【墾丁交通】免自駕、高雄去墾丁CP值高方法！實試墾丁快線、墾丁街車一日遊走勻6大景點！

由高雄去墾丁，除咗可以自駕，其實拍拖兩個人都可以選擇另一個方法。唔需要租車自駕，都可以乘搭墾丁快線，以最平嘅方法從直達墾丁！去到墾到之後，乘搭墾丁街車，都可以遊走墾丁多個知名景點。呢個方法其實唔太多人使用，不過E.A.Two就覺得用在墾丁一日遊其實幾實用，實試可以一日遊走6個景點，從墾丁走到恆春都無問題！

墾丁快線

想要搭墾丁快線，最穩陣可以預先於kkday或klook預訂車票。根據經驗，預訂其他大嘢未必肯定100%無問題，但預訂細嘢通常都無問題。預訂墾丁快線時，可以同時預訂埋墾丁街車。如果單單預訂墾丁快線，每人每張票為TWD600，折合港幣為HKD150，而網上預訂大概係港幣HKD143，該價錢只係包括墾丁快線。

抵達高雄後，其實可以於2個地點換領墾丁快線票券，一係高雄小港機場，二係高雄左營站。建議去左營站取票，反正上車都比較方便，到時只要於高鐵左營站2號出口出站，找尋一個墾丁快線服務櫃檯就得，取票時會同時攞晒來回車票。要注意櫃檯並非24小時服務，開放時間只限09:00至17:00，所以唔好以為夜晚預先去取票翌日就更快捷方便。

上車地點就喺扶手電梯下面近右邊位置，墾丁快線車身頗為明顯，所以應該好難認錯。上車時只要憑票券就可以乘搭來往墾丁嘅客運。不過，去程同回程都要留意墾丁快線發車時間，高雄左營發車時間最早由08:10至最夜19:10；而墾丁發車時間則為08:00至19:10，部份班次會經過大鵬灣，好多都係隔2至3個鐘先有一架車。

高雄左營站有指示前往墾丁快線上車點，墾丁快線採用嘅係國光客運，從高雄高鐵左營站出發計算，會經過約9個車站，包括枋寮、車城、海生館轉乘站、恆春、南灣、墾丁(小灣)，車程就大概140分鐘，即預計要2小時多少少。塞車另計，當日好彩無塞車，所以暢通無阻，比預計時間早到達台灣最南端墾丁呢個目的地。

墾丁街車

預訂墾丁快線時，如果並無打算於墾丁自駕遊，建議同時預訂埋墾丁街車，因為每人每張票其實只係TWD150，而網上預訂則僅為HKD36，價錢就有分一日券同二日券，前者為HKD36，後者則為HKD60。預訂時，可以先留意吓墾丁街車會經過嘅景點，如果有好多地方想去，買二日券其實係抵啲；但若然計過度過唔使去晒啲站數，其實一日券都足夠，因為價錢又未至於相差好遠。

而墾丁街車同墾丁快線取票點基本無異，建議可以同時高雄左營站取票會比較方便。只要手持墾丁街車票券，就可以於當日無限之乘搭墾丁街車，遊走墾丁多個主要景點。如果唔買墾丁街車一日券或二日券，上車係需要逐之收費，屆時就唔係幾化算。

選擇墾丁街車時，需要先留意自己想去邊啲景點，因為墾丁街車其實有分唔同路線，大致上會用顏色嚟區分。比如橙色就係來往鵝鑾鼻至悠活，藍線、綠線分別來往恆春至貓鼻頭、佳樂水，而黃線就係來往海生館至四往溪，至於另外有3架車就係來往恆春、墾丁公園、興海路、鵝鑾節、水蛙窟。是次E.A.Two就選擇來往墾丁大街小灣海灘、鵝鑾鼻公園、恆春鎮，最後去埋關山睇日落。