【台中夜市】逢甲大學落車即達！逢甲夜市10款美食﹕紅茶臭豆腐／大腸包小腸、按摩雞排／惡魔雞排

「逢甲夜市」係台中知名商圈之一，係台中旅遊最常見拍拖兩個人逛嘅夜市。該夜市毗鄰「逢甲大學」，以年輕人為主，美食選擇眾多，無論係在地人定遊客，都各有喜愛嘅夜市小吃，而且價格低廉，食飽隨時人均TWD300有找！

如果唔搭的士或者call車，以前必須經公車先可抵達「逢甲夜市」，但現時台中捷運已經開通，乘搭捷運可以更快抵達夜市一帶。雖然依然需要徒步約15至20分鐘，但比以往已經方便得多。夜市曾獲在地人選為「台中市十大觀光景點」之一，夜晚時份，夜市幾條街道都滿佈人潮，據悉在地逢甲人更稱為「便當街」。

夜市早於1963年起開業，有超過60年歷史，算係台中一個老夜市。該夜市座落「逢甲大學」週邊嘅「逢甲夜市」，縱橫逢甲路、福星路、文華路，幾條街都滿佈小吃攤檔，間間價廉物美，唔少小食更加受到歡迎。於台灣《遠見雜誌》「全台夜市遊逛」嘅「台灣最美味夜市」投票中，「逢甲夜市」曾經獲選為台灣最喜愛夜市，得票率比台北「士林夜市」更高！

逢甲夜市美食（1）﹕紅茶臭豆腐

以E.A.Two最喜愛嘅「逢甲夜市」小吃嚟講，「紅茶臭豆腐」係每次都忍唔住前往嘅小吃攤檔，故此必然係私心鍾意嘅「逢甲夜市」小吃！該店嘅臭豆腐顧名思議係加份紅茶炮製，而實際上就係以伯爵茶炮製臭豆腐，所以就叫做「紅茶臭豆腐」。

「紅茶臭豆腐」位於夜市其中一個十字路口一隅，臭豆腐現點現炸，小份TWD70，大份亦只係TWD100。臭豆腐臭香撲鼻，同一般臭豆腐唔同，係以伯爵紅茶為菌種發酵，入口有啖啖伯爵茶香，旁邊再加上韓式泡菜，估唔到紅茶同臭豆腐可以咁夾。

逢甲夜市美食（2）﹕天使雞排

「逢甲夜市」有唔少炸雞排店，原先座落夜市中心點嘅「天使雞排」，現時似乎要去到近捷運站方向先會搵到間。「天使」向來形象正面，都係受到大眾歡迎嘅雞排，最先係於高雄率先爆紅，曾經獲網民票選為Number 1雞排！編輯曾經試過，雞排大大塊，厚切得有50台幣嘅硬幣咁厚，入口酥脆可口，內裏就軟嫩多汁，唔會太乾柴。

逢甲夜市美食（3）﹕逢甲地瓜球

近「逢甲大學」嘅「逢甲地瓜球」，小攤外不時有條長長嘅人龍。雖然人氣十足，但編輯曾經試過呢款地瓜球，地瓜球有幾種顏色，基本上係偏細小，亦有幾款口味可以選擇，入口卻一般般，地瓜香甜味並唔重。

逢甲夜市美食（4）﹕官芝霖大腸包小腸

講到人氣之選，「官芝霖大腸包小腸」大概係數一數二嘅小吃攤檔，於「逢甲夜市」屹立有超過15年，創始店就位於夜市一角，係一等一嘅逢甲老店，一直只係售賣大腸包小腸。

該店嘅大腸包小腸每份TWD70，有6款口味可以選擇，包括原味、小辣、中辣或大辣、芥末味、蒜味、黑胡椒味，全部都附有菜脯蛋、酸菜、小黃瓜。當中，原味就包含花生粉，內餡塞得滿滿。而大腸包小腸即係外面係糯米皮，入面係台式香腸，將糯米皮完全包裹一整條烤香腸，表面煎得微脆，口感豐富，香腸更有少少藥材香，鹹甜適中，略嫌糯米腸部份入面偏軟爛。

逢甲夜市美食（5）﹕明倫蛋餅

以古早味蛋餅為主打嘅「明倫蛋餅」，小攤檔外不時有排隊人潮，通常都要先攞號碼牌。該店標榜少鹽、少油、多蔥，以及多蛋，甚受在地人歡迎，據知蛋餅係比早餐店更出色同傳統。

逢甲夜市美食（6）﹕鹽烤蛤蜊

夜市內有唔少蛤蜊小攤，即係燒烤蜆，呢間就以鹽烤蜆肉，方法同味道都夠簡單，就咁睇都係新鮮飽滿嘅蜆肉，都係基本上唔會有伏嘅選擇，不時都有在地人幫襯。

逢甲夜市美食（7）﹕黃金右腿／黃金左腿

等待「紅茶臭豆腐」時，發現對面有間叫「黃金右腿」嘅炸雞髀店，吸引唔少人大排長龍，原來重有一間叫「黃金左腿」，兩間都係同一個老細。名稱並唔係表示前者係賣右髀，後者就賣左髀，原來右腿係指賣烤雞髀，而左腿就係指炸雞髀！

逢甲夜市美食（8）﹕惡魔雞排

去「逢甲夜市」，E.A.Two第一時間諗到嘅炸雞排店係「天使雞排」。不過，呢個世界有正必有邪，有陰必有陽，有「天使」就一定有「魔鬼」！之但係「魔鬼」唔一定係邪門嘅，於夜市間同時屹立嘅「惡魔雞排」，連外地媒體都曾經報道，更票選為必食雞排。

「惡魔雞排」唔單止於台灣有多間分店，甚至擴展至星馬等地。雞排現點現炸，基本上只係分為原味同辣味，每塊雞排為TWD90。雞排頗厚，係一款超厚雞排，炸皮大概係台式脆皮，同美式層層剝落嘅酥脆有啲唔同，炸雞排內裏都算係軟嫩，不過就略嫌唔係嗰種爆汁感覺。如果要於「天使」同「魔鬼」之間選擇，編輯會偏向選「天使」。

逢甲夜市美食（9）﹕阿月紅茶冰

位於「逢甲夜市」牌匾旁邊嘅「阿月紅茶冰」，適合用作離開夜市之前飲杯嘢解解渴，簡單一杯古早味紅茶只係TWD30，微冰少糖或唔加糖最好飲，因為有茶香嘅紅茶係唔需要加任何糖水。

逢甲夜市美食（10）﹕ET鹽水雞

對於香港人嚟講，必然對「ET鹽水雞」並唔陌生，係值得支持嘅香港小店。而「ET鹽水雞」總店就位處「逢甲夜市」內，最平TWD80就有交易，折合港幣其實即係HKD有找！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵至台中火車站，轉乘公車25／35號，於「逢甲大學站」落車即達。乘搭台中捷運綠線至「文心櫻花站」，徒步約15至20分鐘即達。

❷ 夜市營業時間視乎各攤檔，部份會提早打烊。

❸ 逛夜市嘅最佳時間為7點起，直到夜晚10點左右，呢段時間係尖峰時段，人流最旺。不過，如果想避開人流，則可以於7點前或10點後前往。

❹ 夜市門口有停車場，比如係福星停車場，不過台中市中心停車場會貴啲。