最乾淨台中市場！第六市場毗鄰勤美誠品綠園道、隱身商場樓層、告別傳統菜市場模式！

平常去台中市場，通常都恍如行入在地街市，室內外都係懷舊味濃，部份甚至有啲殘舊、立亂。今次E.A.Two就帶大家行入全台中最乾淨嘅市場，皆因該市場係位於商場入面，保證拍拖兩個人去都可以舒舒服服，唔使畀另一半詐型！

台中有幾個知名市場，包括「第一市場」、「第二市場」、「第三市場」、「第四市場」、「第五市場」、「第六市場」，頭5個市場都係與街市無異，即係在地傳統菜市場模式，週邊皆為庶民風景。不過，「第六市場」就與別不同，反而係隱身新式商場樓層內，室內外乾乾淨淨，企企理理，環境通爽，保證逛得舒服！

而「金典綠園道商場」本身毗連「臺中金典飯店」，係來自勤美集團、太子建設嘅台中五星級飯店。而附近嘅「勤美誠品綠園道」都係其代表作。今次嘅「台中第六市場」就座落「金典綠園道商場」3樓，近年進駐該複合式商場，有關方面將市場本來擁有嘅物產搬入冷氣商場內，包括新鮮肉品、海鮮、蔬果，以及生活雜貨、小吃攤檔，種類多元化。

「第六市場」係首個位於商場內嘅傳統市場，告別本來嘅庶民風景，反而加添文青風格。只不過，呢個設計有辣有唔辣，雖然該市場係逛得舒服，但編輯個人就比較喜愛傳統市場嘅地道感。

市場內每道巷弄都好清晰，就好似逛一般商場市集，一個又一個攤位整齊排列同擺放，入口一邊有唔少文青手作攤檔，另一邊就有街市生鮮攤檔。其中，有間叫「尷尬司康」，而「司康」即係「Scone」，亦即係英式鬆餅，每個賣TWD75至85，為唔少在地人喜愛嘅小店。另外，亦可以試試有機豆花，大概都係TWD70一碗；市場內唯一手搖飲店係「村掌」，以現沖茶為主。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 溫體生鮮肉品類僅於10:00-19:30供應。

❷ 乘搭高鐵至「高鐵台中站」，轉乘159號公車，於「廣三SOGO(美村路)站」落車，徒步約5分鐘即達；若轉乘台中客運 11/70/300/301/302/303/304/305/306/307/308，或者統聯客運77線，可以於「科博館」落車。

❸ 如果自駕前往，可以將車輛停泊於商場停車場，停車場位置喺B3至B5，消費滿TWD500即可免費泊車1小時，TWD1000就可以停2小時，而TWD2000就可以停泊3小時，如此類推，最高可以免費停泊6小時，只要於B1或3樓服務台辦理手續，或者於停車場自動繳費機都可以辦理手續。否則停車場平日收費為TWD40／小時，星期六及日就TWD60／小時。

❹ 第六市場位於商場內，只要乘扶手電梯上3樓就會見到。