【高雄美食】西子灣4款精選街頭小食！巨型泡芙／爆多草莓蛋糕／懷舊彈珠汽水／蜂蜜蛋糕

從香港去高雄，機票一般價格較台北低，逐漸成為香港人拍拖兩個人快閃旅行嘅目的地。而西子灣、旗津都係高雄市熱門景點，今次E.A.Two就為大家搜羅西子灣一帶4款在地街頭小吃，打卡必備！

西子灣街頭小吃（1）﹕阿婆彈珠汽水綜合茶

以高雄在地飲料店嚟講，呢間「阿婆彈珠汽水綜合茶」絕對係數一數二歷史悠久嘅小店！該店只係名副其實售賣「阿婆彈珠汽水」，又叫做「綜合茶」，至今已經有超過50年歷史，係真正「古早味飲品」！

該店只係街邊一個車仔檔口，係一架小攤車，下面有碌可以成架車推走，上面招牌寫有「古早味彈珠汽水」，每支「綜合茶」就只賣TWD40！旁邊名稱頗為有趣，編輯最初以為打直睇，心諗咩叫「瓜子茶」、「珠桔綜」、「汽檸」，睇清楚原來係寫「彈珠汽水冬瓜茶、金桔檸檬梅子、綜合茶」！

簡單來說，呢種台式古早味綜合茶，懷舊味濃厚，其實係一種特調汽水，將幾款材料混合而成，在地人嘅隱藏平價飲品！明明位置係靠近遊客景點「駁二藝術特區」，但實際上好少遊客會前往購買。

彈珠汽水就似我哋飲開嘅波子汽水，但呢種彈珠汽水就唔係塑膠裝，而係玻璃樽，汽水味更能夠保存，更清涼消暑。特調汽水原來就係將彈珠汽水同冬瓜茶、梅子茶等混合，最好就係一個塑膠杯盛載，好似一般台式手搖茶飲咁。

呢杯「綜合茶」可以用新奇怪異形容，創意十足！因為入口真係新奇，味道層次複雜，係平常唔會飲到嘅味道；而怪異就係因為梅子味太搶，純粹自己唔太鍾意梅子嘅味道，不過同時係散發出一種淡雅感。

西子灣街頭小吃（2）﹕巴堂蜂蜜蛋糕

距離「阿婆彈珠汽水綜合茶」不遠處，可以搵到另一間小吃店「巴堂蜂蜜蛋糕」，該店同時係一間手信店，適宜於此處購買高雄伴手禮。

「巴堂蜂蜜蛋糕」同樣係一間超過50年嘅老店，亦係座落遊客景點「駁二藝術特區」附近。不過，唯一唔同嘅地方係該店係一間實體店，並唔係手推車小攤檔。

店內固然有蜂蜜蛋糕，亦有各式甜點，例如千層卷蛋糕、芝士蛋糕等，蛋糕可以選擇唔同尺寸，重有甜點禮盒。大門口更有大大隻字寫住「切邊蛋糕下午3:50左右供應」，但下面又同時寫住「切邊已售完」，如果想試切邊蛋糕，記得預早時間前往啦！

西子灣街頭小吃（3）﹕樹•Go eat

同上述兩間位置好接近嘅「樹•Go eat」，係一間人氣高雄甜點店，店名來自於日文「すごい」，意思係好厲害，而「樹•Go eat」就係諧音，因為該店同時以「樹」為形象。當中，有一款爆漿珍奶泡芙，極受在地人歡迎，而且係極速售馨！

該店不時有唔同口味，但珍奶味一早售完，所以我哋只能試其他口味，但都有原味、鐵觀音、優莓、咖啡口味可以選擇。珍奶味必然係最驚喜嘅選擇，但限量供應兼大排長龍，所以基本上機會頗低。呢間店其實係一間咖啡店，所以今次我哋除咗一嘗原味，重選擇咗咖啡味。

泡芙大概TWD35至40一粒，每粒大小均一，相當巨型，以小紙袋包裹，拆開後就似一個球狀，恍如一個乒乓球，但Size就比乒乓球大少少。泡芙餅皮似乎混合咗唔少材料，比如係杏仁，餅皮入口酥脆，引人入勝。

一口咬下去，泡芙內餡馬上洶湧而出，果然好似爆漿狀態，餡料順滑如忌廉，就似custard。整顆泡芙放入口，雖然味道濃烈，內餡滿滿，但似乎係低糖設計，泡芙又唔會過於甜膩，認真神奇！

西子灣街頭小吃（4）﹕新巧屋烘焙食品行

至於另一間街頭小吃就係「新巧屋烘焙食品行」，位置同上述3間雖然有一小段距離，但其實只係大概10至15分鐘步程。該店隱藏於一道巷弄之間，而且店面唔太明顯，必須認真尋找先會搵到門口！

整幢樓就似一種舊時代嘅建築設計，門口有個招牌寫住「新巧屋烘焙食品行」，以外賣為主。該店最大特色就係草莓蛋糕，完完全全以草莓為主打，每件草莓蛋糕都佈滿草莓，包括一款香草草莓爆多蛋糕，絕對係草莓迷必到之處！

店面雖然平平無奇，但其草莓蛋糕真係絕對不能錯過！草莓蛋糕豐儉由人，有大有小，當日已經接近關門時候，所以所剩蛋糕唔多，但都可見全個草莓蛋糕賣TWD800，一小件草莓蛋糕就賣TWD100，重有個名叫做「草莓公主」！整件蛋糕滿滿草莓，造型華麗，但價錢一樣可以好平實。

草莓蛋糕一般於冬季為主，每年12月至4月都係當造時間，據悉係來自於台灣苗栗大湖新鮮草莓，所以最好呢段時間前往！呢款草莓蛋糕對於草莓控嚟講，真係垂涎欲滴，小小一件蛋糕都有5粒大大粒完整嘅草莓放頂，週邊以奶油忌廉包裹住，其中1粒草莓比另外4粒特別大粒﹐紅噹噹草莓蛋糕視覺效果明顯。而蛋糕下面質感綿密，夾層同樣有切片草莓，係一款海綿蛋糕，入口唔會好甜膩。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 4間都位處西子灣一帶，交通便捷。

❷ 4間可以一次過走，大概15分鐘可以搵到晒﹕https://maps.app.goo.gl/2SQVqjjs9LwRPAig8 。

❸ 從捷運「鹽埕埔站」走出，可以先到頭3間，另一間徒步10分鐘都可以搵到，但就靠近捷運「前金站」。

❹ 記得留意營業時間！