【台中新景點】毗連Lala port 三井 Outlet、台中火車站！帝國製糖廠原為真製糖工廠！

去台中快閃遊，好多人通常都會遊走台中火車站週邊景點，近年火車站附近新建成一個大型商場三井Outlet，唔少人都會拍拖兩個人朝聖。今次E.A.Two就前往毗連該商場嘅台中新景點，唔單止係歷史古蹟，亦係舊時台中工場，更加係真製糖工廠，參觀免費入場！

鄰近台中火車站嘅「帝國製糖廠臺中營業所」，位置毗連「台中三井LaLaport」，歷史悠久。不過，據知於2007年先至被列為歷史古蹟，翌年方才開始由「好位子」營運，直到2019年先正式修復完成並開放公眾。而「帝國製糖廠」位置與附近湖畔「湧泉公園」相連，為糖廠湖濱公園，兩者於同年重新開放。

「帝國製糖廠」於2019年開放，而日本三井不動產就於同年起興建「台中三井LaLaport」，並於2023年先至正式開放。該商場分南北館，地方偌大，有大量品牌同餐廳進駐，除咗知名連鎖店，亦有人氣「蔦屋書店」、「旅禾泡芙之家」、「阿卡將本舖」、「Standard Products」，適合親子遊。

「帝國製糖廠臺中營業所」最初其實係一座台中工場，歷史可追塑至1912年，來自於「帝國製糖株式會社」，於戰後先發展成「臺灣糖業公司臺中糖廠」。該工場建成之時為日治時期昭和10年，即1935年，及後於90年代先至關閉，曾被當作營業所辦公室用途，而部份設施或建築亦被拆除。

從外觀去睇，不難發現「帝國製糖廠」屋頂為害棟式瓦頂，簷尾有少少翹起，整體係一字形建築，牆身同基座就以米色為主，窗口就有採光同避雨用途，建築物同時亦採用30年代流行風格設計，但都係滲出濃濃日式風格。室內則樓底特高，兩端走廊對稱，現時演變成商舖，既有餐廳，亦有售賣文青小物嘅商店。

至於點解「帝國製糖廠」係叫糖廠、係咪真係造糖同有糖賣呢？事實上，呢個製糖所最早期正正就係製作甘蔗之用，據悉每日壓榨嘅甘蔗高達1500公噸！如果你夠細心，遊走湖畔公園時，不難發現當中竟然依然有種植甘蔗。而遊走「湧泉公園」湖畔步道時，亦可以從中為「帝國製糖廠」歷史建築打卡。

糖廠內不時有唔同展覽，亦有平時好少見嘅舊式餅乾、糖果可以選擇，部份傳統糕餅就似喜慶節日先會食到，花樣變成不少。原來有種糖叫做「平安好年糖」，亦叫「馬林糖」，就好似蛋白糖一樣，做法簡單，一樽只係TWD79，逐粒賣都係TWD5。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵至「台中火車站」，徒步約10分鐘即達。

❷ 帝國製糖廠餐廳營業時間為11:00-21:00，餐廳包括冶糖、1935 Café &Bar。台中三井LaLaport分北館＋南館，部份商舖營業時間可以唔同。

❸ 場內有導覽解說﹐但需要事前預約。內裏不時會有共創講堂、DIY體驗活動舉辦，品牌包括Pro Lab 職人工作坊。

❹ 附近只可以路邊停車，有收費車位，但場內就免費入場。如果同時走台中三井LaLaport，可以停泊於商場停車場內。