台中2大公園地標！近一中街夜市／遊客中心變特色飛航館／打卡抹茶湖

講到台中景點，「台中公園」、「台中中央公園」皆為重要地標同市區象徵，適合拍拖兩個人去散吓步。其中一個公園更將遊客中心變成迷你飛機艙，打卡必到！如果旅程有時間，不妨去探索吓在地公園啦！

台中公園

鄰近台鐵「台中火車站」嘅「台中公園」，位於台中市區，座落於自由路、雙十路、精武路之間，穿梭公園更可以前往在地人喜愛嘅「一中街夜市」。

該公園地方唔算太大，但就係台中歷史最悠久嘅公園，來自於日治時期。其中，建於1908年嘅「湖心亭」就係地標之一﹐早於1999年被列為市定古蹟，目前依然位於公園內日月湖內。涼亭以鑄鐵欄杆設計，主柱有燈架，屋頂設計亦獨特。

整個公園其實無乜太大特別地方，但就有人工湖，可以租借小船遊湖，其他遊樂設施就同一般公園無異，週邊則有望月亭、砲台山等古蹟。編輯覺得純粹係散步之處，最大作用係以此為捷徑，通往「一中街夜市」。

台中中央公園

至於「台中中央公園」，有「台中之肺」之稱，係台中另一個大型公園，就似市區中一片綠洲！雖則距離台鐵「台中火車站」有一段距離，但就鄰近台中捷運站，目前唔需要乘搭公車都能夠抵達，因為有權徒步而至，步程只需15分鐘。

公園位處西屯區，座落水湳經貿園區內，面積比「台中公園」大，內有過萬棵綠色植物，亦有綠色能源，亦係生物棲息地。而歷史同樣同日治時期有關，「台中中央公園」有保留日軍遺跡，包括水湳機場營舍、日軍台中飛行場機槍堡、老樹公園等。

活動教學聽得多，活動公園你又有無聽過呢？「台中中央公園」規劃頗完善，唔單止分為唔同區域，依地形設有5座滯洪池；而且特別設計為「十二處感官體驗區」，畀在地人同遊客可以自行遊走步道感受公園，經遊戲體驗感知，名副其實係一個偌大活動公園。

所謂12感官體驗，其實係來自於Rudolf Steiner嘅教育理論，包括有味覺、聽覺、觸覺、談論、平衡、思考、視覺、動態、自我、溫度、嗅覺、生活，遊人可以增強互動，靠上述感官體驗嚟探索園區風景。公園分為「視覺體驗區」、「嗅覺體驗區」、「思考體驗區」、「生活體驗區」、「平衡體驗區」、「聽覺體驗區」、「談論體驗區」、「味覺體驗區」、「溫度體驗區」、「自我體驗區」、「觸摸體驗區」、「動態體驗區」。

如果想要睇黃昏日落或晚霞，建議前往「自我體驗區」，夜色漸濃時更可以於微弱燈光中探索森林生態。不過，當日編輯前往時行行吓落大雨，所以未能夠走完整個公園，亦難以前往去睇日落風景。若然想去打卡，不妨去最盡頭嘅「談論體驗區」，當中有一個「抺茶湖」，陽光充沛時風景更好，不過其實就係一個湖，只係剛好湖水偏綠，改咗個比較靚嘅名字。

台中中央公園遊客中心特色飛航館

公園內設計頗有創意，但最有創意嘅地方大概係「台中中央公園遊客中心」，室內竟然設計成一個「特色飛航館」！雖然作用係服務遊客，提供導覽手冊等，但由櫃檯到室內空間，以至入面空間，都設計成機場櫃檯、候機區、飛機艙，真係打卡必到！

呢個「特色飛航館」就似畀人免費體驗搭飛機，登機打卡，飛機跑道等造景唯肖唯妙。遊客中心內有唔少介紹水湳機場歷史知識，亦包括各式飛機、軍機模型，以及舊時照片。愈走愈入嘅時候，一端有影片介紹，另一端最盡頭就有一處小型飛機艙「水湳空軍一號」Gate 2，遊人可以自由「登機」！

飛機艙設計恍如真實飛機，唔單止可以坐喺乘客位，更可以坐於機頭駕駛艙，扮飛機師打卡，一嘗做一次機長！乘客座位背後係空姐、空少空間，而後面有一趟側門，打開門就可以「跳飛機」啦！走出機艙，你會發現外面其實係戶外空間，如果陽光普照嘅話，光線射入機艙會更有效果呢！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 台中公園附近有停車場，可停泊於「自由立體停車場」。而台中中央公園附近都有停車場，可以停泊於「創研26停車埸」、「中央公園地下停車場」。

❷ 乘搭台鐵至「台中火車站」，徒步8分鐘即達。乘搭台中捷運至「文華高中站」，徒步約15分鐘。

❸ 「中央公園遊客中心」位於台中中央公園內，對面有全家便利店。

❹ 留意台中中央公園部份設施於18:00前關閉，颱風就全個公園都唔對外開放。台中中央公園有導覽解說，需要預先查詢預約，每日只得4個時段，遊客中心需時約40分鐘，而園區就需要60至90分鐘。