【台中住宿】偌大窗戶正對台中火車站！路得行旅附餐券自由配搭早餐、室內設大量公共空間

到台中旅遊，最方便當然係選擇「台中火車站」附近嘅飯店住宿，今次E.A.Two入住嘅旅館正對火車站，徒步1至2分鐘即可到達大門口，非常方便，唔使怕另一半嫌行得太遠，適宜拍拖兩個人入住。旅館公共空間眾多，有免費水機同少量零食提供，早餐更可以自由配搭！

於2019年方才開業嘅「路得行旅國際青年旅館台中站前館」，係「路得行旅」嘅台中分店。該旅館距離「台中火車站」極接近，位於一幢大樓內。要留意呢種旅館並非飯店式全幢都係房間，因為大樓下層係賣電腦同補習社等用途，係一幢補教大樓。1樓重有個叫「地球村」嘅地方，只有8樓至頂樓天台先至係旅館範圍。

雖然旅館係包括8樓至13樓，但櫃檯並非設於8樓，入住前要先到12樓櫃檯大廳辦理手續，同層設有洗手間，亦有少量房間。旅館內並無提供即棄用品，需要自行到外面購買或者預先自備。如果需要自駕遊，可以同旅館講聲，因有自設自助停車場，但停車位需要另外付費。

12樓唔單止係櫃檯位置，亦有一個中島廚房，各種咖啡機、微波爐、焗爐、雪櫃、電爐可以同其他客人共用同交流，檯面重有一小籃少量餅乾零食可以自取。而上一層樓就係頂樓天台，整個空間都披滿綠植，係一個公共空間。而8樓至11樓基本上都係房間，9樓設有免費洗衣乾衣區，而8樓因為係宿舍床位模式，所以呢一層都設有共用浴室。

旅館最麻煩嘅地方係上到房間層數時，進入房間層數公共空間都必須要除鞋兼換上拖鞋，每層門口都放有鞋櫃，只要依自己房號搵返鞋櫃放鞋換鞋就得。不過，每次出入都要除鞋著鞋，換鞋嘅地方又櫈都無張，所以每次需要企喺度換鞋，真係幾煩！

進入房間之前，會經過公共空間，走廊有大量可以坐低休憩嘅地方，比如係梳化同木檯櫈，感覺係無印風格。一隅更有超長形偌大窗戶，窗戶街景正對「台中火車站」，抬頭可以直接望火車奔馳畫面，恍如電影院屏幕。只不過，多數時間公共空間都無咩其他住客，所以想搵人交流都唔容易。

「路得行旅國際青年旅館台中站前館」目前提供48間房間，設有雙人房、四人房之餘，亦有宿舍式床位可以選擇，最平每晚人均僅約HKD170就可以入住，而雙人房則約需HKD320﹐人均亦大概HKD160有交易。雙人房空間基本上幾細吓，但浴室唔細，即係三份二地方擺床，三份一地方係浴室咁上下。

雖然旅館並無自設餐廳，但最特別嘅地方就係早餐，因為翌日朝早可以自行去配搭想要食嘅台中早餐！辦理入住手續時，職員會派發早餐餐券，憑餐券於指定日子內可以到附近週邊嘅早餐店自行購買早餐，唔需要隔硬食台灣飯店啲早餐。每人基本上有價值TWD100嘅早餐餐券，兩個人入住一間房就會有TWD200，每張細心到分開咗2張TWD50，隨意配搭、方便使用，唔單止可以分2間在地早餐店，更可以分開去4間在地早餐店直接兌換使用！

旅館呢張「在地領路券」合作商舖唔單止有在地早餐店，亦有書店或體驗活動場所。提供早午餐嘅有「老骨頭飯糰」、「艾初民權店」、「弘爺漢堡火箭店」，提供咖啡或酒類嘅有「時光」、「入厝」、「孔雀咖啡」、「艦隊街咖啡」，而其他餐廳重有「花毛かき氷喫茶」、「裸．Roast溫莎拉」、「吾曹Wowcao」、「小島遇見他」，而體驗活動或手信嘅地方就有「弎學植務所」、「潮返書店」、「一福堂自由店／中山店」。

即睇【路得行旅國際青年旅館台中站前館】住宿價錢及限時優惠﹕Agoda｜ Booking.com｜Trip.com｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 入住時間為15:00，退房時間為11:00。

❷ 旅館與「台中火車站」距離僅有1分鐘步程，完全正對火車站。

❸ 夜晚從「台中火車站」折返旅館時，中途會有唔少refugees，小心啲行就ok。

❹ 旅館可以免費租借藍牙喇叭、露營燈、充電線、化妝鏡、瑜珈墊，亦可付費租借毛巾、枕頭、棉被。櫃檯更可以免費取耳塞，亦有售賣手作雪條同一啲原創產物。