【澳門玩樂】輕軌站直達！隱蔽體育館大玩網球／射擊！實試超平$20局保齡球／$30打壁球／$10打乒乓球

情侶拍拖兩個人去澳門唔知玩乜好？今次E.A.Two就帶大家去澳門打保齡，實試於澳門一個偏僻而隱蔽嘅體育館打保齡，該場館可以打壁球、網球、打乒乓球，重可以玩射擊。原來喺澳門打保齡，每局最平MOP20，唔使澳門身份證，香港人都可以玩！即刻睇吓地址同各個項目收費詳情！

鄰近「澳門東亞運動會體育館」嘅「保齡球中心 / 網球學校 / 澳門國際射擊中心」，位處路氹城體育館大馬路，同一日隨時打保齡、打網球、打壁球、打乒乓球、玩射擊，一個地方同時可以滿足幾個願望。而且澳門輕軌站比巴士站更近，出站後即達，交通方便！

以「保齡球中心」為例﹐早於2000年中已開放公眾，該保齡球場樓高3.5米至4.8米，分成兩層，更加係全澳門唯一擁有24條國際標準嘅保齡球道，係國際賽事標準嘅保齡球場。想要打保齡，甫踏入門口後，只要直行至樓梯位置，就會聽到打保齡球嘅聲音，上行一層即達保齡球場！

保齡球場地方偌大，據悉有超過5000平方米，而保齡球道及計分牌都係標準模式。至於保齡球數量亦充足，有大有小，最細有6號波，最大至少有16號波。於該保齡球場打一場保齡，價格相宜，每局只係MOP20，但只張夜晚7點前。因為該保齡球場係分日間同晚間收費，09:00至19:00每局MOP20，而19:00至22:00每局則為MOP30，至於租鞋費則為每人MOP3／對。

而保齡球場下面就係地面入口處，入口左邊係壁球場，場內有3個場可供租用，3個壁球場上面就係觀眾席，整個場樓高5.65米，地方較保齡球場細，面積大概只有187.2米。而入口嘅右邊，就係乒乓球場，相對於保齡球場同壁球場，乒乓球場係最多檯嘅一個場，起碼有15張檯同4部發球機，但基本上係無人玩。壁球場MOP30就可以租用一次，而乒乓球場就MOP10玩一次。原來場內重有個運動體驗區，可以試吓動感跑步、互動單車、模擬射擊、足球機、康樂棋同氣墊波檯，不過位置好似唔明顯，似乎係位於房間內，編輯未有搵到。

至於網球場同射擊場，則位於戶外位置，並非處於室內，需要開門就到外面先會到達。呢兩個場都係比較少人，因為全場最多人玩嘅係保齡球。呢個「澳門國際射擊中心」地方偌大，有超過50000平方米，內裏有10米靶場、25米靶場、50米靶場，更有決賽館同管理中心，同保齡球場並唔係同一個場內。每一條靶場都有唔同收費，但日間同晚間收費大多無異，10米靶場就MOP20，25米靶場就係MOP50，50米靶場就係MOP30，不過每條靶場都要加MOP300冷氣費。據悉，該場館嘅射擊場同保齡球場一樣，都係符合國際標準，非常專業！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭澳門輕軌氹仔線至「東亞運站」，出站後於B出口徒步1分鐘即達，認住門口個白色波波標誌。而乘搭巴士路線50至「東亞運/保齡球中心」，同樣落車徒步1分鐘即達。

❷ 留意該體育館唔係全日開放，週末假期時間會長啲，但平日就唔開朝早，只係由下晝起開放。

❸ 可以walk in，但打保齡就有機會要坐低等一陣。必須於一開始就講打幾多局，因為人多排隊就無得再更改。

❹ 打保齡租鞋費只係MOP3／對。