【台中美食】隱身審計新村！来呷弁 LAB迷你臘味飯、可帶走萌爆小電鍋！｜Là JIA BONG

「審計新村」係台中著名景點之一，整個文創基地從2015年一直營運至今，每日人流滿滿，唔少人去台中旅遊都會去逛一逛。今次E.A.Two帶大家走入「審計新村」內一間趣味十足嘅食店，唔單止將臘味飯重新包裝，更可以直接將萌爆小電鍋帶走，打卡必到！

以「Là JIA BONG 来呷弁 LAB」為題嘅食店，隱身「審計新村」一隅，座落其中一幢舊宿舍內。大門口有個舊式雪櫃同地下鐵座位，復古味濃厚！雪櫃左邊係小櫃檯，右邊則為用餐地方，小窗口透視室內空間，而室內就只有2個座位可以外望眷村小街道，入面就係一張橢圓形嘅檯，如果多人就需要好似香港茶樓咁搭檯。

該店面唔單止參與「台中綠光計劃」，店內則僅以松露肝腸飯、職人手煮茶為主打。雖然食物款式唔多，但就依然成為「審計新村」內在地人氣美食之一。其中，店內獨特嘅小電鍋造型臘味飯，恍如香港舊式飯煲造型，外表萌爆，既能謀殺菲林，亦可以將可愛飯煲帶返香港！

小電鍋松露肝腸飯係店內嘅招牌作，套餐價為TWD399，包含松露、潤腸、臘腸、鹹蛋黃、台梗九號，而台梗九號其實即係一款台灣米飯，口感係比較香軟，而且粒粒分明。呢個價格會直接附送小電鍋，以及TWD99飲品，如果要飲咖啡之類就要補差價。若單純要食呢款臘味飯，價格低至TWD169，但要先畀多TWD180，食完退返個小電鍋就可以退回現金TWD180；如果想要埋個小電鍋帶走，單買價錢為TWD349。

所謂嘅小電鍋松露肝腸飯，搞咁多嘢，簡單嚟講，就係一碗迷你港式臘味飯。不過，呢款小電鍋松露肝腸飯以迷你飯煲設計盛載臘味飯嘅器皿，吸睛度絕對爆燈！臘味飯表面有一排切成薄片嘅潤腸、臘腸，中間就有一小顆圓咕碌嘅鹹蛋黃，狀似月光。而臘味飯頂端更有松露點綴，臘腸、潤膠與鹹蛋黃、松露夾擊，一口鹹香，加上飯底經過調味，鹹中有甜。唔知點解，感覺似香港師傅炮製。

小電鍋其實係一件裝飾品，但內膽就係一個不鏽鋼小碗，既能加熱，亦可以重複使用，方便日後用嚟蒸飯，送禮自用皆宜！至於小食，TWD150嘅有麻婆Dog、Chill豆腐，重有三年三班手工薯條TWD99，當中薯條不過不失，相對嚟講就無乜特別，如果兩個人想要飽肚啲可以叫多款小食。

店內無論食物定飲品選項同樣唔多，食物款式僅有4款，飲品亦只有5款，包括TWD99嘅台灣可樂、茶香檳，TWD130嘅津津espresso、大力espresso，以及TWD160嘅台中人的拿鐵。其中，台灣可樂包含神農青草露、co2、跳跳糖；茶香檳就係一款無酒精飲料，包含台灣高山茶、co2、麝香葡萄。台灣可樂同一般飲到嘅可樂有少少分別，似乎無咁甜；而茶香檳就比較獨特，係一杯sparkling嘅茶，層次豐富，消暑解渴。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ Là JIA BONG来呷弁係「台中綠光計劃」之一。該店食物加飲品可以減TWD30。

❷ 只要加錢就可以將迷係飯煲造型蒸鍋直接帶走，唔要個小電鍋就可以平啲。店內重有各地搜羅嘅辣椒醬售賣，可以喺入面揀一揀。

❸ 外面只係飯煲造型，其實入面係一個不鏽鋼碗，真係可以用嚟長遠蒸飯用，份量大概係一個飯碗。

❹ 該店位於「審計新村」牌匾後面，牌匾位置係後門，去返後面街就會去到正門入口。