營業至凌晨3點！北區舊式扒房高水準酒吧西餐廳！畢打奧/適雅餐廳足料酥皮龍蝦湯／保濕豬扒／德國鹹豬手

香港懷舊扒房愈來愈少，雖然香港商舖執10間開16間，但執吓一間又執吓一間，扒房呢一個category真係買少見少。想要拍拖兩個人搵間扒房撐吓檯腳都唔容易！今次E.A.Two前往北區一帶，發現上水有一間頗高水準嘅舊式扒房，於粉嶺都有分店！

「畢打奧餐廳」又叫「適雅餐廳」，一端為酒吧，另一端就係西餐廳，其實都係位於同一間店內；只係一邊主力賣酒，另一邊可以坐低歎西餐。事實上，呢間西餐廳係知名英式酒吧及餐廳，屬傳統英式清吧。「適雅餐廳」原名就係「畢打奧餐廳」，「畢打奧」就係來自「Better ‘Ole」，所以英文全名都係叫「Better ‘Ole Bar & Restaurant」。室內外裝潢都似足一間酒吧，驟眼睇真係唔多覺係一間西餐廳。即使踏入店內，店內都係偏向酒吧風格，燈光比較暗，但就幾柔和，只不過設有多張西餐檯櫈。

上水分店每日營業至凌晨2點，而粉嶺分店嘅營業時間就稍長，每日營業至凌晨3點。雖然係主力做酒吧生意，但西餐廳都係其焦點，因為該餐廳由1947年起營業，來自於退佐英軍Arthur Gordon，係北區一間知名度高嘅懷舊扒房。餐廳原址其實係近「粉嶺火車站」，後來於60年代轉交袁姓先生經營，變成前舖後居，並改名為「適雅餐廳」。80年代，該店再搬到聯和墟，而目前上水店就係粉嶺店嘅分店，至今有超過70年歷史。多年來，該店唔單止提供晚餐，亦有午餐、下午茶提供，只不過假日就無下午茶供應。

午餐一般比晚餐平啲，夜晚同一樣嘢大概貴$30至$40，但撐檯腳氣氛就較好。假期有全日午市套餐，附送餐湯、出爐麵包、咖啡或茶，包含麵包、餐湯、主菜、飲品，可以自行加頭盤，例如係法式焗田螺$69、煙三文魚沙律$29。套餐每人亦可升級酥皮龍蝦湯$29、酥皮尚周打蜆湯$29、雙面蒜蓉包$9、紅白酒或香檳$36或夏日特飲$39。本身套餐附送一份餐包，麵包似竹炭式，亦似另一間知名西餐廳嘅嘉頓麵包。

餐湯可選紅白湯，紅湯固然係羅宋湯，而白湯就係忌廉湯，最特別嘅地方係加入紫薯，令忌廉湯帶有紫薯香，但又唔會蓋過本身西餐廳嘅忌廉湯味。值得一提，如果一間西餐廳係有水準，建議選擇白湯，因為白湯唔係咁容易炮製得好；若然一間餐廳只係普通西餐，水平唔高，則建議選擇紅湯，因為紅湯比較穩陣，白湯容易中伏。

而另一款選擇嘅餐湯係西餐經典標誌酥皮龍蝦湯，現時比較少西餐廳會有呢款西式餐湯，因為麻煩。酥皮龍蝦湯碗上舖有一塊薄薄油香十足嘅酥皮，入口酥香，一隻匙羹篤入湯碗內，酥皮馬上浸入龍蝦湯內，沾滿湯汁。而店內嘅龍蝦湯毫不欺場，真係有粒粒龍蝦肉，而且唔係得一兩粒，總共不下五粒。

套餐主菜有牛扒餐、酒吧經典套餐、飯或意粉等可以選擇，不過當日需時15分鐘嘅半隻燒春雞$89就未能提供。所以E.A.Two只係選擇燒德國鹹豬手$129、香煎加拿大保濕豬扒$109。每一款套餐重可以揀飯、意粉或薯菜，加$9可揀薯條、薯仔沙律、或什菜沙律。另外，亦可選擇蒜蓉、黑椒、燒汁或英介，加$9更可以揀洋蔥、蘑菇、廚師精選汁，豬手比較適合配搭黑椒汁，而豬扒則較適合配搭蒜蓉汁、燒汁或洋蔥汁。