【台中牛排】近逢甲夜市！赤鬼炙燒平價半自助牛排餐廳、人均低至420台幣！

台中夜市不少，其中「逢甲夜市」就係最為人熟悉嘅夜市，亦係唔少人拍拖兩個人去台中都會去嘅熱門夜市。呢個夜市除咗小吃攤檔，週邊其實重有唔少餐廳，今次E.A.Two走入一間知名嘅在地平價牛排餐廳，人均最平只係TWD420！

位於「逢甲夜市」嘅「赤鬼炙燒牛排」，係台中嘅連鎖牛排店，分店遍佈台灣大道、崇德、大里、高雄、彰化員林，而逢甲店就第一間店舖。呢間牛排店唔單止受到在地人歡迎，獲得《Taiwan Journal》評為精選餐廳、《商業周刊》專欄報道，更入選為《時報週刊》2008美食鑑定人氣50店之一！

「赤鬼炙燒牛排」一直都係以廉價牛排為主打，室內為半自助式用餐，一隅有沙律吧，可以自取沙律菜、紅白餐湯、飲品。熱湯可以選擇含麵包丁嘅玉米濃湯、含西芹、辣椒醬、紅蘿蔔、蕃茄、牛肉粒嘅羅宋湯，鹹香十足，入口並唔油膩，更可以自由勺幾多料，平常根本唔會有咁多料嘅羅宋湯！而飲品可以選擇冰紅茶、冷泡茶、仙草甘茶，茶品清甜順口，而且好解渴。

該店基本上係採傳統西餐廳方式上菜，雖則係西餐禮儀，但牛排價格卻相當低廉，CP值高！當中，包括有高人氣嘅沙朗牛排，人均僅TWD420，亦有極黑安格斯穀飼沙朗牛排TWD1080、無骨牛小排TWD630、菲力牛排TWD470、境起司菲力牛排TWD560，最貴都只係TWD1580嘅美國Prime肋眼牛排；而非牛排類就有酥烤雞排TWD400、小羔羊排TWD750、炙燒豬排TWD400、挪威鯖魚飯TWD490等，加一份鐵板麵就只係賣TWD280。

該店裝潢雖然以黑色為主調，但座位區頗寬敞同光猛，而且有唔少卡位，唔會有擁擠感覺，而用餐環境都算乾淨企理，唔會話好多油污。不過，傍晚起入座客人不少，如果想要用餐，建議預早前往，避開餐廳尖峰時段。

坐低用餐後，點餐只需要經餐檯旁邊嘅平板就得，點選牛排之後，先選擇烹調方式，該店可以自選整塊或切塊炙烤，亦可以選擇幾多成生熟度，配搭幾多麵條。然後，可以選擇要咩醬料，比如係招牌黑胡椒醬、洋蔥醬、蘑菇醬，亦可以選擇各半混合醬。點完牛排，可以加TWD459加多份波士頓龍蝦。

菲力牛排有150g，可以加減5g，如果要雙份牛排300g，價格為TWD740，呢款牛排來自紐澳。而無骨牛小排亦係150g，同樣加減5g，如果要雙份牛排225g，價格為TWD820，產地就來自美國。如果拍拖兩個人正常點兩份餐，總數連加一服務費大概係TWD1300。

此外，牛排套餐亦包含餐包、蛋品，一方面蒸蛋、和風三分蛋可以二擇一，另一方面可以選酥脆麵包或鬆軟麵包。麵包就似平常西餐廳嘅麵包，係可以搽牛油。和風三分蛋就似流心蛋，而蒸蛋則似日式茶碗蒸。

無骨牛小排入口有濃郁牛味，而且有大量油花，油脂滿滿，肉質軟腍，帶筋又有嚼磅。而烹調時需要掌控適當時間，肉汁鎖於牛排內，入口特別有彈牙感，甚至滲出鮮甜味。牛小排配搭黑椒固然適合，但洋蔥醬反而係意想不到嘅點睛之筆，用料實在，味道更昇華。菲力牛排雖然都係軟嫩，但入口則相對係比較厚實，同樣係多肉汁，亦係適合配搭洋蔥醬、黑胡椒醬。

除咗牛排，旁邊有鐵板麵，該店介紹有兩種方法食鐵板麵，包括原味食法同古早味食法。原味食法就食趁鐵板熱焫焫時就將麵條攪拌，如果麵條冷卻，拌麵就會變硬。另一種就係古早味食法，同樣係要趁鐵板熱焫焫時動手，將韭菜、黑胡椒醬、麵同時拌炒，入口會更開胃！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受現金、信用卡。該店有收10%服務費，低消為一份餐，唔點餐就要每人收$70。

❷ 其實最好係電話預先訂位，但傍晚時份都可以walk in進入嘅。官網﹕akaonisteak.com。

❸ 該店係半自助式用餐。

❹ 赤鬼炙燒牛排逢甲店位於章魚小丸子旁邊。「赤鬼炙燒牛排」其他分店位於－台灣大道店：台中市西區台灣大道二段170號（電話﹕04-2206-0078 ）；崇德店：台中市北屯區文心路四段603號（電話﹕04-2242-9933 ）；大里店：台中市大里區德芳南路212號（電話﹕04-2483-3908 ）；高雄店：高雄市左營區博愛二路318號（電話﹕07-5568-895 ）；員林店：彰化縣埔心鄉員林大道七段500號（電話﹕04-8395-018 ）。