晚市限定拔絲咕嚕肉？新蒲崗彩虹道Fusion Cafe中西合璧一邊食宮保雞丁一邊鋸扒！｜Wanna Eat

有留意E.A.Two飲食報告嘅讀者，應該好清楚新蒲崗係滿佈小店嘅一區，拍拖兩個人可以搵到一間又一間小店，似乎已經搵得七七八八。今次又再到新蒲崗醫吓肚，發覺原來當中重有一間Fusion Cafe，竟然可以一邊食中式嘢，一邊鋸扒？

以「Wanna Eat」命名嘅小店，採用以前嘅ICQ簡寫字為題。裝潢上就明顯以咖啡店為原型設計，都係清新咖啡店之一，店名中文直譯為「想食」，意思簡單直接。店外放置咗午市、晚市餐牌，透明度高，更有外賣可以選擇。從餐牌可見，店內唔單止有西式菜式，更有亞洲菜式，似乎就係以Fusion為主打。

如果想要知道小店嘅招牌作，就要留意餐牌上嘅字眼或標誌，比如係呢間會以「想食」為題，最突出嘅必定係拔絲咕嚕肉$98，另外重有台式三杯雞$88、柚子雞定食$88、霹靂雞扒$148等。不過，值得留意嘅係呢一堆菜式都係夜晚晚餐限定，換言之午市係未能供應住。

室內設計都係以咖啡店常見嘅白色、木色為主調，但菜式就唔係單單係all day breakfast、意粉之類。午餐都有限定，例如咖喱牛肋肉飯$78、海鮮蟹籽炒飯$78等，套餐包含餐湯或沙律，以及咖啡或茶，凍飲加$3，可以半價升級特飲或手調咖啡。沙律就係一般沙律菜加蕃茄，餐湯則為蘑菇湯，無咩太大驚喜。

午餐都可以鋸吓扒，8安士紐西蘭西冷扒$138，配上沙律、薯條。西冷扒選擇7成熟，正常水準啦，牛扒都係軟腍有肉汁嘅，唔算好top姐。比較有驚喜嘅反而係中西合壁，有款川式宮保雞丁飯$68，一個人鋸扒嘅同時，另一個人可以食中式嘅菜式！宮保雞丁向來都係四川菜，放喺西式咖啡店就梗係fusion style，雞丁份量唔算多，白飯就幾多，重有腰果陪襯。宮保雞丁味道上帶有麻辣味，有辣椒香，但辣度上又唔會好辣，容易入口﹐好開胃。

除咗有「想食」兩個字嘅招牌焦糖咖啡芭菲$72，亦有期間限定baileys咖啡朱古力smoothie$58。不過，跟餐我哋只係選擇一杯caffee mocha$38、一杯紫薯牛奶$36至42。咖啡不過不失，拉花靚靚，紫薯牛奶都有紫薯味，攪勻仍然偏稠身。另外，午市可以單點蛋糕，$28有限時優惠巴斯克芝士蛋糕，包括原味、伯爵茶、朱古力口味。而下午茶加多$20就有$48套餐，含蛋糕、雪糕、咖啡或茶，最大嘅bug係下午茶時間唔可以單點蛋糕，兩個人又唔想飲多杯飲品。