盞燈」設有分店，都係以日式簡約風格為主調，配以綠色植物裝飾，似乎想營造一個城市綠洲。

「MOSS Coffee House」主打係咖啡，除咗一般黑白咖啡，亦有手沖咖啡，更有非咖啡嘅選擇。店內有少量輕食，例如係芝士豬扒菠蘿包MOP50／2個，加MOP10多一杯凍檸茶。其中，有款新推出嘅伯爵檸檬茶MOP38，以伯爵茶為茶底，配搭酸爽檸檬，入口清新，配搭鹹蛋炸蝦片MOP22原來頗為適合。本來編輯打算試400轉焦糖拿鐵MOP35，發覺有一款貌似新出嘅椰子凍黑水MOP48，感覺有如泰國曼谷「Nana Coffee Roaster」嘅椰青咖啡。不過，理想與現實始終有別，該店嘅椰青咖啡並非泰國嗰種咖啡有上、椰青水在下，反而係將椰青水同咖啡直接融合，雖然都係利用椰青水天然甜品，亦算唔錯，但就難同泰國咖啡店相比。

澳門葡京人咖啡店（3）﹕Cotiz

至於「Cotiz」，就同樣位於「葡京人」範圍，亦係「Fun Factory 娛樂廠」門口外嘅咖啡店。該店係3間咖啡店中人流最多嘅一間，連外面露天座位都坐滿人，只係距離巨型「Lisboeta」招牌最遠嘅一間。

原來呢間咖啡店設計係來自於日本京都，室內外都係簡約日式風格為主，甚至有唔少文創產品。該店唔單止有提供咖啡，最具人氣嘅係其自家烘焙甜品，例如係Croffle、酥皮泡芙、梳乎厘班戟等。該店於南灣大馬路都有分店，一間望南灣湖景，另一間就望空曠嘅夕陽西下景。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭澳門輕軌氹仔線至「東亞運站」，徒步約8分鐘即達「澳門葡京人」。而乘搭巴士路線35、51、59、MT4、N5至「溜冰路/葡京人站」，落車即達「澳門葡京人」。

❷ 酒店賭場設有免費穿梭巴，即發財巴，可以來往「澳門凱旋門」、「外港客運碼頭」、「氹仔客運碼頭」、「永利皇宮」。如果想去澳門半島方向，建議行過隔離「葡京人」，該酒店賭場發財車可以直達「新葡京酒店」。

❸ 3間咖啡店位於同一個位置，如果一間關門，都可以去另一間，外面露天座位正對「Lisboeta」字樣裝飾。

❹