【高鐵環台遊】實試便利店自助取高鐵票！落機隨時攞飛、唔使去高雄左營站！全家／7－11／萊爾富／OK適用！

個個都搭高鐵環台，唔通個個都想去次次搭過去高鐵站取票咩？現時搭高鐵，想預早攞定飛，唔使一定要去高鐵站取票，甫落機就可以依自己行程走，直接喺附近便利店取高鐵票，更方便情侶拍拖兩個人去旅行！高雄係香港人搭廉航最平嘅台灣落機位置，今次E.A.Two就實測去高雄便利店自助取高鐵票，原來唔使專登搭去高雄左營站，全家、7-Eleven、OK、萊爾富都適用！

從高雄國際機場落機後，轉乘高雄捷運紅線，由「小港站」起步，需要搭14個站，先可以抵達「高鐵左營站」，車程至少約30分鐘。如果想預先取票，就似乎有啲浪費行程時間；若臨上車先取票，又怕有咩意外發生。

事實上，即使係香港人，都唔使一定去到「高鐵左營站」先可以取高鐵票。皆因目前去台灣便利店已經可以自助取票，只要事前於官網預訂高鐵票，就能夠前往最就腳嘅便利店自助攞飛，快捷方便！

今次E.A.Two依行程走，第一站係「信義國小站」，從捷運紅線轉往橙線，只係前往景點附近嘅「全家便利店」，搵到部自助取票機，就可以自己取高鐵票。據悉，可以自助取票或購票嘅台灣超商目前已有超過8500間，所以真係梗有一間喺左近。

部機以綠色為主色，上面寫住「FamiPort」，畫面顯示有8個選項，基本上取高鐵票只係需要搵「票券」一欄嚟撳就得。事實上，撳完「票券」，會發現呢部機唔單止可以取高鐵票，連台鐵票、客運票等都可以自助取票。而購票方面，每次則最多可以購買5人嘅票券。

然後撳「查詢／付款取票」，再輸入返喺官網訂票之後出現嘅「訂位代號」，號碼有8個字，再按「確認」。屆時，畫面會出現你喺官網所訂嘅資料，包括車廂、車次、行程、出發時間、票數及價錢等。

核對資料正確無誤之後，就可以撳「列印繳付單」，張單據列印出嚟後，記得要喺期限內去櫃檯完成餘下手續。呢部自助機所列印嘅一張幾長嘅票券，只係一張好似平時買嘢會收到嘅單據，謹記唔要丟掉，並且要馬上去便利店櫃檯換取高鐵票。

不過，便利店取票就要收手續費，每張價錢為TWD10，兩個人兩張票就需TWD20，換言之大概係HKD5，早鳥期間8折已經平咗，專登搭車去「左營站」取票都要車錢，畀呢2.5或5蚊都無乜所謂啦。

於便利店所取嘅高鐵票，同喺「左營站」自助售票機直接取嘅高鐵票唔一樣。便利店自取嘅高鐵票，頂頭會寫住該便利店嘅名稱，例如係「全家Family Mart」，真實票券上會列明班次、日期、時間、座位等資料。官網雖然要實名登記，但票券上一樣唔會有人名。

至於去「高鐵左營站」直接取票，則只係需要去自助售票機，取票輸入返訂位資料，然後部機就會直接列印高鐵票。票券係傳統高鐵票，唔需要另外再畀手續費，上面清楚列明所有資料，但同樣唔會顯示人名。票券上同樣有個QR Code，而QR Code就係用作入閘之用。

台灣高鐵有12個車站，包括高南港、台北、板橋、桃園、新竹、苗栗、台中、彰化、雲林、嘉義、台南、左營（高雄）。由高雄左營站起步，大概20分鐘可以到達台南；由台南去嘉義，同樣係約20分鐘；而約30至35分鐘，就可以從嘉義前往台中；而由台中去台北，車程就大概為1小時。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 高鐵時刻表及票價在此﹕https://www.thsrc.com.tw/ArticleContent/a3b630bb-1066-4352-a1ef-58c7b4e8ef7c。可以官網預訂，或者去高鐵App「T express」預訂都得，但App預訂就用QR Code入閘，官網預訂再去取票就有實體票。

❷ 可以於Klook或KKday預先買票，有機會平啲，網址在此﹕https://www.klook.com/zh-TW/rails-24/1014-taiwan/route-669/taipei-to-zuoying-trains/ 或https://www.kkday.com/zh-hk/product/100299-foreigners-only-taiwan-high-speed-rail-ticket-taiwan。不過，價錢唔係爭好多，最穩陣都係喺官網買飛。

❸ 去到便利店，只要搵到部綠色嘅自助取票機就可以入資料﹐完成後得張收據，必須去櫃檯換返張實體票先得。

❹ 部機未必一定間間有，只係而家好多便利店都會有，全家可能穩陣啲。